రాయలసీమ న్యూస్, శ్రీ సత్యసాయి: రాబోయే గణేష్ ఉత్సవాల నేపథ్యంలో శ్రీ సత్యసాయి జిల్లా వ్యాప్తంగా శాంతిభద్రతలు, ప్రజల భద్రత, ట్రాఫిక్ నియంత్రణపై పోలీసు శాఖ ప్రత్యేక ఏర్పాట్లు చేపట్టింది. ఈ క్రమంలో జిల్లా ఎస్పీ ఎస్. సతీష్ కుమార్, ఐపీఎస్ హిందూపురం పట్టణంలోని పలు ప్రాంతాల్లో పర్యటించి ఏర్పాట్లను పరిశీలించారు.
ఉత్సవాల సమయంలో ఎలాంటి అవాంఛనీయ సంఘటనలు జరగకుండా ముందస్తు చర్యలు తీసుకోవాలని ఎస్పీ సూచించారు. గణేష్ మండపాల ఏర్పాటు, విగ్రహాల ప్రతిష్ఠాపన, ఊరేగింపులు, నిమజ్జన కార్యక్రమాలన్నింటిలోనూ నిర్వాహకులు పోలీసు శాఖతో సమన్వయం చేసుకుంటూ ముందుకు సాగాలని సూచించారు.
ఉత్సవ నిర్వాహకులు తప్పనిసరిగా ముందస్తు అనుమతులు తీసుకోవాలని, పోలీసుల సూచనలు, మార్గదర్శకాలను కచ్చితంగా పాటించాలని ఎస్పీ స్పష్టం చేశారు. మండపాల ఏర్పాటు, విద్యుత్ వైరింగ్ వంటి అంశాల్లో భద్రతా ప్రమాణాలను ఎట్టి పరిస్థితుల్లోనూ విస్మరించరాదని సూచించారు.
ఉత్సవాల కారణంగా ప్రజలు, వాహనాల రాకపోకలకు అంతరాయం కలగకుండా చూడాలని, అత్యవసర సేవల వాహనాలకు ఎలాంటి అడ్డంకులు లేకుండా మార్గాలు ఖాళీగా ఉంచేలా ఏర్పాట్లు చేయాలని ఆయన సూచించారు. డీజేలు, సౌండ్ సిస్టమ్స్ వినియోగం విషయంలో నిర్ణయించిన శబ్ద పరిమితులను పాటించాల్సిందేనని పోలీసు శాఖ స్పష్టం చేసింది.
గణేష్ విగ్రహాల ఊరేగింపు మార్గాలను ముందుగానే పోలీసులతో చర్చించి ఖరారు చేసుకోవాలని, మార్గమధ్యంలో ట్రాఫిక్ అంతరాయం, గుంపులు గుమికూడే ప్రాంతాల వద్ద ప్రత్యేక జాగ్రత్తలు తీసుకోవాలని ఎస్పీ సూచించారు. మద్యం సేవించి ఉత్సవాల్లో పాల్గొనకుండా నిర్వాహకులు, భక్తులు జాగ్రత్తలు తీసుకోవాలని ఆయన పేర్కొన్నారు.
ఉత్సవాల సమయంలో అనుమానాస్పద వ్యక్తులు, వస్తువులు కనిపించిన వెంటనే సమీప పోలీసు స్టేషన్కు లేదా డయల్ 100కు సమాచారం ఇవ్వాలని జిల్లా పోలీసులు ప్రజలను కోరారు. సోషల్ మీడియాలో వచ్చే వదంతులు, నిర్ధారణ లేని సమాచారాన్ని నమ్మకూడదని, అలాంటి సందేశాలను ఇతరులకు పంపకుండా ఉండాలని సూచించారు.
చిన్నపాటి వివాదాలు పెద్ద గొడవలుగా మారకుండా అందరూ సంయమనంతో వ్యవహరించాలని, పరస్పర గౌరవంతో ఉత్సవాలను నిర్వహించుకోవాలని ఎస్పీ పిలుపునిచ్చారు.
గణేష్ ఉత్సవాల సమయంలో పగలు–రాత్రి డ్రోన్ కెమెరాల ద్వారా నిరంతర నిఘా ఏర్పాటు చేయనున్నట్లు, పటిష్టమైన పోలీసు బందోబస్తు, ట్రాఫిక్ నియంత్రణ చర్యలు అమలు చేస్తామని జిల్లా ఎస్పీ తెలిపారు. నిబంధనలు ఉల్లంఘించి అల్లర్లు, గొడవలు సృష్టించే వారు, శాంతిభద్రతలకు విఘాతం కలిగించే చర్యలకు పాల్పడిన వారిపై కఠిన చర్యలు తప్పవని ఆయన హెచ్చరించారు.
భక్తి, క్రమశిక్షణ, సామరస్యంతో గణేష్ ఉత్సవాలను ప్రశాంతంగా, సురక్షితంగా, ఆనందంగా జరుపుకునేలా ప్రజలంతా పోలీసు శాఖకు సహకరించాలని జిల్లా పోలీసులు కోరుతున్నారు.
