రాయలసీమ న్యూస్, నేషనల్ డెస్క్: మత మార్పిడికి సంబంధించి షెడ్యూల్డ్ కులాల (SC) హోదా అంశంపై సుప్రీంకోర్టు మరోసారి కీలక నిర్ణయం వెలువరించింది. హిందూ, సిక్కు లేదా బౌద్ధ మతాలు కాకుండా ఇతర మతాల్లోకి మారిన వ్యక్తులు ఎస్సీ హోదాను కొనసాగించలేరని సర్వోన్నత న్యాయస్థానం స్పష్టం చేసింది. ఈ విషయంపై మార్చి 2026లో ఇచ్చిన తీర్పును పునఃసమీక్షించాలని కోరుతూ దాఖలైన రివ్యూ పిటిషన్‌ను ధర్మాసనం తిరస్కరించింది.
కోర్టు స్పష్టం చేసిన ప్రకారం క్రైస్తవ మతంలోకి మారిన వ్యక్తికి ఎస్సీ హోదా వర్తించదు. ఈ అంశంపై ఇప్పటికే ఇచ్చిన తీర్పులో ఎలాంటి మార్పు అవసరం లేదని పేర్కొంటూ రివ్యూ పిటిషన్‌ను కొట్టివేసింది. దీంతో మార్చి 2026లో వెలువడిన తీర్పు యథాతథంగా అమల్లో కొనసాగుతుందని ధర్మాసనం తేల్చింది.
అయితే క్రైస్తవం లేదా ఇతర మతాల్లోకి మారిన వ్యక్తి తిరిగి హిందూ, సిక్కు లేదా బౌద్ధ మతాన్ని స్వీకరించిన సందర్భంలో ఎస్సీ హోదా పునరుద్ధరణకు అవకాశం ఉంటుందని సుప్రీంకోర్టు పేర్కొంది. అయితే అది కొన్ని నిర్దిష్ట షరతులపై మాత్రమే సాధ్యమని ధర్మాసనం స్పష్టం చేసింది.
ఎస్సీ హోదా పునరుద్ధరణకు మూడు కీలక షరతులు తప్పనిసరిగా నెరవేరాలని కోర్టు పేర్కొంది. మొదటిగా, సంబంధిత వ్యక్తి జన్మతః షెడ్యూల్డ్ కులానికి చెందినవారై ఉండాలి. రెండవది, తిరిగి హిందూ, సిక్కు లేదా బౌద్ధ మతాన్ని నిజమైన ఉద్దేశంతో, ఆచరణలో స్వీకరించి ఉండాలి. మూడవది, సంబంధిత అసలు కులం ఆ వ్యక్తిని తిరిగి తమ సభ్యుడిగా అంగీకరించి ఉండాలి.
ఈ మూడు షరతుల్లో ఏ ఒక్కటి నెరవేరకపోయినా ఎస్సీ హోదాను పునరుద్ధరించడం సాధ్యం కాదని సుప్రీంకోర్టు స్పష్టం చేసింది. మత మార్పిడి అనంతరం తిరిగి పూర్వ మతంలోకి చేరిన వ్యక్తుల ఎస్సీ హోదా అంశంపై భవిష్యత్తులో తలెత్తే వివాదాలకు ఈ తీర్పు మార్గదర్శకంగా నిలవనుంది.
ఆంధ్రప్రదేశ్‌కు చెందిన ఒక కేసులో హైకోర్టు ఇచ్చిన తీర్పును సుప్రీంకోర్టు సమర్థించింది. ఆ కేసు సందర్భంలోనే ఎస్సీ హోదా, మత మార్పిడి, తిరిగి మత స్వీకరణ వంటి అంశాలపై విస్తృతంగా పరిశీలించిన ధర్మాసనం, మార్చి 2026లో ఇచ్చిన తన తీర్పు సరైనదేనని మరోసారి ధృవీకరించింది. రివ్యూ పిటిషన్‌ను తిరస్కరించడం ద్వారా ఆ తీర్పు అమలు కొనసాగుతుందని స్పష్టం చేసింది.
