రాయలసీమ న్యూస్, మూవీ రివ్యూస్ డెస్క్: చిత్రం: రణబాలి; నటీనటులు: విజయ్ దేవరకొండ, రష్మిక, ఆర్నాల్డ్ ఓస్లూ, ఈశ్వరీరావు తదితరులు; సంగీతం: అజయ్-అతుల్; రచన, దర్శకత్వం: రాహుల్ సంకృత్యాన్; నిర్మాణ సంస్థలు: మైత్రి మూవీ మేకర్స్, T-Series; విడుదల: 16-10-2026.
తక్కువ సమయంలోనే యువతతో పాటు కుటుంబ ప్రేక్షకులకూ దగ్గరైన హీరో విజయ్ దేవరకొండ. ఇటీవల ఆయన సినిమాల ఫలితాలు ఎలా ఉన్నా, ప్రేక్షకుల్లో ఆయన క్రేజ్ మాత్రం తగ్గలేదు. తాజా చిత్రం ‘రణబాలి’ విడుదల చుట్టూ నెలకొన్న సందడి, భారీ అంచనాలు దీనికి నిదర్శనం. ఆ అంచనాల నడుమ ప్రేక్షకుల ముందుకొచ్చిన ఈ చిత్రం ఎలా ఉందన్నది పరిశీలించాల్సిన అంశం.
కథ 1870 దశకంలో మద్రాస్ ప్రెసిడెన్సీ నేపథ్యంలో సాగుతుంది. తీవ్ర కరవు, ప్రజలు తినడానికి మెతుకులేక అలమటిస్తుండగా, ఆంగ్లేయుల అరాచకాలు మాత్రం ఆగవు. పన్నుల పేరుతో పండించిన ధాన్యాన్ని పోర్టుల నుంచి తరలిస్తూ, ఆ ప్రాంతానికి కమిషనర్‌గా ఉన్న సర్ థియోడార్ హెక్టర్ (ఆర్నాల్డ్ ఓస్లూ) ఐదు లక్షల టన్నుల ధాన్యాన్ని తరలించి పెద్ద పదవి దక్కించుకోవాలనే లక్ష్యంతో ముందుకు సాగుతాడు. ఈ క్రమంలో లక్షలాది మంది ఆకలితో చనిపోతున్నా అతనికి పట్టదు.
ఈ పరిస్థితులన్నీ శింగనమలని కాపు కాస్తున్న పాలెగాడు బొబ్బిలి రణబాలి (విజయ్ దేవరకొండ) దృష్టికి వస్తాయి. ఆ తర్వాత అతడు ఏమి చేశాడు? ‘కరవు రాక్షసుడు’గా పేరు తెచ్చుకున్న హెక్టర్ ను ఎదిరించే పోరాటంలో రణబాలికి ఎదురైన పరిణామాలేమిటి? ఈ యుద్ధంలో జయమ్మ (రష్మిక) పాత్ర ప్రాధాన్యం ఏంటి? శింగనమలలో వందల ఏళ్ల క్రితం జీవసమాధి అయిన భద్రమల్లన్న తాతకు, రణబాలికి ఉన్న సంబంధం ఏమిటి? ఇవన్నీ తెరపై చూసి తెలుసుకోవాల్సిన అంశాలు.
“వెలుగు చూడని చరిత్రని ప్రపంచానికి తెలియజెప్పాలనే ప్రయత్నంలో భాగంగా తీసిన సినిమానే ‘రణబాలి’” అని దర్శకుడు రాహుల్ సంకృత్యాన్ ఓ వేడుకలో చెప్పారు.
బ్రిటిష్ కాలంలో జరిగిన అకృత్యాలు, భారత స్వాతంత్రోద్యమ నేపథ్యం, అందులో పాల్గొన్న వీరుల కథలతో ఇప్పటికే పలు భాషల్లో ఎన్నో సినిమాలు వచ్చాయి. అందుకే ఈ చిత్రంతో కొత్తగా ఏమి చెబుతున్నారు అన్న ఉత్సుకత సహజం. రాహుల్ మాటలకు తగ్గట్టుగానే మన చరిత్ర పెద్దగా చూపించని కోణాన్ని ఈ సినిమా స్పృశించే ప్రయత్నం చేస్తుంది. 1870లలో భారతావనిని వెంటాడిన కరవు నేపథ్యాన్ని ఓ డ్రామాతో ఆవిష్కరించడమే చిత్రానికి మూలం.
రాయలసీమ వీరుల స్ఫూర్తితో సృష్టించిన కల్పిత పాత్ర శింగనమల బొబ్బిలి రణబాలి తిరుగుబాటు ఈ చరిత్రను ముందుకు నడిపిస్తుంది. ఊరి దేవుడు, వీరుడి నేపథ్యాన్ని ముడిపెడుతూ కథను మలిచిన విధానం రచయితగా రాహుల్‌కు బలమైన పాయింట్. అయితే కొత్త కోణంలోని కథను ఎంచుకున్నప్పటికీ, దాన్ని పూర్తిగా ప్రభావవంతంగా తెరపైకి తీసుకురాలేకపోయిన భావన కలుగుతుంది. ఊహకు అందేలా సాగే కథనం, నిడివి కారణంగా కొన్ని చోట్ల సినిమా సాగదీసినట్టుగా అనిపిస్తుంది.
