రాయలసీమ న్యూస్, ఎంటర్టైన్మెంట్ డెస్క్: హైదరాబాద్: ఒక సినిమా విడుదలైన తర్వాత అందులోని పాత్రలు, సన్నివేశాలు, సంభాషణలపై చర్చలు, వివాదాలు రావడం సాధారణం. అయితే ఇటీవల కాలంలో ఇంకా రిలీజ్ కాకముందే టైటిల్ కారణంగా చర్చకు దారితీసిన చిత్రం ‘ఇడుపు కాయితం’. ఈ సినిమాకు సంబంధించిన టైటిల్, భాష, యాస అంశాలపై సోషల్ మీడియాలో రెండు వర్గాలు ఏర్పడి పరస్పరం ఆరోపణలు, విమర్శలు చేసుకుంటూ వివాదాన్ని రగిలించాయి.
ఈ నేపథ్యంలో చిత్ర నిర్మాత బన్ని వాస్ స్పందించారు. ‘ఇడుపు కాయితం’ కథ ఒక ప్రాంతానికి మాత్రమే పరిమితమయ్యేలా లేదని, కథను బట్టి టైటిల్ నిర్ణయించామని ఆయన తెలిపారు. ప్రస్తుత పరిస్థితుల్లో టైటిల్ గానీ, కథ గానీ మార్చే ప్రశ్నే లేదని స్పష్టం చేశారు. షూటింగ్ పూర్తయి, సినిమా విడుదలైన తర్వాతే అసలు చిత్రం మాట్లాడుతుందని, అప్పుడే ప్రేక్షకుల తీర్పు వెలువడుతుందని ఆయన అభిప్రాయపడ్డారు.
‘‘ఏ సినిమాకైనా కథ, దాని నేపథ్యం బట్టే టైటిల్ ఉంటుంది. దీనిపై ఇక చర్చ అనవసరం. షూటింగ్ పూర్తయి విడుదలైన తర్వాత సినిమానే మాట్లాడుతుంది. ఆంధ్రా, తెలంగాణ ఎవరైనా సరే సినిమా నచ్చితేనే చూస్తారు. నచ్చకపోతే చూడరు. నేను చేయాల్సింది సినిమాను బాగా తీయడంపై దృష్టి పెట్టడమే. ప్రస్తుతం ఈ వివాదం వల్ల సినిమాకు కొంత ఇబ్బంది కలిగిన మాట వాస్తవం. రేపు సినిమా బాగుంటే అన్నీ సర్దుకుంటాయి. ఇది ఒక ప్రాంతానికి పరిమితమయ్యే కథ కాదు. నాకు పూర్తి నమ్మకం ఉంది. దర్శకుడు వచ్చిన ప్రాంతం, చూసిన వాస్తవ సంఘటనల నుంచి రాసుకున్న కథ ఇది’’
సోషల్ మీడియాలో వస్తున్న విమర్శలకు స్పందిస్తూ బన్ని వాస్ కథల స్వభావం ప్రాంతానికీ, సంస్కృతికీ అనుసంధానమై ఉంటుందని, అదే సమయంలో మంచి కథ ఎక్కడైనా ఆడుతుందని పేర్కొన్నారు. హాలీవుడ్ చిత్రాలు ఇక్కడ ప్రేక్షకాదరణ పొందే ఉదాహరణను ఆయన ప్రస్తావించారు. ‘ఇడుపు కాయితం’ ప్రతి ఇంటిలో కనిపించే కుటుంబ సమస్యల నేపథ్యంలో సాగే కథ అని, క్లైమాక్స్ సమయంలో అత్తాకోడళ్లు, మామాఅల్లుళ్లు ఒకరినొకరు అర్థం చేసుకుని బయటకు వచ్చేలా కథ మలిచినట్టు వివరించారు.
‘‘ప్రాంతాన్ని బట్టి కథ ఉంటుందా? అంటే ఎక్కడో తీసిన హాలీవుడ్ మూవీ ఇక్కడ ఆడదు కదా! ఇది ప్రతి ఇంటిలో ఉండే కథ. క్లైమాక్స్కు వచ్చే సరికి అత్తాకోడళ్లు, మామాఅల్లుళ్లు ఒకరి చేయి ఒకరు పట్టుకుని బయటకు వస్తారు. సోషల్మీడియాలో పోస్టులు పెట్టే ముందు ఆలోచించాలి. విభేదాలు తీసుకురాకుండా జాగ్రత్తగా ఉండాలి. ప్రస్తుతం ఉన్న పరిస్థితుల్లో నటీనటులకు డైలీ రెమ్యునరేషన్స్ ఇచ్చి సినిమా చేయాలంటే కష్టం. అందుకే మేము కొత్త వాళ్లను ప్రోత్సహిస్తున్నాం. నా బడ్జెట్కి, నా పరిధిలోకి వచ్చే వారితోనే సినిమాలు చేస్తా’’
‘ఇడుపు కాయితం’ చిత్రంలో Priyadarshi, Nagadurga కీలక పాత్రలు పోషిస్తున్నారు. Vamsireddy Dondapati ఈ చిత్రానికి దర్శకుడు. కథకు అనుగుణంగా పెట్టిన టైటిల్పై వస్తున్న అభ్యంతరాల నేపథ్యంలో కూడా, చిత్ర బృందం తమ నిర్ణయంపై నిలబడుతున్నట్టు బన్ని వాస్ వ్యాఖ్యల ద్వారా స్పష్టమైంది.
ఇడుపు కాయితం అంటే విడాకుల పత్రం. భార్యాభర్తలు కలిసి బతకలేమని నిర్ణయించుకుని, పెద్దల సమక్షంలో కుదుర్చుకునే ఒప్పంద పత్రాన్ని సంప్రదాయంగా ఇడుపు కాయితం అని పిలుస్తారు. ప్రస్తుతం కోర్టుల ద్వారా విడాకులు సాధారణమైపోయినా, తెలంగాణలోని కొన్ని గ్రామీణ ప్రాంతాల్లో ఇప్పటికీ ఇడుపు కాయితం రాసుకొని విడిపోతున్న జంటలు ఉన్నాయని సినీ వర్గాలు చెబుతున్నాయి. ఈ సామాజిక నేపథ్యాన్ని ఆధారంగా చేసుకుని సినిమా రూపుదిద్దుకుంటోంది.
