రాయలసీమ న్యూస్, చిత్తూరు: చిత్తూరు జిల్లా వాల్మీకిపురం మండలం చింతపర్తి పరిసరాల్లో మహిళ హత్యకు గురైన ఘటన వెలుగులోకి వచ్చింది. కడప జిల్లా పోరుమామిళ్లకు చెందిన లక్ష్మీదేవి (48) కూలి పనుల కోసం చింతపర్తికి వచ్చి అక్కడే జీవనం సాగిస్తోంది. స్థానికంగా బొగ్గులు కాల్చే పనులు చేస్తూ జీవనోపాధి పొందుతున్నట్లు పోలీసులు తెలిపారు.
అక్కడే కూలి పనులు చేసే శ్రీనుకు చెందిన ద్విచక్ర వాహనంపై లక్ష్మీదేవి, నాగరాజు, సుగుణమ్మ శుక్రవారం చింతపర్తిలో మద్యం సేవించినట్లు సమాచారం. మద్యం సేవించిన అనంతరం ముగ్గురూ అక్కడి నుంచి బయలుదేరినట్లు తెలిసింది. ఈ క్రమంలో సుగుణమ్మ మద్యం మత్తులో ఉండగా, నాగరాజు తాను తెచ్చిన ద్విచక్ర వాహనంలో లక్ష్మీదేవిని ఎక్కించుకుని నిమ్మనపల్లె మార్గంలో వెళ్లినట్లు పోలీసులు ప్రాథమిక దర్యాప్తులో గుర్తించారు.
నిమ్మనపల్లె మార్గంలో ఏమి జరిగిందో స్పష్టంగా తెలియరాలేదు. అయితే అక్కడే పెద్ద బండరాయితో లక్ష్మీదేవి తలపై కొట్టి హత్య చేసి, నాగరాజు పరారైనట్లు పోలీసులు అనుమానిస్తున్నారు. స్థానికుల సమాచారం మేరకు ఈ ఘటనపై పోలీసులు స్పందించారు.
సమాచారం అందుకున్న వాల్మీకిపురం సీఐ రాఘవరెడ్డి సిబ్బందితో కలిసి ఘటనా స్థలానికి చేరుకుని మృతదేహాన్ని పరిశీలించారు. అనంతరం శవపరీక్ష నిమిత్తం మృతదేహాన్ని వాల్మీకిపురం ప్రభుత్వ ఆసుపత్రికి తరలించారు.
ఈ ఘటనపై కేసు నమోదు చేసి దర్యాప్తు ప్రారంభించినట్లు పోలీసులు తెలిపారు. నాగరాజు కోసం గాలింపు చర్యలు కొనసాగుతున్నాయని, సంఘటనకు గల కారణాలను తెలుసుకునేందుకు విచారణ జరుపుతున్నట్లు పేర్కొన్నారు. హత్యకు దారితీసిన పరిస్థితులు, మద్యం సేవించిన తర్వాత జరిగిన పరిణామాలపై పోలీసులు వివిధ కోణాల్లో దర్యాప్తు చేస్తున్నారు.
