రాయలసీమ న్యూస్, శ్రీ సత్యసాయి: శ్రీ సత్య సాయి జిల్లాలో మహిళల భద్రతను దృష్టిలో పెట్టుకుని పోలీసు శాఖ ఆధ్వర్యంలో ‘శక్తి యాప్’పై విస్తృత అవగాహన కార్యక్రమాలు కొనసాగుతున్నాయి. జిల్లా ఎస్పీ శ్రీ ఎస్. సతీష్ కుమార్, ఐపీఎస్ ఆదేశాల మేరకు అన్ని విభాగాల పోలీసులు సమన్వయంతో ఈ కార్యక్రమాలను నిర్వహిస్తున్నారు.
జిల్లాలోని పాఠశాలలు, కళాశాలలు, వసతి గృహాలు, కార్యాలయాలు, బస్టాండ్లు, మార్కెట్లు తదితర ప్రజా ప్రదేశాల్లో ప్రత్యేకంగా శక్తి టీం బృందాలను ఏర్పాటు చేశారు. ఈ బృందాలు మహిళలు, విద్యార్థినులకు ‘శక్తి యాప్’ వినియోగంపై ప్రత్యక్షంగా అవగాహన కల్పిస్తున్నాయి. యాప్ ద్వారా అత్యవసర సమయంలో పోలీసుల సహాయం ఎలా త్వరగా పొందవచ్చో వివరంగా తెలియజేస్తున్నారు.
మొబైల్ ఫోన్లో ‘శక్తి యాప్’ను ఎలా డౌన్లోడ్ చేసుకోవాలి, రిజిస్ట్రేషన్ ప్రక్రియ ఎలా పూర్తి చేయాలి, అత్యవసర పరిస్థితుల్లో యాప్లోని సదుపాయాలను ఎలా వినియోగించుకోవాలి అనే అంశాలను ప్రాయోగికంగా చూపిస్తున్నారు. మహిళలు తమ మొబైల్ ఫోన్లలో యాప్ను ఇన్స్టాల్ చేసుకుని, అవసరమైన వివరాలు నమోదు చేసుకోవాలని సూచిస్తున్నారు.
మహిళల భద్రతపై ఆందోళన చెందాల్సిన అవసరం లేదని, సమస్యలు ఎదురైనప్పుడు ఆలస్యం చేయకుండా వెంటనే పోలీసులను ఆశ్రయించాలని పోలీసులు మహిళలకు సూచిస్తున్నారు. శక్తి యాప్ ద్వారా ఇచ్చే సమాచారం ఆధారంగా సంబంధిత ప్రాంతానికి సమీపంలో ఉన్న పోలీసు బృందాలు తక్షణమే స్పందించేలా వ్యవస్థను రూపొందించినట్టు జిల్లా పోలీసు అధికారులు తెలియజేస్తున్నారు.
మహిళల భద్రతకు సంబంధించి ప్రతి కుటుంబం, ప్రతి విద్యాసంస్థ, ప్రతి కార్యాలయం బాధ్యతగా ముందుకు రావాలని, శక్తి యాప్ గురించి తెలిసిన వారు తమ కుటుంబ సభ్యులు, స్నేహితులు, బంధువులకు కూడా ఈ సమాచారం చేరవేయాలని పోలీసులు కోరుతున్నారు. ఎక్కువ మంది మహిళలు యాప్ను వినియోగిస్తే, అత్యవసర పరిస్థితుల్లో సహాయం మరింత వేగంగా, సమర్థంగా అందించగలమని అధికారులు భావిస్తున్నారు.
శక్తి యాప్ ద్వారా మహిళలకు సాంకేతికతతో భరోసా కల్పించడమే లక్ష్యమని, భద్రతా పరమైన చర్యల్లో ప్రజల భాగస్వామ్యం పెరిగితే నేరాల నియంత్రణకు కూడా ఇది తోడ్పడుతుందని జిల్లా పోలీసు శాఖ పేర్కొంటోంది.
శక్తి యాప్ – మహిళల భద్రతకు సాంకేతికతతో భరోసా!
– పుట్టపర్తి జిల్లా పోలీస్ కార్యాలయం
