రాయలసీమ న్యూస్, మూవీ రివ్యూస్ డెస్క్: వరుస పరాజయాల తర్వాత బలమైన పునరాగమనానికి ఎదురుచూస్తున్న వరుణ్‌తేజ్ కథానాయకుడిగా నటించిన తాజా చిత్రం ‘కొరియన్ కనకరాజు’ శుక్రవారం ప్రేక్షకుల ముందుకు వచ్చింది. మేర్లపాక గాంధీ దర్శకత్వం వహించిన ఈ హారర్ కామెడీకి ముందుగానే విడుదలైన ప్రచార చిత్రాలు, ట్రైలర్ మంచి బజ్ తీసుకువచ్చాయి. ఆ అంచనాలకు సినిమా ఎంతవరకు న్యాయం చేసింది? వరుణ్‌తేజ్‌కు ఇది విజయాన్ని అందిస్తుందా అన్న ఆసక్తి నెలకొంది.
అనంతపురం జిల్లా పెనుగొండకు చెందిన కనకరాజు (వరుణ్‌తేజ్) చెక్క భజన ప్రదర్శనలు ఇస్తూ వచ్చిన డబ్బుతో కుటుంబాన్ని పోషిస్తుంటాడు. కిష్టప్ప (సత్య) అతని ఆప్తస్నేహితుడు. చెంగారెడ్డి (సునీల్) గ్యాంగ్‌తో చిన్న చిన్న గొడవలతో రోజులు గడుపుతుంటాడు. ఊరికి సమీపంలో ఉన్న Kia కార్ ఫ్యాక్టరీలో పనిచేసే ఛైత్ర (రితికా నాయక్)ను చూసి ప్రేమలో పడతాడు. ఇదిలా ఉండగా కొరియా నుంచి వచ్చిన ఒక వస్తువు కారణంగా ఓ ఆత్మ కనకరాజు శరీరంలోకి ప్రవేశిస్తుంది. ఆ తర్వాత అతని చూపులు, చేష్టలు భయంకరంగా మారిపోతాయి. ఆ ఆత్మ కోరికలు తెలుసుకున్న కనకరాజు, తన స్నేహితుడితో కలిసి కొరియా వెళ్లాల్సి వస్తుంది. ఆ ఆత్మ ఎవరిది? కొరియాలో ఏమి జరుగుతుంది? కనకరాజు తిరిగి వస్తాడా? ఆత్మ నుంచి విముక్తి పొందుతాడా? అనేదే మిగతా కథ.
సినిమా నుంచి ప్రేక్షకులు ఏం ఆశించవచ్చో ట్రైలర్‌దశలోనే స్పష్టం చేశారు చిత్రబృందం. నవ్వించడమే లక్ష్యంగా చేసిన సినిమా అని వేదికలపై తారాగణం చెప్పినట్టుగానే దర్శకుడు కూడా అదే దిశగా నడిచాడు. యాక్షన్, హారర్, కామెడీ మేళవించిన కథతో ఎప్పటికప్పుడు ఆసక్తిని రేకెత్తించే ప్రయత్నం చేశారు. కథ పరంగా కొత్తదనం పెద్దగా లేకపోయినా ఇండో–కొరియన్ నేపథ్యం కారణంగా సినిమా సెట్టింగ్ మాత్రం భిన్నంగా అనిపిస్తుంది. గ్యాంగ్‌స్టర్లతో ముడిపడిన కథ కావడంతో మాస్ ప్రేక్షకులకు నచ్చే అంశాలూ కలిశాయి.
ఆరంభంలో పాట, ఫైట్ వరకు సినిమా సాదాసీదాగా సాగుతుంది. కథానాయిక ఎంట్రీ తర్వాత నుంచే సరదా మొదలవుతుంది. బార్‌లో కొరియన్ యువకుడితో కలిసి కనకరాజు, కిష్టప్ప చేసే హంగామా, అక్కడ పండే నవ్వులు సినిమాను ట్రాక్‌లో పెడతాయి. ఆ తర్వాత ఆత్మ ప్రవేశించే సన్నివేశాలు, పోరాట ఘట్టాలు, పెంపుడు కుక్క చుట్టూ సాగే డ్రామా సినిమాకు వేగం తెస్తాయి. కొరియా గ్యాంగ్స్, యాక్షన్‌తో కూడిన ఇంటర్వెల్ బ్లాక్ ఆసక్తికరంగా ఉంటుంది.
