రాయలసీమ న్యూస్, కర్నూలు: కర్నూలు జిల్లా మంత్రాలయం నియోజకవర్గం కౌతారం మండలం బదెనేహళ్ గ్రామంలో మాల గంగమ్మ కుటుంబాన్ని వైయస్ఆర్ కాంగ్రెస్ పార్టీ నేతల బృందం పరామర్శించింది. ఇటీవల మాల గంగమ్మ మృతి నేపథ్యంలో ఆమె కుటుంబ సభ్యులకు ధైర్యం చెప్పేందుకు పార్టీ నాయకులు గ్రామానికి వెళ్లారు.
ఈ పరామర్శ కార్యక్రమంలో మాజీ మంత్రి మేరుగు నాగార్జున, వైయస్ఆర్ సీపీ ఎస్సీ సెల్ రాష్ట్ర అధ్యక్షుడు టీజేఆర్ సుధాకర్ బాబు, ఎస్సీ సెల్ రాష్ట్ర వర్కింగ్ ప్రెసిడెంట్ కొమ్మూరి కనకారావు, కర్నూలు జిల్లా ఎస్సీ సెల్ అధ్యక్షుడు వెంకటేశ్ళర్లు, జిల్లా ఉపాధ్యక్షుడు అవతారం, యాట ఓబులేష్ తదితరులు పాల్గొన్నారు. మాల గంగమ్మ కుటుంబ సభ్యులతో మాట్లాడి వారి సమస్యలను తెలుసుకున్నారు.
మాల గంగమ్మ మృతి పోలీసుల వేధింపుల వల్ల జరిగిందనే అభిప్రాయాన్ని వైయస్ఆర్ కాంగ్రెస్ పార్టీ నేతలు వ్యక్తం చేశారు. ఆమె కొడుకు ఆచూకీ కోసం కోర్టు మెట్లెక్కిన నేపథ్యంలోనే పోలీసులు కక్ష సాధింపు చర్యలకు దిగారని వారు ఆరోపించారు. కోర్టు ద్వారా న్యాయం కోసం ప్రయత్నించిన కుటుంబాన్ని లక్ష్యంగా చేసుకుని, ఆధారాలు లేకుండా చేయాలనే ఉద్దేశంతో పోలీసులు వేధింపులకు పాల్పడ్డారని నాయకులు విమర్శించారు.
ఇటీవలి కాలంలో పోలీసుల వేధింపుల కారణంగా చోటుచేసుకున్న మరణ సంఘటనలపై సమగ్ర విచారణ జరగాలని వారు డిమాండ్ చేశారు. ముఖ్యంగా మాల గంగమ్మ మృతి సహా ఇటువంటి అన్ని కేసులను స్వతంత్ర సంస్థ ద్వారా విచారించాలని, ఇందుకోసం సీబీఐ దర్యాప్తు అవసరమని నాయకులు అభిప్రాయపడ్డారు.
పోలీసుల అధికారం దుర్వినియోగం, సామాన్య ప్రజలపై జరుగుతున్న అన్యాయాలపై ప్రభుత్వం దృష్టి సారించాలని, బాధ్యులైన అధికారులపై కఠిన చర్యలు తీసుకోవాలని వారు కోరారు. మాల గంగమ్మ కుటుంబానికి న్యాయం జరిగే వరకు తమ పోరాటం కొనసాగుతుందని పార్టీ నేతలు స్పష్టం చేశారు.
