రాయలసీమ న్యూస్, స్పోర్ట్స్ డెస్క్:
ఫిఫా వరల్డ్ కప్ ప్రారంభం:
మెక్సికోకు విజేతల ఆరంభం, సౌతాఫ్రికాపై 2-0 విజయం
ఫుట్‌బాల్ ప్రపంచం ఆసక్తిగా ఎదురుచూసిన ఫిఫా వరల్డ్ కప్ 2026 ఘనంగా ప్రారంభమైంది. మెక్సికో సిటీలోని చారిత్రాత్మక ఎస్టాడియో అజ్టెకా మైదానంలో జరిగిన ఓపెనింగ్ మ్యాచ్‌లో కో-హోస్ట్ మెక్సికో, సౌతాఫ్రికాపై 2-0 తేడాతో విజయం సాధించింది. ప్రపంచ కప్ చరిత్రలో మొదటిసారిగా అమెరికా, మెక్సికో, కెనడా కలిసి ఈ టోర్నీకి ఆతిథ్యమిస్తున్నాయి. మొత్తం 48 జట్లు 104 మ్యాచ్‌ల్లో టైటిల్ కోసం పోటీ పడనున్నాయి.
ఎస్టాడియో అజ్టెకా స్టేడియం ఈ వరల్డ్ కప్ కోసం పూర్తిగా నూతన రూపు దాల్చింది. 1970, 1986, 2026 ప్రపంచ కప్‌లను ఆతిథ్యం ఇచ్చిన ఏకైక వేదికగా ఈ స్టేడియం ప్రత్యేక రికార్డు సృష్టించింది. ప్రపంచవ్యాప్తంగా కోట్లాది మంది అభిమానులు టెలివిజన్, డిజిటల్ ప్లాట్‌ఫారమ్‌ల ద్వారా ఈ ప్రారంభ మ్యాచ్‌ను వీక్షించారు.
షకీరా, బర్నా బాయ్ స్టేజ్‌పై అదరగొట్టిన ఓపెనింగ్ సెర్మనీ
మ్యాచ్‌కు ముందు జరిగిన ఓపెనింగ్ సెర్మనీ స్టేడియంలో విద్యుత్ వాతావరణాన్ని సృష్టించింది. లాటిన్, ఆఫ్రికన్, అంతర్జాతీయ పాప్ గాయకులు తమ ప్రదర్శనలతో ప్రేక్షకులను అలరించారు. గ్లోబల్ పాప్ స్టార్ షకీరా స్టేడియంలోకి అడుగుపెట్టగానే అభిమానుల కేరింతలతో వేదిక మార్మోగిపోయింది.
నైజీరియన్ ఆఫ్రోబీట్స్ గాయకుడు బర్నా బాయ్‌తో కలిసి షకీరా చేసిన స్టేజ్ ప్రదర్శన ప్రత్యేక ఆకర్షణగా నిలిచింది. ఇద్దరూ కలిసి ఫిఫా వరల్డ్ కప్ 2026 అధికారిక గీతం “డై డై” పాడుతూ వేసిన డాన్స్ స్టెప్పులు ప్రేక్షకులను ఉత్సాహంలో ముంచేశాయి. వీరితో పాటు కొలంబియన్ గాయకుడు జె బాల్విన్ తన పాటలతో స్టేడియంలోని వేలాది మందిని ఉర్రూతలూగించాడు.
సాంప్రదాయ ‘పాపెల్ పికాడో’ థీమ్‌తో స్టేడియం అలంకరణ ఆకట్టుకుంది. రూఫ్‌టాప్ నుంచి వేలాడదీసిన రంగురంగుల బ్యానర్లు ఎస్టాడియో అజ్టెకాను రంగుల హారంగా మార్చాయి.
జూలియన్ క్వినోన్స్ తొలి గోల్, హైడ్రేషన్ బ్రేక్‌కు చారిత్రాత్మక ఎంట్రీ
టాస్ గెలిచిన మెక్సికో గ్రీన్ జెర్సీల్లో, సౌతాఫ్రికా ఎల్లో జెర్సీల్లో మైదానంలోకి దిగాయి. మ్యాచ్ ప్రారంభమైన తొమ్మిదో నిమిషంలోనే మెక్సికో ఆటగాడు జూలియన్ క్వినోన్స్ అద్భుత గోల్‌తో జట్టుకు 1-0 ఆధిక్యం అందించాడు. ఈ గోల్‌తో స్టేడియంలో ఉన్న సుమారు 83 వేల మంది అభిమానులు ఉత్సాహంతో ఊగిపోయారు.
17వ నిమిషంలో సౌతాఫ్రికా ఆటగాడు మొకోయెనాకు ఈ టోర్నీలో తొలి ఎల్లో కార్డ్ చూపించాడు రిఫరీ. మైదానంలో ఉష్ణోగ్రతలు అధికంగా ఉండటంతో ఫిఫా చరిత్రలో మొదటిసారిగా ‘హైడ్రేషన్ బ్రేక్’ నియమాన్ని అమల్లోకి తెచ్చారు. 24వ నిమిషంలో ఆటను నిలిపి ఆటగాళ్లకు నీరు తాగేందుకు విరామం ఇచ్చారు. తొలి అర్ధభాగం ముగిసేసరికి మెక్సికో 1-0 ఆధిక్యంలో నిలిచింది.
రెడ్ కార్డుల హీట్, రావుల్ హిమినెజ్ హెడర్‌తో రెండో గోల్
రెండో అర్ధభాగం మొదలైన వెంటనే మ్యాచ్ మరింత ఉత్కంఠభరితంగా మారింది. 50వ నిమిషంలో సౌతాఫ్రికా ఆటగాడు యాయా సిథోలెకు రిఫరీ రెడ్ కార్డ్ చూపించి మైదానం నుంచి పంపించాడు. ఈ వరల్డ్ కప్‌లో నమోదైన తొలి రెడ్ కార్డ్ ఇదే.
తర్వాత మెక్సికో స్టార్ ఆటగాడు రావుల్ హిమినెజ్, అల్వరాడో ఇచ్చిన క్రాస్‌ను అద్భుత హెడర్‌తో గోల్‌గా మలిచి జట్టును 2-0 ఆధిక్యంలోకి తీసుకెళ్లాడు. దీంతో హిమినెజ్ తన వరల్డ్ కప్ గోల్ ఖాతాను ప్రారంభించాడు.
మ్యాచ్ చివరి నిమిషాల్లో అసలు డ్రామా ఆరంభమైంది. 84వ నిమిషంలో సౌతాఫ్రికా ఆటగాడు థెంపా జ్వానేకు రెండో రెడ్ కార్డ్ పడింది. ఇంజరీ టైమ్‌లో, 90+2వ నిమిషంలో మెక్సికో ఆటగాడు సిజార్ మోంటెస్‌కు కూడా రెడ్ కార్డ్ రావడంతో ఈ మ్యాచ్‌లో మొత్తం మూడు రెడ్ కార్డులు నమోదయ్యాయి. అయితే గోల్ స్కోరులో మార్పు లేకుండా మెక్సికో 2-0 తేడాతో విజయం సాధించి, స్వదేశంలో వరల్డ్ కప్ ప్రయాణాన్ని విజయంతో ఆరంభించింది.
