రాయలసీమ న్యూస్, అనంతపురం: అనంతపురం: అనంతపురం నగరంలో సంచార జాతుల విముక్త దివాస్ కార్యక్రమాన్ని ఘనంగా నిర్వహించారు. సంచార, అర్ధ సంచార, విముక్త జాతుల ఆత్మగౌరవం, హక్కులు, అభ్యున్నతి కోసం బీజేపీ ఓబీసీ మోర్చా ఆధ్వర్యంలో ఈ వేడుకను ఏర్పాటు చేశారు. నగరంలోని వివిధ ప్రాంతాల నుంచి సంచార జాతులకు చెందిన వందలాది మంది ఈ కార్యక్రమానికి హాజరయ్యారు.
కార్యక్రమం అనంతరం సంచార, అర్ధ సంచార జాతులకు చెందిన కళాకారులు నగర వీధుల్లో తమ సంప్రదాయ కళలను ప్రదర్శించారు. డోలు, డప్పులు, జానపద నృత్యాలతో నగర వీధులు సందడిగా మారాయి. సంప్రదాయ వేషధారణలో పాల్గొన్న కళాకారులు తమ ప్రత్యేక శైలిలో ప్రదర్శనలు ఇవ్వడంతో అనంతపురం నగరం సంస్కృతి, సంప్రదాయాలతో కనుల పండుగగా మారింది.
ఈ సందర్భంగా బీజేపీ నేత, ఎమ్మెల్యే పార్థసారథి కార్యక్రమంలో పాల్గొని సంచార జాతుల ప్రతినిధులతో సమావేశమయ్యారు. సంచార, అర్ధ సంచార, విముక్త జాతుల సమస్యలు, అవసరాలపై ఆయన వివరాలు తెలుసుకున్నారు. ఈ వర్గాల సామాజిక, ఆర్థిక స్థితిగతులు మెరుగుపడేందుకు ప్రభుత్వం చేపడుతున్న చర్యలపై ఆయన మాట్లాడారు.
సమాజంలోని చివరి వ్యక్తి వరకు అభివృద్ధి ఫలాలు చేరాలన్నదే ఎన్డీఏ ప్రభుత్వం, బీజేపీ సంకల్పం
సంచార, అర్ధ సంచార జాతుల అభ్యున్నతి కోసం కేంద్ర ప్రభుత్వం ప్రత్యేక పథకాలను అమలు చేస్తోంది. అర్హులైన ప్రతి ఒక్కరికీ ప్రభుత్వ పథకాలు చేరేలా చర్యలు తీసుకుంటున్నాం
డీనోటిఫైడ్ కమిషన్ బోర్డుల ఏర్పాటు, అర్హులైన వారికి గుర్తింపు కల్పించేలా సర్టిఫికెట్ల జారీకి ప్రభుత్వం కృషి చేస్తోందని ఎమ్మెల్యే పార్థసారథి పేర్కొన్నారు. ఈ చర్యల ద్వారా సంచార, అర్ధ సంచార, విముక్త జాతుల సామాజిక గుర్తింపు, హక్కులు మరింత బలపడతాయని ఆయన అభిప్రాయపడ్డారు.
సంచార జాతుల విముక్త దివాస్ సందర్భంగా నిర్వహించిన ఈ కార్యక్రమం ద్వారా ఈ వర్గాల సంస్కృతి, సంప్రదాయాలు వెలుగులోకి వచ్చాయని నిర్వాహకులు తెలిపారు. సంచార జాతుల సమస్యల పరిష్కారానికి ప్రభుత్వంతో పాటు సమాజం కూడా ముందుకు రావాల్సిన అవసరం ఉందని వారు భావించారు.
