రాయలసీమ న్యూస్, ఇంటర్నేషనల్ డెస్క్:
అమెరికా ఇంటెలిజెన్స్‌ అంచనా
పశ్చిమాసియాలో కొనసాగుతున్న ఉద్రిక్తతలు, అమెరికా–ఇరాన్‌ మధ్య కాల్పుల విరమణ నేపథ్యంలో హర్మూజ్‌ జలసంధి ప్రాధాన్యం మరింత పెరిగింది. చమురు రవాణాకు అత్యంత కీలకమైన ఈ జలసంధిపై ఇరాన్‌ తన నియంత్రణను గణనీయంగా పెంచుకుందని, దాన్ని తన ఇష్టానుసారం మూసివేసే స్థాయిలో సామర్థ్యం సాధించిందని అమెరికా ఇంటెలిజెన్స్‌ తాజా నివేదికలో పేర్కొన్నట్లు సమాచారం.
ఇంటెలిజెన్స్‌ వర్గాలను ఉటంకిస్తూ అమెరికా మీడియా పలు కథనాలు ప్రచురించింది. వాటి ప్రకారం, హర్మూజ్‌ జలసంధిపై ఇరాన్‌ ఆధిపత్యం ప్రపంచ ఆర్థిక వ్యవస్థను ఒప్పందాలకు అతీతంగా కూడా కుదేలు చేసే శక్తి కలిగిందని ఆ నివేదికలో అంచనా వేసినట్లు తెలుస్తోంది. గల్ఫ్‌ దేశాల ఇంధన మౌలిక వసతులపై దాడులను తనకు అనుకూలంగా ఎలా మలుచుకోవాలో ఇరాన్‌ గత కొంతకాలంగా నేర్చుకుందని, ఆ రంగంలో అమెరికా బలహీనత కూడా టెహ్రాన్‌కు అదనపు ఆయుధంగా మారిందని ఇంటెలిజెన్స్‌ విశ్లేషణలో పేర్కొన్నట్లు మీడియా తెలిపింది.
హర్మూజ్‌ జలసంధిపై ఇరాన్‌ నియంత్రణ, అణ్వాయుధం కంటే శక్తిమంతమైన వ్యూహాత్మక సాధనంగా మారిందని ఆ నివేదిక హెచ్చరించినట్లు వార్తలు వెలువడుతున్నాయి. అమెరికా–ఇరాన్‌ మధ్య జరుగుతున్న తాజా ఒప్పంద చర్చల్లో కూడా హర్మూజ్‌ అంశం కేంద్రబిందువుగా నిలిచింది. జలసంధిని పూర్తిగా తెరిచి ఉంచే విషయంలో టెహ్రాన్‌ను ఒప్పించేందుకు వాషింగ్టన్‌ తీవ్రంగా చర్చలు జరపాల్సి వచ్చిందని దౌత్య వర్గాలు సూచిస్తున్నాయి. దీనితో హర్మూజ్‌పై ఇరాన్‌ సాధించిన పట్టు ఎంత గట్టిదో స్పష్టమవుతోందని విశ్లేషకులు భావిస్తున్నారు.
ఇరుదేశాల మధ్య ఒప్పందాలపై సంతకాలు మరో రెండు రోజుల్లో జరగనున్న నేపథ్యంలో ఈ ఇంటెలిజెన్స్‌ రిపోర్ట్‌ బయటకు రావడం అంతర్జాతీయ వేదికపై చర్చనీయాంశంగా మారింది. చమురు సరఫరా భద్రత, గ్లోబల్‌ మార్కెట్ల స్థిరత్వం, గల్ఫ్‌ ప్రాంత భద్రతా సమీకరణలపై ఈ పరిణామాల ప్రభావం ఎలా ఉండబోతుందన్న దానిపై నిపుణులు వివిధ కోణాల్లో విశ్లేషణలు చేస్తున్నారు.
ఇరాన్‌ ఒప్పందంపై JD Vance వ్యాఖ్యలు
అమెరికా ఉపాధ్యక్షుడు JD Vance, ఇరాన్‌తో జరుగుతున్న ఒప్పందంపై కీలక వ్యాఖ్యలు చేశారు. ఇరాన్‌ వద్ద అణ్వాయుధం ఉండకూడదనేది తమ ప్రభుత్వానికి ప్రథమ లక్ష్యమని ఆయన స్పష్టం చేశారు. అలాగే హర్మూజ్‌ జలసంధిని పూర్తిగా తెరిచి ఉంచడం కూడా అత్యంత ప్రాధాన్యమున్న అంశమని పేర్కొన్నారు.
ఇరాన్‌ సముచితంగా వ్యవహరిస్తే, ఈ ఒప్పందం ద్వారా టెహ్రాన్‌కు అనేక ప్రయోజనాలు లభించే అవకాశం ఉందని JD Vance తెలిపారు. అయితే, ఆ ప్రయోజనాల స్వరూపం, వివరాల గురించి మాత్రం ఆయన వెల్లడించలేదు. ఇరాన్‌ సహకరించకపోతే, ఆ ప్రయోజనాలు దక్కవన్న సంకేతాలను ఇచ్చారు. అమెరికా–ఇరాన్‌ ఒప్పందం, హర్మూజ్‌ జలసంధి భవిష్యత్‌ స్థితిగతులపై ఆయన వ్యాఖ్యలు అంతర్జాతీయ వర్గాల్లో ఆసక్తిని రేకెత్తిస్తున్నాయి.
