రాయలసీమ న్యూస్, ఎంటర్‌టైన్‌మెంట్ డెస్క్: రాకింగ్ స్టార్ యష్ హీరోగా, గీతు మోహన్‌దాస్ దర్శకత్వంలో రూపొందుతున్న పాన్ ఇండియా చిత్రం ‘టాక్సిక్’ విడుదలకు ముందే భారీ అంచనాలను రేకెత్తిస్తోంది. ఈ సినిమాకు సంబంధించిన గ్లింప్స్, టీజర్, పాటలు వరుసగా విడుదలవుతుండగా, వాటి కంటెంట్‌పై సోషల్ మీడియాలో ఆసక్తికర చర్చ మొదలైంది.
ఇప్పటివరకు విడుదలైన ప్రమోషనల్ విజువల్స్‌లో రొమాన్స్, ఇంటిమేట్ సన్నివేశాలు, హై వోల్టేజ్ యాక్షన్ సీన్లు ఎక్కువగా ఉండటంపై నెటిజన్లు తమ అభిప్రాయాలను వ్యక్తం చేస్తున్నారు. ఇటీవల విడుదలైన ‘తబాహి’ పాటలో యష్, కియారా అద్వానీ మధ్య రొమాంటిక్ కెమిస్ట్రీ ప్రత్యేక ఆకర్షణగా నిలిచింది. ఆ పాటపై చర్చ కొనసాగుతుండగానే మరో సాంగ్ కూడా విడుదల కావడంతో, సినిమా ప్రమోషన్ మొత్తం రొమాన్స్, వైలెన్స్ చుట్టూ తిరుగుతోందనే కామెంట్లు సోషల్ మీడియాలో విస్తరించాయి.
ముఖ్యంగా లేడీ డైరెక్టర్ గీతు మోహన్‌దాస్ ఇంత బోల్డ్, ఇంటెన్స్ సన్నివేశాలను తెరకెక్కించడం ప్రేక్షకుల్లో ఆసక్తిని పెంచుతోంది. ‘కేజీఎఫ్: ఛాప్టర్ 2’ తర్వాత దాదాపు రెండేళ్ల విరామం తీసుకున్న యష్, గీతు మోహన్‌దాస్‌తో సినిమా ప్రకటించిన సమయంలో కొంతమంది అభిమానులు ఆశ్చర్యం వ్యక్తం చేసిన విషయం తెలిసిందే. అయితే ఇప్పుడు విడుదలైన ప్రమోషనల్ కంటెంట్ చూస్తుంటే, గీతు మోహన్‌దాస్ తన ప్రత్యేక శైలిని చూపిస్తున్నారని, యువతను ఆకర్షించే విధంగా ప్రచారాన్ని ప్లాన్ చేశారని సినీ వర్గాల్లో చర్చ నడుస్తోంది.
ఈ చిత్రంలో యష్ సరసన నయనతార, కియారా అద్వానీ, తారా సుతారియా, హుమా ఖురేషి, రుక్మిణి వసంత్ కీలక పాత్రల్లో నటిస్తున్నారు. ఇప్పటికే కియారా అద్వానీ, తారా సుతారియాపై చిత్రీకరించిన పాటలు విడుదలయ్యాయి. మిగిలిన హీరోయిన్లకు సంబంధించిన పాటలు కూడా త్వరలోనే రానున్నాయనే వార్తలతో అభిమానుల్లో ఆసక్తి పెరుగుతోంది.
అయితే ఒకే సినిమాలో ఇంతమంది హీరోయిన్లు, వరుసగా రొమాంటిక్ పాటలు ఉండటం కథకు ఎంతవరకు ఉపయోగపడుతుందనే ప్రశ్నలను కొందరు నెటిజన్లు లేవనెత్తుతున్నారు. రొమాన్స్, వైలెన్స్‌తో మంచి ఓపెనింగ్స్ రావొచ్చేమో కానీ, చివరకు సినిమా విజయాన్ని నిర్ణయించేది కథ, కథనం మాత్రమేనని వారి అభిప్రాయం.
మరోవైపు, యష్ గతంలో ఇచ్చిన ఒక ఇంటర్వ్యూలో కుటుంబ ప్రేక్షకులను దృష్టిలో పెట్టుకుని సినిమాలు చేయాలనే తన అభిప్రాయాన్ని వెల్లడించిన వ్యాఖ్యలను గుర్తు చేస్తూ, ఇప్పుడు ‘టాక్సిక్’ ప్రమోషన్లలో కనిపిస్తున్న బోల్డ్ కంటెంట్‌పై సోషల్ మీడియాలో కొందరు ప్రశ్నిస్తున్నారు.
“కుటుంబంతో కలిసి చూసే సినిమాలే చేయాలనుకుంటాను”
అయితే ఇవన్నీ ప్రేక్షకుల అభిప్రాయాలు, సోషల్ మీడియాలో జరుగుతున్న చర్చలే తప్ప, సినిమా అసలు స్వరూపం గురించి స్పష్టత ఇవ్వవని సినీ విశ్లేషకులు భావిస్తున్నారు. చిత్రం విడుదలైన తర్వాతే ఈ ప్రచారానికి ఎంతవరకు నిజం ఉందో తేలనుంది.
‘టాక్సిక్’ ఆగస్టు 26న పాన్ ఇండియా స్థాయిలో ప్రేక్షకుల ముందుకు రానుంది. రిలీజ్ తర్వాత ప్రస్తుతం సోషల్ మీడియాలో జరుగుతున్న ఈ చర్చలకు సమాధానం లభించే అవకాశం ఉంది.
