రాయలసీమ న్యూస్, చిత్తూరు: కాణిపాకం శ్రీ స్వామి వారి దేవస్థానం 2026 వార్షిక బ్రహ్మోత్సవాల నేపథ్యంలో దేవస్థానం కార్యనిర్వహణాధికారి శ్రీ పెంచల కిషోర్ ఆధ్వర్యంలో విస్తృత తనిఖీలు నిర్వహించారు. జిల్లాలోని వివిధ శాఖల యంత్రాంగంతో కలిసి క్యూలైన్లు, బస్టాండు, కాణిపాకం ఆలయ ప్రాంగణం, అలాగే కాణిపాకం గ్రామంలోని ముఖ్య ప్రాంతాలను పరిశీలించారు.
భక్తుల రద్దీని దృష్టిలో పెట్టుకుని క్యూలైన్ల వద్ద ఏర్పాట్లు, బస్టాండు పరిసరాల్లో రాకపోకలు, పార్కింగ్ సదుపాయాలు, శానిటేషన్ వంటి అంశాలను అధికారులు సమీక్షించారు. ఆలయ పరిసరాల్లో భద్రతా చర్యలు, జనసంచారం ఎక్కువగా ఉండే ప్రాంతాల్లో అవసరమైన మార్పులు, మరమ్మతులపై సంబంధిత శాఖల అధికారులతో చర్చించారు.
ఎలక్ట్రికల్ వ్యవస్థలపై ప్రత్యేక దృష్టి సారించిన అధికారులు, ఆలయం లోపల మరియు బయట ఏర్పాటు చేసిన విద్యుత్ లైన్లు, లైటింగ్, తాత్కాలిక కనెక్షన్లను పరిశీలించారు. అగ్ని ప్రమాదాల నివారణకు తీసుకోవాల్సిన జాగ్రత్తలపై కూడా సమగ్రంగా సమీక్ష నిర్వహించారు.
దేవస్థానం పరిసరాల్లో ఉన్న షాపుల యజమానులు, సేవలో ఉన్న సిబ్బందికి ఎలక్ట్రికల్ భద్రత, అగ్ని ప్రమాదాల నివారణ, అత్యవసర పరిస్థితుల్లో అనుసరించాల్సిన చర్యలపై అధికారులు అవగాహన కల్పించారు. షాపుల్లో గ్యాస్ సిలిండర్లు, విద్యుత్ పరికరాల వినియోగం, అగ్ని మాపక పరికరాల లభ్యత వంటి అంశాలపై సూచనలు చేశారు.
కాణిపాకం గ్రామంలో మాడా విధుల అమలుపై కూడా అధికారులు తిరిగి తనిఖీలు నిర్వహించారు. గ్రామంలో రహదారులు, డ్రైనేజీ, తాగునీటి సరఫరా, శుభ్రత, వీధి దీపాల వంటి మౌలిక వసతులపై సమీక్ష చేసి, బ్రహ్మోత్సవాల సమయంలో భక్తులకు అసౌకర్యం కలగకుండా ముందస్తు చర్యలు తీసుకోవాలని సంబంధిత శాఖలకు సూచించారు.
ఈ కార్యక్రమంలో చిత్తూరు ఆర్డీవో శ్రీనివాసులు, చిత్తూరు అగ్నిమాపక శాఖ అధికారి పెద్దిరెడ్డి, సిఐ శ్రీధర్ నాయుడు, ఐరాల ఎమ్మార్వో, ఆర్ అండ్ బి, ఆరోగ్యశాఖ, పంచాయతీరాజ్, మండల అధికారులు, కాణిపాకం ఎస్ఐ నరసింహులు, ఇంజనీరింగ్ శాఖ అసిస్టెంట్ ఇంజనీర్లు తదితరులు పాల్గొన్నారు. బ్రహ్మోత్సవాల సమయంలో భక్తుల భద్రత, సౌకర్యాల కోసం అన్ని శాఖలు సమన్వయంతో పనిచేయాలని అధికారులు నిర్ణయించారు.
