రాయలసీమ న్యూస్, జాబ్స్ డెస్క్: ఆంధ్రప్రదేశ్ ప్రభుత్వం రెవెన్యూ శాఖను మరింత ఆధునికీకరించేందుకు కీలక నిర్ణయం తీసుకుంది. రాష్ట్రంలోని రెవెన్యూ డివిజన్ కేంద్రాలు (ఆర్‌డీఓ కార్యాలయాలు) మరియు భూపరిపాలన ప్రధాన కమిషనర్ (CCLA) కార్యాలయంలో పనిచేసేందుకు మొత్తం 53 ఇ-డివిజనల్ మేనేజర్ (e-Divisional Manager) పోస్టులను కాంట్రాక్ట్ ప్రాతిపదికన భర్తీ చేయాలని ప్రభుత్వం నిర్ణయించింది.

రెవెన్యూ శాఖలో డిజిటల్ సేవలను మరింత సమర్థవంతంగా అమలు చేయడం, భూ రికార్డుల నిర్వహణను బలోపేతం చేయడం, సాంకేతిక సమస్యలను వేగంగా పరిష్కరించడం వంటి లక్ష్యాలతో ఈ నిర్ణయం తీసుకున్నట్లు ప్రభుత్వం వెల్లడించింది. ఈ నియామకాల ద్వారా గత 15 నుంచి 20 సంవత్సరాలుగా రెవెన్యూ శాఖకు సాంకేతిక సేవలు అందిస్తున్న ఐటీ సిబ్బందికి అధికారిక గుర్తింపు లభించనుందని అధికార వర్గాలు సూచిస్తున్నాయి.

ఇప్పటి వరకు ప్రభుత్వ ముందస్తు అనుమతి లేకుండానే వివిధ స్థాయిల్లో సాంకేతిక సేవలు అందిస్తున్న ఈ సిబ్బందిని క్రమబద్ధీకరించాలన్న ఉద్దేశంతో భూపరిపాలన ప్రధాన కమిషనర్ CCLA ప్రభుత్వం ముందు ప్రతిపాదనలు ఉంచారు. ఈ ప్రతిపాదనలకు ప్రభుత్వం ఆమోదం తెలిపింది. అనంతరం రెవెన్యూ శాఖ ప్రత్యేక ప్రధాన కార్యదర్శి జి. సాయిప్రసాద్ అధికారిక ఉత్తర్వులు జారీ చేశారు.

రెవెన్యూ శాఖలో డిజిటల్ సేవల విస్తరణ, భూ రికార్డుల పారదర్శక నిర్వహణ, రీసర్వే ప్రక్రియల్లో సాంకేతికత వినియోగం వంటి అంశాల్లో ఈ కొత్త ఇ-డివిజనల్ మేనేజర్ పోస్టులు కీలక పాత్ర పోషించనున్నాయని భావిస్తున్నారు. ముఖ్యంగా భూ వివాదాల పరిష్కారం, రిజిస్ట్రేషన్ వ్యవస్థలో పారదర్శకత, భూములపై అక్రమ ఆక్రమణల నియంత్రణలో సాంకేతిక సేవల వినియోగం పెరగనుందని అధికారులు అంచనా వేస్తున్నారు.

ఇటీవల మంగళగిరి టీడీపీ కేంద్ర కార్యాలయంలో జులై 21న నిర్వహించిన ప్రజా వినతుల స్వీకరణ కార్యక్రమంలో మంత్రి అనగాని సత్యప్రసాద్, మారెడ్డి శ్రీనివాసరెడ్డిల నేతృత్వంలో ప్రజల నుంచి అర్జీలను స్వీకరించారు. మాజీ ఎమ్మెల్యే వల్లభనేని వంశీ అనుచరుడి భూ ఆక్రమణ, చీపురుపల్లిలో రూ.25 కోట్ల ప్రభుత్వ భూమి కబ్జా, జగ్గయ్యపేట సబ్ రిజిస్ట్రార్ మోసం మరియు రీసర్వే అక్రమాలపై బాధితులు ఫిర్యాదు చేశారు.

రాష్ట్రవ్యాప్తంగా భూ సంబంధిత సమస్యలు, రీసర్వే అక్రమాలు, రిజిస్ట్రేషన్ వ్యవస్థలో అవకతవకలపై వస్తున్న ఫిర్యాదుల నేపథ్యంలో రెవెన్యూ శాఖలో సాంకేతిక సేవలను బలోపేతం చేయడం అత్యవసరమని ప్రభుత్వం భావించినట్లు అధికార వర్గాలు పేర్కొంటున్నాయి. ఈ నేపథ్యంలోనే 53 ఇ-డివిజనల్ మేనేజర్ పోస్టుల భర్తీకి గ్రీన్ సిగ్నల్ ఇచ్చినట్లు తెలుస్తోంది.