రాయలసీమ న్యూస్, ఇంటర్నేషనల్ డెస్క్: ఇంటర్నేషనల్ విమాన ప్రయాణికులు ఇకపై ఫిజికల్ బోర్డింగ్ పాస్ తీసుకెళ్లాల్సిన అవసరం లేదని కేంద్ర ప్రభుత్వం స్పష్టం చేసింది. స్మార్ట్ ఫోన్లలో ఉండే ఈ-బోర్డింగ్ పాస్ చూపిస్తే ప్రయాణానికి సరిపోతుందని వెల్లడించింది. ఈ మేరకు సంబంధిత శాఖలు, ఇమిగ్రేషన్ విభాగానికి సూచనలు జారీ చేసినట్లు అధికార వర్గాలు తెలియజేశాయి.
సెప్టెంబర్ 1 నుంచి బోర్డింగ్ పాస్పై స్టాంపింగ్ ప్రక్రియను పూర్తిగా ఎత్తివేయాలని ఇమిగ్రేషన్ అధికారులకు కేంద్రం ఆదేశాలు ఇచ్చింది. ఇప్పటివరకు ప్రయాణికులు చెక్-ఇన్ కౌంటర్ వద్ద బోర్డింగ్ పాస్ తీసుకుని, ఇమిగ్రేషన్ డెస్క్ వద్ద స్టాంప్ వేయించుకోవాల్సి వచ్చేది. కొత్త మార్పులతో ఈ దశ అవసరం లేకుండా పోనుంది.
ఈ నిర్ణయంతో ఇమిగ్రేషన్ క్లియరెన్స్ ప్రక్రియ మరింత సులభంగా, వేగంగా ఉండనుందని కేంద్రం భావిస్తోంది. ప్రయాణికులు క్యూలో గంటల తరబడి నిలబడి వేచి ఉండాల్సిన పరిస్థితి గణనీయంగా తగ్గే అవకాశం ఉందని అధికారులు సూచిస్తున్నారు. ఈ-బోర్డింగ్ పాస్ ఆధారంగా ఇమిగ్రేషన్ తనిఖీలు పూర్తి చేసి, ప్రయాణికులను త్వరగా క్లియర్ చేసే విధంగా వ్యవస్థను రూపొందిస్తున్నారు.
ఇప్పటికే దేశీయ విమానాల్లో ఈ-బోర్డింగ్ పాస్ వినియోగం విస్తృతంగా ఉంది. అదే విధానాన్ని ఇంటర్నేషనల్ ఫ్లైట్లకు కూడా విస్తరించేందుకు కేంద్రం ముందడుగు వేసింది. విమానాశ్రయాల్లో డిజిటల్ వ్యవస్థలను మరింత బలోపేతం చేస్తూ, ప్రయాణికుల సౌకర్యం, సమయాన్ని దృష్టిలో పెట్టుకుని ఈ నిర్ణయం తీసుకున్నట్లు సంబంధిత వర్గాలు పేర్కొంటున్నాయి.
ఇమిగ్రేషన్ కౌంటర్ల వద్ద సాఫ్ట్వేర్, స్కానింగ్ పరికరాలను అప్గ్రేడ్ చేస్తూ, ఈ-బోర్డింగ్ పాస్లను సులభంగా ధృవీకరించేలా ఏర్పాట్లు చేస్తున్నారు. ప్రయాణికులు తమ స్మార్ట్ ఫోన్లో ఉన్న ఈ-బోర్డింగ్ పాస్ను చూపించడం ద్వారా ఇమిగ్రేషన్ ప్రక్రియ పూర్తవుతుంది. అవసరమైతే ప్రింట్ తీసుకుని చూపించే అవకాశం కూడా ఉంటుంది.
సెప్టెంబర్ 1 నుంచి అమల్లోకి వచ్చే ఈ మార్పులతో ఇంటర్నేషనల్ విమానాశ్రయాల్లో క్యూలు తగ్గి, ప్రయాణికుల రద్దీని సమర్థంగా నిర్వహించగలమని అధికారులు ఆశాభావం వ్యక్తం చేస్తున్నారు. డిజిటల్ విధానాల ద్వారా విమాన ప్రయాణాన్ని మరింత సౌకర్యవంతంగా, వేగవంతంగా మార్చే దిశగా కేంద్రం తీసుకున్న మరో కీలక నిర్ణయంగా దీనిని భావిస్తున్నారు.
