రాయలసీమ న్యూస్, క్రైమ్ డెస్క్: కేరళలోని కన్నూర్ జిల్లాలో పెదవి గాయానికి చికిత్స కోసం ఆస్పత్రికి తీసుకెళ్లిన 18 నెలల చిన్నారి మృతి చెందడం స్థానికంగా విషాదాన్ని మిగిల్చింది. అనస్తీషియా ఇచ్చిన కొద్దిసేపటికే బాలుడు స్పృహ కోల్పోయి, అనంతరం చికిత్స పొందుతూ మరణించినట్లు కుటుంబ సభ్యులు తెలిపారు. ఈ ఘటనపై వైద్య నిర్లక్ష్య ఆరోపణలు వెలువడగా, పోలీసులు కేసు నమోదు చేశారు.

కన్నూర్ జిల్లాలోని ఎరమం కుట్టూర్‌కు చెందిన సూరజ్, విజయిష దంపతుల ఏకైక కుమారుడు దేశాంశ్ శౌర్య జులై 5నా ఇంటి బయట ఆడుకుంటూ ఉండగా కిందపడిపోయాడు. ఈ ఘటనలో బాలుడి పెదవికి గాయం కావడంతో కుటుంబ సభ్యులు అతన్ని సమీపంలోని మథమంగళ ప్రాథమిక ఆరోగ్య కేంద్రానికి తీసుకెళ్లారు. అక్కడ వైద్యులు ప్రాథమిక చికిత్స అందించారు.

తదుపరి మెరుగైన చికిత్స కోసం కుటుంబ సభ్యులు దేశాంశ్‌ను పయ్యన్నూర్‌లోని బేబీ మెమోరియల్ హాస్పిటల్ కు తరలించారు. అక్కడ పెదవికి కుట్లు వేయాల్సి రావడంతో చిన్నారికి అనస్తీషియా ఇచ్చినట్లు సమాచారం. అయితే అనస్తీషియా ఇచ్చిన తర్వాత బాలుడు స్పృహ కోల్పోయాడు. వెంటనే అతని పరిస్థితి విషమించడంతో కన్నూర్‌లోని బేబీ మెమోరియల్ హాస్పిటల్ కు తరలించి వెంటిలేటర్‌పై చికిత్స అందించారు.

వైద్యుల ప్రయత్నాలు ఫలించకపోవడంతో దేశాంశ్ శౌర్య శుక్రవారం రాత్రి సుమారు 9 గంటల సమయంలో మరణించినట్లు కుటుంబ సభ్యులు పేర్కొన్నారు. ఆకస్మికంగా జరిగిన ఈ మరణంతో కుటుంబంలో విషాద ఛాయలు అలుముకున్నాయి. చిన్నారి మరణానికి వైద్యుల నిర్లక్ష్యమే కారణమని కుటుంబ సభ్యులు ఆరోపిస్తున్నారు.

ఈ ఘటనలో చికిత్స అందించిన వైద్యురాలు అంజలి పొదువల్ నిర్లక్ష్యం వహించిందని బాలుడి కుటుంబం ఆరోపణలు చేసింది. వారి ఫిర్యాదు మేరకు పోలీసులు డాక్టర్ అంజలి పొదువల్‌పై కేసు నమోదు చేసినట్లు స్థానిక సమాచారం. కేసు దర్యాప్తు కొనసాగుతోంది.

ఇక ఆస్పత్రి యాజమాన్యం మాత్రం తమ వైపు నుంచి వివరణ ఇచ్చింది. అనస్తీషియా ఇచ్చిన వెంటనే చిన్నారికి ఊహించని రీతిలో కార్డియాక్ అరెస్ట్ రావడంతో పరిస్థితి విషమించిందని ఆస్పత్రి ప్రతినిధులు తెలిపారు. వెంటనే వెంటిలేటర్ సపోర్ట్ అందించి, కన్నూర్‌లోని ఆస్పత్రికి తరలించినట్లు వారు పేర్కొన్నారు.

సరైన మోతాదులోనే అనస్తీషియా ఇచ్చామని, చాలా అరుదుగా ఇలాంటి పరిణామాలు సంభవించే అవకాశం ఉంటుందని ఆస్పత్రి యాజమాన్యం స్పష్టం చేసింది. చిన్నారి ప్రాణాలు కాపాడేందుకు అన్ని విధాలుగా ప్రయత్నాలు చేసినప్పటికీ, ఫలితం దురదృష్టకరంగా మారిందని ఆస్పత్రి వర్గాలు తెలిపాయి.

చిన్నారి మరణంపై కుటుంబ సభ్యుల ఆరోపణలు, ఆస్పత్రి యాజమాన్యం వివరణ నేపథ్యంలో పోలీసులు వైద్య పత్రాలు, చికిత్స వివరాలు సేకరిస్తున్నారు. దర్యాప్తు అనంతరం తదుపరి చర్యలు చేపట్టనున్నట్లు పోలీసు వర్గాలు సూచిస్తున్నాయి.