రాయలసీమ న్యూస్, కర్నూలు: కర్నూలు నగరంలో ‘తల్లికి వందనం’ పథకం నిధులను అక్రమంగా ఏటీఎంల ద్వారా డ్రా చేసిన మోసం కేసులో నిందితులను అరెస్టు చేసి, నగదు, ఏటీఎం కార్డులను స్వాధీనం చేసుకున్న వన్‌టౌన్ పోలీసుల చర్యలకు వైఎస్సార్సీపీ నాయకత్వం అభినందనలు తెలిపింది. ఉచిత సిమ్ కార్డుల పేరుతో ప్రజలను మోసగించి, వారి ఆధార్ వివరాలు, బయోమెట్రిక్‌లను వినియోగించి పథకం నిధులను దోచుకున్న ఘటనపై బాధితుల తరఫున పార్టీ ప్రతినిధులు స్పందించారు.
ఈ కేసు నేపథ్యంలో వైఎస్సార్సీపీ కర్నూలు నగర అధ్యక్షులు శ్రీ అహ్మద్ అలీ ఖాన్, వన్‌టౌన్ సీఐ శ్రీ మారుతి శంకర్‌ను నిన్న కలసి మాట్లాడారు. బాధితుల నుంచి అక్రమంగా తీసుకున్న మొత్తం నగదును పూర్తిగా రికవరీ చేసి, ప్రతి బాధితునికి న్యాయం జరిగేలా చర్యలు తీసుకోవాలని ఆయన పోలీసు అధికారులను కోరారు.
కేసు నమోదు అయిన వెంటనే త్వరితగతిన స్పందించి, దర్యాప్తు జరిపి, నిందితులను అరెస్టు చేసిన వన్‌టౌన్ సీఐ శ్రీ మారుతి శంకర్, అలాగే కేసు ఛేదనలో పాల్గొన్న పోలీసు సిబ్బందికి ప్రత్యేక ధన్యవాదాలు తెలియజేస్తున్నట్లు వైఎస్సార్సీపీ నగర నాయకత్వం పేర్కొంది.
ఈ సందర్భంగా ప్రజల భద్రత, ఆర్థిక రక్షణపై అవగాహన పెంచాల్సిన అవసరాన్ని శ్రీ అహ్మద్ అలీ ఖాన్ ప్రస్తావించారు. ఉచిత సిమ్ కార్డులు, ప్రభుత్వ పథకాలు, నగదు లాభాలు లేదా ఇతర ప్రలోభాల పేరుతో ఎవరైనా ఆధార్ కార్డు, బయోమెట్రిక్ వేలిముద్రలు, ఓటీపీలు, బ్యాంకు వివరాలు కోరినప్పుడు అత్యంత అప్రమత్తంగా ఉండాలని ఆయన సూచించారు.
తెలియని వ్యక్తులకు ఎట్టి పరిస్థితుల్లోనూ వ్యక్తిగత పత్రాలు, బ్యాంకు సంబంధిత వివరాలు ఇవ్వకూడదని, ఇలాంటి మోసగాళ్ల వలలో పడకుండా ప్రతి ఒక్కరూ జాగ్రత్తగా ఉండాలని ప్రజలను ఆయన కోరారు. సాంకేతికతను వినియోగించే ఆర్థిక మోసాలు పెరుగుతున్న నేపథ్యంలో, పోలీసు శాఖ చర్యలకు తోడు ప్రజల అప్రమత్తత కూడా అత్యంత కీలకమని ఆయన అభిప్రాయపడ్డారు.
