రాయలసీమ న్యూస్, ఎంటర్టైన్మెంట్ డెస్క్: దక్షిణ భారత చలనచిత్ర పరిశ్రమలో ప్రతినాయకుడు, సహాయ నటుడిగా తనకంటూ ప్రత్యేక స్థానాన్ని సంపాదించుకున్న ప్రముఖ నటుడు సంపత్ రాజ్, తన సినీ ప్రయాణం, అనుభవాలు, భవిష్యత్ ప్రణాళికల గురించి ఇటీవల ఇచ్చిన ఒక ఇంటర్వ్యూలో ఆసక్తికర విషయాలు వెల్లడించారు. తెలుగు, తమిళ, కన్నడ, మలయాళ భాషల్లో విభిన్న పాత్రలు పోషిస్తూ ఆయన గుర్తింపు తెచ్చుకున్నారు. గంభీరమైన స్వరం, ప్రత్యేకమైన నటన శైలితో ఇండస్ట్రీలో తనదైన ముద్ర వేశారు. ముఖ్యంగా ప్రభాస్ హీరోగా వచ్చిన ‘మిర్చి’ చిత్రంలో ‘ఉమా’ అనే పవర్ఫుల్ విలన్ పాత్రతో ఆయనకు మంచి పేరు వచ్చింది.
తన కెరీర్ ప్రారంభ దశలో ఎదుర్కొన్న సవాళ్లను గుర్తు చేసుకుంటూ, విలన్ పాత్రలకు తనను ఎంపిక చేయడాన్ని కొందరు హీరోలు నిరాకరించారని సంపత్ రాజ్ తెలిపారు. తమతో సంపత్ రాజ్ను పోల్చలేమని భావించి కొన్ని ప్రాజెక్టులు చేజారిపోయాయని ఆయన వివరించారు. అయితే అలాంటి హీరోలు ఎవరో తనకు తెలియదని స్పష్టం చేశారు.
‘మిర్చి’ విజయానంతరం, భారీ విజయాన్ని సాధించిన ‘శ్రీమంతుడు’ చిత్రంలో మహేష్ బాబుతో కలిసి నటించే అవకాశం రావడం తన కెరీర్లో ఒక ముఖ్య మలుపుగా భావిస్తున్నట్లు చెప్పారు. ఈ చిత్ర దర్శకుడు కొరటాల శివ స్క్రిప్ట్ పూర్తయ్యగానే ఫోన్ చేసి, సినిమాలో తన పాత్రను కన్ఫామ్ చేసిన విషయాన్ని సంపత్ రాజ్ గుర్తు చేసుకున్నారు. ఈ అవకాశం తనకు ఎంతో ఆత్మవిశ్వాసాన్ని ఇచ్చిందని పేర్కొన్నారు.
మహేష్ బాబు నటన శైలిపై సంపత్ రాజ్ ప్రశంసలు కురిపించారు. మహేష్ సహజ నటుడు అని, సాధారణంగా మనం మాట్లాడినట్లుగానే ఆయన షాట్లోనూ నటిస్తారని, ఎలాంటి అతిశయ భావాలు ఉండవని అన్నారు. తెరపై మహేష్ ఆరా, లుక్స్, వ్యక్తిత్వం ఆయన నటనకు తోడై అద్భుతమైన ప్రభావాన్ని చూపుతాయని ఆయన అభిప్రాయపడ్డారు.
రచయిత, దర్శకుడు త్రివిక్రమ్ శ్రీనివాస్ పట్ల తనకున్న గౌరవాన్ని కూడా సంపత్ రాజ్ వెల్లడించారు. త్రివిక్రమ్ ఆలోచనా విధానం, ఆయన కూల్గా ఉండే తీరు తనకు ఎంతో నచ్చుతాయని చెప్పారు. త్రివిక్రమ్ సినిమాల్లో ఉండే అందమైన క్షణాలు, గూస్బంప్స్ తెప్పించే సన్నివేశాలు ఒక గొప్ప రచయితకే సాధ్యమని భావిస్తున్నట్లు తెలిపారు. అలాంటి రచయిత మైండ్సెట్ లోపలికి వెళ్లి ఎలా ఆలోచిస్తాడో తెలుసుకోవాలనే ఆసక్తి ఎప్పుడూ ఉంటుందని చెప్పారు.
త్రివిక్రమ్తో తన సొంత కథలను కూడా చర్చించేవాడినని సంపత్ రాజ్ తెలిపారు. ఒకసారి తన స్క్రిప్ట్లోని ఒక నాట్ను త్రివిక్రమ్ ఎంతో మెచ్చుకున్నారని, ఆ సన్నివేశం క్లైమాక్స్ను ఎలా పూర్తి చేస్తావని అడిగినప్పుడు తాను చెప్పిన ముగింపును విని త్రివిక్రమ్ ఆశ్చర్యపోయారని ఆయన గుర్తు చేసుకున్నారు.
ప్రస్తుతం తన వద్ద మూడు కథలు సిద్ధంగా ఉన్నాయని సంపత్ రాజ్ వెల్లడించారు. అందులో ఒకటి బలమైన మహిళా ప్రధాన కథ అని, ఆ కథలోని భావోద్వేగాలను బలంగా పండించగల నటి కోసం వెతుకుతున్నట్లు తెలిపారు. అది ఒక అమ్మ, కూతురు, తండ్రి మధ్య జరిగే కథ అని వివరించారు. తాను రచన, క్రియేటివ్ వైపు మాత్రమే ఉండాలని, దర్శకత్వం, నిర్మాణం మాత్రం ఇతరులు చూసుకుంటారని స్పష్టం చేశారు.