అయితే కరవును ప్రతిబింబించే ప్రపంచాన్ని సృష్టించడంలో చిత్రబృందం విజయం సాధించింది. కథానాయకుడి పుట్టుక, కారణం, గండం, ఉత్సవాల నేపథ్యం తర్వాత హీరో ప్రవేశం ఉంటుంది. తొలి పోరాటంతోనే రణబాలి పాత్రలోని మొరటుదనం, కరకుదనం స్పష్టంగా అర్థమయ్యేలా చేశారు. జయమ్మ ఈ సినిమాకు ప్రధాన ఆకర్షణ. రణబాలి– జయమ్మ ల మధ్య ప్రేమ, భావోద్వేగాలు బాగా పండాయి. పన్ను కోసం ఊరికొచ్చి వేధించే ఆంగ్లేయులకు కారం పెట్టి బెదిరించే సన్నివేశాలు, ఓ చిన్న పాపతో ముడిపెట్టి గుత్తి క్యాంపు కు కథానాయకుడు వెళ్లేలా చేసే ఘట్టాల్లో బలమైన రచన కనిపిస్తుంది.
విజయ్ దేవేరుకోండ సవాల్ విసిరే సన్నివేశంతో ప్రథమార్థం ముగుస్తుంది. ద్వితీయార్థంలో గుహ నేపథ్యంలోని పోరాటం ఆకట్టుకుంటుంది. ఆ తర్వాత సినిమాలో వేగం తగ్గిపోతుంది. కథకు దైవత్వాన్ని జోడించి కొత్తదనం తీసుకురావాలన్న ప్రయత్నం చివరి అంకంలో కనిపించినా, ముందే వచ్చిన పోరాట ఘట్టాలే పతాక సన్నివేశాల్ని తలపించడంతో, ఊహకు అందే మలుపులు చివరి భాగం ప్రభావాన్ని తగ్గించాయి. మొత్తంగా చరిత్రను వాణిజ్య కోణంలో చెప్పాలన్న రాహుల్ సంకృత్యాన్ ప్రయత్నం కొంత మేర ఫలించింది.
రణబాలి పాత్రలో విజయ్ దేవరకొండ తీరు ఆకట్టుకుంటుంది. రాయలసీమ పాలెగాడిని తలపించేలా ఆయన ఆహార్యం ఉంది. ఆ యాసలో సంభాషణలు పలికిన తీరు బాగున్నా, కొన్ని చోట్ల బిగపట్టి మాట్లాడినట్టుగా అనిపిస్తుంది. జయమ్మ పాత్రలో రష్మిక మందన్న సహజంగా ఒదిగిపోయారు. వీరి మధ్య కెమిస్ట్రీ సినిమాపై బలమైన ప్రభావం చూపింది. విలన్‌గా ‘ ది మమ్మీ ’ ఫేం ఆర్నాల్డ్ ఓస్లూ, కథానాయకుడి తల్లిగా ఈశ్వరీరావు కీలక పాత్రల్లో ఆకట్టుకున్నారు. Mime మధు , కిశోరె , వినోద్ సాగర్ తదితర సహాయ నటుల పాత్రలు కూడా బాగున్నాయి.
సాంకేతికంగా రణబాలి ఉన్నత స్థాయిలో నిలిచింది. నిరవ్ షా విజువల్స్ సినిమాకి ప్రధాన బలం. 1870ల నేపథ్యం, కరవు నేలను అత్యంత సహజంగా చూపించారు. ప్రొడక్షన్ డిజైన్ మెప్పించింది. Ajay–Atul సమకూర్చిన పాటల్లో ‘ఏందయ్యా సామీ’, ‘రణబాలి’ పాటలు ప్రత్యేకంగా ఆకట్టుకుంటాయి. నేపథ్య సంగీతం సినిమాపై మంచి ప్రభావం చూపింది. ఎడిటింగ్ విభాగం ఇంకాస్త కట్టుదిట్టంగా పనిచేసి ఉంటే బాగుండేదనిపిస్తుంది. దర్శకుడు రాహుల్ సంకృత్యాన్ ప్రయత్నంలో నిజాయితీ కనిపిస్తుంది. కథ చెప్పడంలో వేగం కొద్దిగా పెంచి ఉంటే ఫలితం మరింత బలంగా ఉండేదనే అభిప్రాయం వ్యక్తమవుతోంది.
బలాలు: కథ, భావోద్వేగాలు, విజయ్–రష్మిక జోడీ.
బలహీనతలు: నిడివి, ఊహకు అందే కొన్ని సన్నివేశాలు.
మొత్తం మీద ‘రణబాలి’ చరిత్ర, భావోద్వేగాలు, హీరోయిజం కలగలిపిన యాక్షన్ డ్రామాగా ప్రేక్షకులను మెప్పించే ప్రయత్నం చేస్తుంది.
రేటింగ్:- 2.5/5
గమనిక: ఈ సమీక్ష సమీక్షకుడి దృష్టికోణానికి సంబంధించింది. ఇది సమీక్షకుడి వ్యక్తిగత అభిప్రాయం మాత్రమే.
