రాయలసీమ న్యూస్, అనంతపురం: అనంతపురం జిల్లా బెలుగుప్ప మండలం బ్రాహ్మణపల్లి శివారులో గురువారం తెల్లవారుజామున జరిగిన రోడ్డు ప్రమాదంలో ఇద్దరు వ్యక్తులు మృతి చెందగా, మరో ఇద్దరికి గాయాలయ్యాయి. రోడ్డుపైకి అకస్మాత్తుగా వచ్చిన అడవి పందిని తప్పించబోయే క్రమంలో కారు అదుపుతప్పి బోల్తా పడటంతో ఈ దుర్ఘటన చోటుచేసుకుంది.
పోలీసులు, స్థానికుల సమాచారం ప్రకారం కళ్యాణదుర్గం పట్టణానికి చెందిన కోమటి నాగరాజు, కోమటి గుప్తా, బలిజ నరహరి, కోమటి హర్ష నలుగురు కర్ణాటకలోని చిక్కమగళూరు ప్రాంతానికి తమ సొంత పనుల నిమిత్తం వెళ్లి, తిరిగి కళ్యాణదుర్గం వైపు వస్తున్నారు. వీరు ప్రయాణిస్తున్న కారు గురువారం తెల్లవారుజామున సుమారు 3 గంటల సమయంలో రాయదుర్గం–అనంతపురం ప్రధాన రహదారిపై బ్రాహ్మణపల్లి శివారుకు చేరుకున్నప్పుడు ప్రమాదం జరిగింది.
రోడ్డుపైకి వచ్చిన అడవి పందిని తప్పించేందుకు డ్రైవర్ ప్రయత్నించగా, కారు నియంత్రణ కోల్పోయి రహదారి పక్కకు బోల్తా పడింది. ఈ ప్రమాదంలో కోమటి నాగరాజు (55), కోమటి గుప్తా (45) అక్కడికక్కడే మృతి చెందారు. కోమటి గుప్తా ప్రభుత్వ ఉపాధ్యాయుడిగా పనిచేస్తున్నట్లు సమాచారం. నాగరాజు కళ్యాణదుర్గం పట్టణంలో వస్త్ర వ్యాపారిగా సుపరిచితుడు అని స్థానికులు చెబుతున్నారు.
కారులో ఉన్న మరో ఇద్దరు ప్రయాణికులు బలిజ నరహరి, కోమటి హర్షలకు స్వల్ప గాయాలయ్యాయి. ప్రమాదం జరిగిన వెంటనే స్థానికులు, పోలీసులు గాయపడిన వారిని కళ్యాణదుర్గం ప్రభుత్వ ఆసుపత్రికి తరలించారు. ప్రస్తుతం వారు అక్కడే చికిత్స పొందుతున్నారు.
మృతదేహాలను కూడా పోస్టుమార్టం నిమిత్తం కళ్యాణదుర్గం ప్రభుత్వ ఆసుపత్రికి తరలించారు. ఘటన స్థలానికి చేరుకున్న పోలీసులు కేసు నమోదు చేసి దర్యాప్తు ప్రారంభించారు. అడవి జంతువుల సంచారం ఎక్కువగా ఉండే ఈ మార్గంలో రాత్రి, తెల్లవారుజామున ప్రయాణించే వారు జాగ్రత్తగా ఉండాలని స్థానికులు సూచిస్తున్నారు.
ఘటనతో కళ్యాణదుర్గం పట్టణంలో విషాదం నెలకొంది. ఒకరు ప్రసిద్ధ వస్త్ర వ్యాపారి, మరొకరు ప్రభుత్వ ఉపాధ్యాయుడు కావడంతో స్థానిక వ్యాపార వర్గాలు, విద్యారంగానికి చెందిన వారు తీవ్ర దిగ్భ్రాంతి వ్యక్తం చేస్తున్నారు. మృతుల కుటుంబ సభ్యులు, బంధువులు ఆసుపత్రి వద్ద కన్నీరుమున్నీరుగా విలపిస్తున్నారు.
