రాయలసీమ న్యూస్, ఎంటర్‌టైన్‌మెంట్ డెస్క్:
బాలయ్య – కొరటాల శివ సినిమాలో పవర్ ఫుల్ విలన్‌గా రాజశేఖర్
నందమూరి బాలకృష్ణ వరుస విజయాలతో సూపర్ ఫామ్‌లో కొనసాగుతున్నాడు. ఇటీవల చేసిన సినిమాలు మంచి విజయాలు సాధించడంతో, ఆయన కొత్త ప్రాజెక్టులపై ప్రేక్షకుల్లో, అభిమానుల్లో భారీ ఆసక్తి నెలకొంది. ప్రస్తుతం దర్శకుడు గోపిచంద్ మలినేని దర్శకత్వంలో ఓ పూర్తి స్థాయి మాస్ యాక్షన్ చిత్రంలో బాలకృష్ణ నటిస్తున్నాడు. ‘పెద్ది’ నిర్మాత వెంకట్ సతీష్ కిలారు ఈ చిత్రాన్ని నిర్మిస్తున్నారు. దసరా లేదా సంక్రాంతి సందర్భంగా ఈ సినిమాను ప్రేక్షకుల ముందుకు తీసుకురావాలని చిత్రబృందం లక్ష్యంగా పెట్టుకున్నట్టు సమాచారం.
ఇదిలా ఉండగా, దర్శకుడు కొరటాల శివతో బాలకృష్ణ చేయబోయే కొత్త సినిమా కూడా అధికారికంగా రూపుదిద్దుకుంటోంది. గతంలో కొరటాల శివ రైటింగ్‌లో, బోయపాటి శ్రీను దర్శకత్వంలో బాలకృష్ణ హీరోగా వచ్చిన ‘సింహా’ చిత్రం భారీ విజయాన్ని సాధించి బిగ్గెస్ట్ బ్లాక్‌బస్టర్‌గా నిలిచింది. ఆ చిత్రంతో బాలకృష్ణ మాస్ ఇమేజ్‌కు కొత్త ఊపు వచ్చి, కొరటాల శివ రచయితగా మరింత గుర్తింపు తెచ్చుకున్నారు. అనంతరం కొరటాల శివ దర్శకుడిగా మారి స్టార్ డైరెక్టర్‌గా స్థిరపడ్డారు.
ఆ కాలం నుంచే బాలకృష్ణ – కొరటాల శివ కాంబినేషన్‌లో ఒక సినిమా రావాలని నందమూరి అభిమానులు ఆశపడుతూ వచ్చారు. చివరికి ఆ కలయిక ఇప్పుడు నిజం కానుంది. ‘ఎన్ బి కె 112’ అనే వర్కింగ్ టైటిల్‌తో ఈ ప్రాజెక్ట్‌ను ప్లాన్ చేస్తున్నట్టు సినీ వర్గాల్లో వార్తలు వినిపిస్తున్నాయి. త్వరలోనే ఈ చిత్రం సెట్స్‌పైకి వెళ్లే అవకాశాలు ఉన్నాయని టాక్.
ఈ చిత్రంలో ప్రధాన ప్రతినాయకుడి పాత్రకు సీనియర్ హీరో రాజశేఖర్‌ను ఎంపిక చేసినట్టు తాజా సమాచారం చెబుతోంది. రెండో ఇన్నింగ్స్ ప్రారంభించిన రాజశేఖర్ ఇటీవల ‘ఎక్స్ట్రా’, ‘బైకర్’ వంటి చిత్రాల్లో నటించారు. ఆ సినిమాల్లో ఆయన నటనకు మంచి ప్రశంసలు వచ్చినప్పటికీ, కెరీర్‌లో మరో పెద్ద బ్రేక్ మాత్రం రాలేదు.
ఇప్పుడు బాలకృష్ణ – కొరటాల శివ కాంబినేషన్‌లో వస్తున్న ఈ భారీ చిత్రంలో శక్తివంతమైన విలన్‌గా రాజశేఖర్ కనిపించబోతున్నారనే వార్త అభిమానుల్లో, సినీ వర్గాల్లో ఆసక్తిని రేకెత్తిస్తోంది. బాలయ్య మాస్ ఇమేజ్, కొరటాల శివ స్టోరీ టెల్లింగ్, రాజశేఖర్ విలన్ పాత్ర – ఈ మూడింటి కలయిక ఎలా ఉండబోతోందన్న దానిపై ఇప్పటికే ఊహాగానాలు మొదలయ్యాయి. అధికారిక ప్రకటన, మరిన్ని వివరాల కోసం అభిమానులు ఎదురుచూస్తున్నారు.
