రాయలసీమ న్యూస్, క్రైమ్ డెస్క్: జగిత్యాల జిల్లాకు చెందిన యూట్యూబర్‌ వైష్ణవి హత్య కేసులో నిందితుడైన ఆమె భర్త హరిబాబు దారుణ హత్యకు గురైన ఘటన నిజామాబాద్‌లో కలకలం రేపింది. గురువారం సాయంత్రం నిజామాబాద్‌ రాజరాజేంద్ర చౌరస్తాలో ఈ సంఘటన చోటుచేసుకుంది.
తల్లి వద్ద ఉన్న హరిబాబుపై ఓ వ్యక్తి అకస్మాత్తుగా కత్తితో దాడి చేసినట్లు సమాచారం. నిందితుడు వరుసగా కత్తిపోటులు గుద్దడంతో హరిబాబు తీవ్రంగా గాయపడ్డాడు. భారీగా రక్తస్రావం కావడంతో అక్కడికక్కడే మృతి చెందినట్లు ప్రత్యక్ష సాక్షులు చెబుతున్నారు.
ఈ ఘటనతో రాజరాజేంద్ర చౌరస్తా పరిసర ప్రాంతంలో ఉద్రిక్త పరిస్థితులు నెలకొన్నాయి. స్థానికులు భయాందోళనకు గురయ్యారు. సమాచారం అందుకున్న పోలీసులు వెంటనే సంఘటనా స్థలానికి చేరుకుని పరిస్థితిని అదుపులోకి తీసుకున్నారు. మృతదేహాన్ని పోస్టుమార్టం కోసం ప్రభుత్వ ఆసుపత్రికి తరలించారు.
ఇదిలా ఉండగా, వైష్ణవి సోదరుడు సంతోష్‌ సోషల్‌ మీడియాలో వీడియో పోస్ట్‌ చేసి, హరిబాబును తానే హత్య చేసినట్లు పేర్కొన్నాడు. తన చెల్లెలు వైష్ణవిని హరిబాబు హత్య చేసినందుకే ఈ దాడి చేశానని వీడియోలో వెల్లడించినట్లు తెలుస్తోంది.
వీడియో వైరల్‌ కావడంతో పోలీసులు అప్రమత్తమయ్యారు. అనంతరం సంతోష్‌ కోరుట్ల పోలీస్‌ స్టేషన్‌లో లొంగిపోయినట్లు సమాచారం. అతన్ని అదుపులోకి తీసుకున్న పోలీసులు విచారణ కొనసాగిస్తున్నారు.
యూట్యూబర్‌ వైష్ణవి హత్య కేసు నేపథ్యంలో హరిబాబు హత్య జరగడం స్థానికంగా పెద్ద చర్చనీయాంశంగా మారింది. రెండు హత్యలతో సంబంధం ఏంటన్న దానిపై పోలీసులు వివిధ కోణాల్లో దర్యాప్తు చేస్తున్నారు. సంఘటనా స్థలంలో క్లూస్‌ టీం, డాగ్‌ స్క్వాడ్‌ సహాయంతో ఆధారాలు సేకరిస్తున్నారు.
హరిబాబు హత్యపై కేసు నమోదు చేసిన కోరుట్ల పోలీసులు, వైష్ణవి హత్య కేసు వివరాలను కూడా పరిశీలిస్తున్నారు. సంతోష్‌ సోషల్‌ మీడియా వీడియో, అతని లొంగిపోయిన అంశాలన్నింటిని దర్యాప్తులో భాగంగా పరిశీలిస్తున్నట్లు పోలీసు వర్గాలు తెలిపాయి.
