రాయలసీమ న్యూస్, ఎంటర్టైన్మెంట్ డెస్క్: ఒకప్పుడు తెలుగు చిత్రసీమలో స్టార్ హీరోగా ప్రత్యేక గుర్తింపు తెచ్చుకున్న నటుడు అర్జున్ సర్జా, ఇటీవలి కాలంలో ఎక్కువగా కన్నడ చిత్ర పరిశ్రమకే పరిమితమయ్యారు. అయితే తాజాగా ఆయన నటించిన తాజా తమిళ చిత్రం ‘బ్లాస్ట్’తో మళ్లీ ప్రేక్షకుల ముందుకు వచ్చారు. ప్రస్తుతం ఈ చిత్రం థియేటర్లలో విజయవంతంగా ప్రదర్శితమవుతోంది.
రిలీజ్కి ముందు పెద్దగా ప్రచారం లేకపోయినా, విడుదలైన తర్వాత మౌత్ టాక్ బలంతో బాక్సాఫీస్ వద్ద ఈ చిత్రం మంచి వసూళ్లు రాబడుతోంది. థ్రిల్లర్ జానర్లో వచ్చిన ఈ సినిమా ఇప్పటివరకు ప్రపంచవ్యాప్తంగా సుమారు రూ.70 కోట్లకు పైగా వసూళ్లు సాధించినట్లు ట్రేడ్ వర్గాలు చెబుతున్నాయి. ఈ చిత్రంతో సుభాష్ కె రాజ్ దర్శకుడిగా పరిచయం అయ్యారు.
థియేటర్లలో విజయవంతంగా ప్రదర్శితమవుతున్న ఈ సినిమా ఇప్పుడు ఓటీటీ ప్రేక్షకులను ఆకట్టుకునేందుకు సిద్ధమవుతున్నట్టు సమాచారం. ఈ నెల 25వ తేదీ నుంచే ‘బ్లాస్ట్’ చిత్రం Netflix వేదికగా స్ట్రీమింగ్కు రానుందనే పోస్టర్లు సోషల్ మీడియాలో వైరల్ అవుతున్నాయి. తమిళంతో పాటు తెలుగు, కన్నడ, మలయాళం, హిందీ భాషల్లో కూడా ఈ చిత్రం డిజిటల్ వేదికపై అందుబాటులోకి రానున్నట్టు ప్రచారం జరుగుతోంది.
అయితే ఈ విషయంపై సంబంధిత ఓటీటీ సంస్థ నుంచి ఇంకా అధికారిక ప్రకటన వెలువడలేదు. సోషల్ మీడియాలో ప్రచారంలో ఉన్న పోస్టర్లపై చిత్రబృందం, ప్లాట్ఫాం తరఫున త్వరలోనే స్పష్టత వచ్చే అవకాశముందని సినీ వర్గాలు అంచనా వేస్తున్నాయి.
సుభాష్ కె రాజ్ దర్శకత్వంలో రూపొందిన ఈ యాక్షన్ థ్రిల్లర్లో అర్జున్ సర్జా, అభిరామి, ప్రీతి ముకుందన్ కీలక పాత్రలు పోషించారు. కుటుంబ నేపథ్యంతో సాగే ఈ కథలో కరాటే మాస్టర్లైన తండ్రి, తల్లి, కుమార్తె జీవితాల్లో చోటుచేసుకునే సంఘటనల చుట్టూ కథ తిరుగుతుంది.
కథ ప్రకారం నీల (ప్రీతి ముకుందన్), ఆమె తండ్రి రాజారామ్ (అర్జున్ సర్జా), తల్లి (అభిరామి) ముగ్గురూ కరాటే మాస్టర్లే. వీరు కరాటే ట్రైనింగ్ సెంటర్తో పాటు ఒక మెడికల్ షాప్ కూడా నడుపుతుంటారు. ఒక రోజు నీల షాప్లో ఉన్న సమయంలో కృపాకర్ (పవన్) గ్యాంగ్కు చెందిన ఓ రౌడీ ఆమెను బెదిరిస్తూ కొన్ని మందులు దోచుకెళ్లేందుకు ప్రయత్నిస్తాడు. ఆ సమయంలో నీల అతనికి చావుదెబ్బలు కొట్టి పోలీసులకు అప్పగిస్తుంది. ఈ ఘటనతో ఆ రౌడీ జైలుపాలవుతాడు.
అయితే ఈ అరెస్ట్ తర్వాత కృపాకర్ గ్యాంగ్తో పాటు మోస్ట్ వాంటెడ్ క్రిమినల్ అబ్రహం (అర్జున్ చిదంబరం) నీల కుటుంబంపై ప్రతీకారం తీర్చుకోవాలని ప్రయత్నిస్తారు. తమను నాశనం చేయడానికి వచ్చిన శత్రువులను నీల కుటుంబం ఎలా ఎదుర్కొంది? ఆ పోరాటంలో ఎలాంటి మలుపులు వచ్చాయి? అనేదే మిగతా కథ. థియేటర్లలో విజయవంతంగా దూసుకెళ్తున్న ఈ చిత్రం, ఓటీటీ వేదికపై ఎప్పుడు, ఏ భాషల్లో అందుబాటులోకి వస్తుందనే ఆసక్తి ప్రేక్షకుల్లో నెలకొంది.
