రాయలసీమ న్యూస్, జాబ్స్ డెస్క్:

తెలంగాణ పోలీస్‌లో 7 వేల నియామకాలు:

ప్రభుత్వ ఆమోదం, త్వరలో నోటిఫికేషన్

తెలంగాణలోని నిరుద్యోగ యువతకు ప్రభుత్వం శుభవార్తను అందించింది. హోంశాఖ పరిధిలోని వివిధ విభాగాల్లో దాదాపు 7 వేల ఉద్యోగాల భర్తీకి రాష్ట్ర ప్రభుత్వం ఆమోదం తెలిపింది. పోలీస్, జైళ్లు, అగ్నిమాపకశాఖ, స్పెషల్ ప్రొటెక్షన్ ఫోర్స్ విభాగాల్లో ఈ నియామకాలు చేపట్టాలని నిర్ణయించింది.

హోంశాఖలో ఖాళీల భర్తీ కోసం గత కొద్దికాలంగా అభ్యర్థులు చేస్తున్న ఆందోళనలు, డిమాండ్ల నేపథ్యంలో ప్రభుత్వం ఈ నిర్ణయం తీసుకుంది. దీంతో ఖాకీ దుస్తులు ధరించాలని కలలుకంటున్న వేలాది మంది యువతకు ఇది పెద్ద ఊరటగా భావిస్తున్నారు.

ప్రభుత్వం ఈ నియామకాలను రెండు విడతల్లో చేపట్టనుంది. ఇందులో భాగంగా మొదటి విడతగా 5 వేల పోలీస్ పోస్టుల భర్తీకి సంబంధించిన అధికారిక ఉత్తర్వులు ఇప్పటికే జారీ అయ్యాయి. మిగిలిన 2 వేల పోస్టులు ఎస్పీఎఫ్, జైళ్లశాఖ, అగ్నిమాపకశాఖలకు సంబంధించినవిగా ఉండగా, వీటి కోసం ఒకటి రెండు రోజుల్లో ఉత్తర్వులు వెలువడనున్నట్లు అధికార వర్గాలు సూచిస్తున్నాయి.

ఈ ప్రక్రియ పూర్తయ్యిన వెంటనే, తెలంగాణ పోలీస్ నియామక మండలి అధికారిక ఉద్యోగ నోటిఫికేషన్ విడుదలకు సన్నాహాలు వేగవంతం చేసింది. అన్ని విభాగాల ఖాళీల వివరాలు, అర్హతలు, పరీక్షా విధానం వంటి అంశాలను ఖరారు చేసే పనిలో మండలి నిమగ్నమై ఉన్నట్లు సమాచారం. నోటిఫికేషన్ విడుదలకు మరో ఒకటి రెండు రోజులు పట్టే అవకాశం ఉన్నట్లు సూచనలు వెలువడుతున్నాయి.

ప్రభుత్వం జారీ చేసిన జీవో ప్రకారం, 5 వేల పోలీస్ ఉద్యోగాల్లో అత్యధికంగా 3,697 సివిల్ కానిస్టేబుల్ పోస్టులు ఉన్నాయి. అదనంగా 1,052 ఏఆర్ కానిస్టేబుల్ పోస్టులు భర్తీ చేయనున్నారు. అలాగే 148 సివిల్ ఎస్సై, 24 ఎస్ఏఆర్ సీపీఎల్ కానిస్టేబుల్, 23 ఫింగర్‌ప్రింట్ బ్యూరో ఏఎస్సై, 20 కానిస్టేబుల్ పీటీఓ, 14 ఏఆర్ ఎస్సై, 12 టీజీఎస్పీ ఏఆర్ ఎస్సై, 7 కానిస్టేబుల్ పీటీఓ, 3 ఎస్ఏఆర్ సీపీఎల్ ఎస్సై పోస్టులు కూడా ఈ నియామకాల్లో భాగంగా ఉన్నాయి.

తెలంగాణ ప్రత్యేక రాష్ట్రంగా ఏర్పడిన తర్వాత హోంశాఖలో ఇది నాలుగో అతిపెద్ద నియామక నోటిఫికేషన్‌గా నిలవనుంది. 2015లో మొదటిసారిగా 9,281 పోస్టులతో నోటిఫికేషన్ విడుదల కాగా, 2018లో 1,217 ఎస్సై, 16,285 కానిస్టేబుల్ పోస్టుల భర్తీకి రెండో నోటిఫికేషన్ వచ్చింది. అనంతరం 2022లో 554 ఎస్సై, 15,644 కానిస్టేబుల్ పోస్టులను భర్తీ చేశారు.

ఇప్పుడు రాబోయే 7 వేల పోస్టుల నోటిఫికేషన్ కూడా అభ్యర్థులకు మరో కీలక అవకాశంగా మారనుందని ఉద్యోగార్థులు భావిస్తున్నారు. ఖచ్చితమైన షెడ్యూల్, పరీక్షా తేదీలు, దరఖాస్తు విధానం వంటి వివరాలు త్వరలో వెలువడే అధికారిక నోటిఫికేషన్‌లో వెల్లడికానున్నాయి.