ఆత్మల కథల్లో లాజిక్ కంటే అవి సృష్టించే మేజిక్‌నే ప్రధానంగా తీసుకుంటారు. ఈ చిత్రంలోనూ లాజిక్‌కు అందని సన్నివేశాలు చాలానే ఉన్నా, వాటిపై ఆలోచించేలోపే వచ్చే కామెడీ సన్నివేశాలు ప్రేక్షకులను నవ్విస్తాయి. కథానాయకుడిలోకి ఆత్మ ప్రవేశించే ప్రతీసారి థియేటర్‌లో నవ్వులు పండుతుంటాయి. ద్వితీయార్థంలోనూ హాస్య మోతాదు తగ్గకుండా చూసుకున్నారు. వీడియోకాల్‌లో క్షుద్రపూజల ఎపిసోడ్ సినిమాకే హైలైట్‌గా నిలుస్తుంది. సత్య, మురళీధర్ గౌడ్ కలిసి కనిపించే ప్రతీసారి హాస్యమే హాస్యం. అయితే క్లైమాక్స్ సన్నివేశాలు మాత్రం బలవంతంగా అనిపిస్తాయి. ఆత్మలు తలపడే భాగం అంతగా ఆకట్టుకోదు. మొత్తానికి హాస్యం కోసం చూడాల్సిన సినిమా అన్న ముద్ర పడుతుంది.
రెండు కోణాల్లో సాగే కనకరాజు పాత్రతో వరుణ్‌తేజ్ నటన బాగా మెరిసింది. లుక్ పరంగా కూడా కొత్తగా కనిపించాడు. కామెడీ టైమింగ్ బాగుంది. సత్యతో అతని కెమిస్ట్రీ బాగా పని చేసింది. ఈ సినిమాకి సత్య మరో హీరో అన్నట్టే. అతని పంచ్‌లు, వివిధ కథానాయకులను అనుకరిస్తూ చెప్పే సంభాషణలు ఆకట్టుకుంటాయి. మురళీధర్ గౌడ్‌తో కలిసి చేసిన కామెడీ కడుపుబ్బా నవ్విస్తుంది. చెంగారెడ్డి పాత్రలో సునీల్ విలనిజం ప్రదర్శించాడు. కథానాయిక రితికా నాయక్ దాదాపు మొత్తం సినిమా అంతా కనిపిస్తూ తన వంతు న్యాయం చేసింది. దక్ష నాగార్కర్ రాస గుమ్మడి పాటలో మెరిసింది. ఇతర నటులు తమ తమ పాత్రల పరిధిలో బాగానే నటించారు.
సాంకేతికంగా చూస్తే ఎస్‌.ఎస్‌.తమన్ అందించిన నేపథ్య సంగీతం సినిమాకు మంచి బలం. యాక్షన్, హారర్, కామెడీ మూడింటికీ తగినట్టు స్కోర్ ఇచ్చాడు. మనోజ్‌రెడ్డి సినిమాటోగ్రఫీ విజువల్స్ ఆకట్టుకునేలా ఉన్నాయి. నిర్మాణ విలువలు ఉన్నతంగా కనిపిస్తాయి. కథ, కథనాల కంటే హాస్య సన్నివేశాల రచనపై ఎక్కువ దృష్టిపెట్టిన మేర్లపాక గాంధీ, నవ్వించే సందర్భాలు సృష్టిస్తూ కథను నడిపించడంలో విజయవంతమయ్యారు. సంభాషణలు చాలాచోట్ల పేలాయి.
మొత్తానికి ‘కొరియన్ కనకరాజు’లో బలాలు – హాస్యం, కొరియా నేపథ్యం, రెండు కోణాల్లోని వరుణ్‌తేజ్ పాత్ర, సత్య–మురళీధర్ గౌడ్ కామెడీ. బలహీనతలు – లాజిక్ లేని సన్నివేశాలు, క్లైమాక్స్ భాగం. హారర్ కామెడీ జానర్‌ను, థియేటర్‌లో గుంపుగా కూర్చొని నవ్వుకోవడాన్ని ఇష్టపడే ప్రేక్షకులకు ఈ చిత్రం సరదా ఎంటర్‌టైనర్‌గా అనిపించే అవకాశం ఉంది.
రేటింగ్ 2.5/5
గమనిక: ఈ సమీక్ష సమీక్షకుడి దృష్టికోణానికి సంబంధించినది. ఇది సమీక్షకుడి వ్యక్తిగత అభిప్రాయం మాత్రమే
