రాయలసీమ న్యూస్, స్పోర్ట్స్ డెస్క్: మహిళల టీ20 ప్రపంచ కప్‌లో టీమ్‌ఇండియా విజయ పరంపరకు బ్రేక్ పడింది. దక్షిణాఫ్రికాతో జరిగిన కీలక గ్రూప్‌ మ్యాచ్‌లో భారత్ ఆరు వికెట్ల తేడాతో ఓటమి చవిచూసింది. ఈ పరాజయానికి ఫీల్డింగ్‌లో జరిగిన పొరపాట్లు, ముఖ్యంగా క్యాచ్‌లు వదిలేయడమే ప్రధాన కారణమని భారత కెప్టెన్ హర్మన్‌ప్రీత్ కౌర్ స్పష్టం చేసింది.
భారత్ నిర్దేశించిన లక్ష్యాన్ని ఛేదించే క్రమంలో సౌతాఫ్రికా బ్యాటర్ మరిజాన్ని కప్ అజేయంగా 81 పరుగులు చేసి జట్టును విజయతీరాలకు చేర్చింది. మరోవైపు భారత బౌలర్లలో తెలుగు క్రికెటర్ శ్రీ చారని 3 వికెట్లు 24 పరుగులకే తీసి మెరిసింది. షఫలి వెర్మ కూడా 4 ఓవర్లలో 22 పరుగులకే ఒక వికెట్ తీసి దక్షిణాఫ్రికా బ్యాటర్లను ఇబ్బంది పెట్టింది. అయితే మిగతా బౌలర్లకు, ఫీల్డర్లకు మాత్రం అదే స్థాయి మద్దతు లభించలేదని హర్మన్‌ప్రీత్ అభిప్రాయపడింది.
మ్యాచ్ అనంతరం మాట్లాడిన హర్మన్‌ప్రీత్, జట్టుకు గెలిచే అవకాశాలు ఉన్నప్పటికీ వాటిని సద్వినియోగం చేసుకోలేకపోయామని పేర్కొంది. ఫీల్డింగ్‌లో వచ్చిన లోపాలు, ముఖ్యంగా కీలక దశల్లో క్యాచ్‌లు వదిలేయడం వల్లే మ్యాచ్ చేతుల నుంచి జారిపోయిందని ఆమె అంగీకరించింది.
అంతర్జాతీయ క్రికెట్‌లో 200 టీ20లు ఆడిన మైలురాయిపై స్పందించిన హర్మన్‌ప్రీత్, ఈ ప్రయాణంలో ఎన్నో విషయాలు నేర్చుకున్నానని, ఆటను భిన్న కోణాల్లో ఆలోచించే సామర్థ్యం పెరిగిందని చెప్పింది. దక్షిణాఫ్రికాతో జరిగిన ఈ ఓటమి నుంచీ కూడా జట్టు పాజిటివ్ అంశాలనే తీసుకుంటుందని ఆమె పేర్కొంది..
ఈ ఓటమితో భారత్ సెమీఫైనల్‌ ఆశలకు దెబ్బతగిలినప్పటికీ, మిగిలిన రెండు లీగ్‌ మ్యాచ్‌ల్లో మెరుగైన ప్రదర్శనతో తిరిగి పుంజుకోవాలని జట్టు లక్ష్యంగా పెట్టుకుంది. బౌలర్లకు ఫీల్డర్ల మద్దతు ఎంత కీలకమో ఈ మ్యాచ్ మరోసారి గుర్తు చేసింది.
