రాయలసీమ న్యూస్, కర్నూలు:
సీఎం చంద్రబాబు పర్యటనకు కట్టుదిట్టమైన ఏర్పాట్లు చేయాలి: రాయలసీమ రేంజ్ డీఐజీ ఆదేశం
మైసూరు కంపెనీ సందర్శనార్థం ఈ నెల 24న ముఖ్యమంత్రి చంద్రబాబు జిల్లాకు రానున్న నేపథ్యంలో పర్యటనను విజయవంతం చేయడానికి అవసరమైన అన్ని ఏర్పాట్లు చేయాలని రాయలసీమ రేంజ్ డీఐజీ డాక్టర్ కోయ ప్రవీణ్ పోలీసు అధికారులకు ఆదేశాలు జారీ చేశారు.
మంగళవారం తుగ్గలి మండల పరిధిలోని జొన్నగిరి గ్రామ శివారులో ఉన్న జియో మైసూర్ గోల్డ్ మైన్స్ కంపెనీని డీఐజీ ప్రత్యక్షంగా పరిశీలించారు. ముందుగా ముఖ్యమంత్రి హెలికాప్టర్ దిగే హెలిప్యాడ్ ప్రాంతాన్ని ఆయన పరిశీలించి, భద్రతా ఏర్పాట్లపై అధికారులతో చర్చించారు. అనంతరం ఏర్పాటు చేయనున్న బహిరంగ సభ ప్రదేశాన్ని సందర్శించి, రాకపోకల సౌకర్యాలు, ప్రజల రద్దీ, వాహనాల నిలిపివేత వంటి అంశాలపై సూచనలు ఇచ్చారు.
సీఎం చంద్రబాబు పర్యటనలో ఎలాంటి లోపం లేకుండా కట్టుదిట్టమైన బందోబస్తు ఉండేలా చర్యలు తీసుకోవాలని డీఐజీ స్పష్టం చేశారు. పర్యటనకు ముందు, పర్యటన సమయంలో ఎలాంటి అవాంఛనీయ ఘటనలు చోటుచేసుకోకుండా అన్ని విభాగాలు సమన్వయంతో పనిచేయాలని ఆయన సూచించారు. ముఖ్యంగా రూట్మ్యాప్, ట్రాఫిక్ నియంత్రణ, వీఐపీ భద్రత, జనసమూహ నియంత్రణపై ప్రత్యేక దృష్టి పెట్టాలని సంబంధిత అధికారులకు ఆదేశాలు ఇచ్చారు.
ప్రాంతంలో ఎవరైనా అసాంఘిక కార్యకలాపాలకు పాల్పడుతున్నట్లయితే వారిని ముందస్తుగా గుర్తించి, చట్టపరమైన చర్యలు తీసుకోవాలని డీఐజీ పోలీసు అధికారులను ఆదేశించారు. పర్యటన సమయంలో చిన్నపాటి నిర్లక్ష్యానికి కూడా తావు ఇవ్వకుండా ప్రతి అంశాన్ని సూక్ష్మంగా పరిశీలించాలని ఆయన సూచించినట్లు సమాచారం.
ఈ పరిశీలన కార్యక్రమంలో డీఐజీ డాక్టర్ కోయ ప్రవీణ్తో పాటు డీఎస్పీ వెంకట్రామయ్య, రూరల్ సీఐ పులిశేఖర్, ఎస్ఐ మల్లికార్జున, జియో మైసూర్ గోల్డ్ మైన్స్ కంపెనీ ప్రతినిధులు పాల్గొన్నారు. ముఖ్యమంత్రి పర్యటనకు ముందు మరికొన్ని సమీక్షా సమావేశాలు నిర్వహించి, ఏర్పాట్ల పురోగతిని పరిశీలించే అవకాశం ఉన్నట్లు అధికార వర్గాలు తెలిపాయి.
