రాయలసీమ న్యూస్, స్పోర్ట్స్ డెస్క్: ప్రపంచ అండర్-20 అథ్లెటిక్స్ ఛాంపియన్షిప్స్ చివరి రోజు భారత అథ్లెట్లు అంచనాలకు తగ్గ ప్రదర్శన ఇవ్వలేకపోయారు. ముఖ్యంగా మహిళల హైజంప్ విభాగంలో పూజ సింగ్ నుంచి పెద్ద ఆశలు పెట్టుకున్నప్పటికీ, ఆమె మెడల్ పోటీలో నిలవలేకపోయింది.
19 ఏళ్ల పూజ సింగ్ సోమవారం జరిగిన హైజంప్ ఫైనల్లో గరిష్ఠంగా 1.84 మీటర్ల ఎత్తు దూకి ఏడో స్థానంతో సరిపెట్టుకుంది. ఈ ఏడాది మేలో జరిగిన ఆసియా అండర్-20 అథ్లెటిక్స్లో 1.93 మీటర్లు ఎగిరి జాతీయ రికార్డు నెలకొల్పిన పూజ, యూజీన్లో ఆ స్థాయి ప్రదర్శనను పునరావృతం చేయలేకపోయింది. 1.87 మీటర్ల ఎత్తు దాటేందుకు మూడు అవకాశాలు వచ్చినా, ఒక్కదాంట్లోనూ విజయవంతం కాలేదు.
ఈ విభాగంలో ఇజాబెల్ లువిశన్ (ఆస్ట్రేలియా) 1.92 మీటర్ల ఎత్తు దూకి స్వర్ణ పతకం సాధించింది. లియాన బ్యాటరీ (హంగేరి), ఐటాన్ అలోన్సో (Spain) 1.90 మీటర్ల ఎత్తు ఎగిరి వరుసగా రజత, కాంస్య పతకాలు దక్కించుకున్నారు.
మహిళల 4×400 మీటర్ల రిలేలోనూ భారత్కి పతకం దక్కలేదు. భూమిక నిహతే , తాహురా ఖాతూన్ , తాను చౌదరి , తీయ ఆరుముగంలతో కూడిన భారత జట్టు 3 నిమిషాలు 45.28 సెకన్లలో గమ్యాన్ని చేరుకుని తొమ్మిదో స్థానంలో నిలిచింది. ఈ విభాగంలో అమెరికా జట్టు 3 నిమిషాలు 29.15 సెకన్ల టైంతో అగ్రస్థానం సాధించింది. ఆస్ట్రేలియా (3:31.39 నిమిషాలు), గ్రేట్ బ్రిటన్ (3:32.08 నిమిషాలు) జట్లు వరుసగా రెండో, మూడో స్థానాల్లో నిలిచాయి.
అయితే మొత్తం టోర్నీని భారత్ మూడు పతకాలతో ముగించడం విశేషంగా నిలిచింది. జావెలిన్ త్రోలో ఆశిష్ యాదవ్ రజతం, హై జంప్ లో బసంత్ కుమార్ రజతం, లాంగ్ జంప్ లో షానవాజ్ కాంస్య పతకం భారత్కి దక్కాయి. పతకాల సంఖ్య పరంగా చూస్తే మూడు మాత్రమే అయినప్పటికీ, ప్రపంచ అండర్-20 స్థాయిలో ఇది భారత అథ్లెటిక్స్కి గణనీయమైన పురోగతిగా క్రీడా వర్గాలు భావిస్తున్నాయి.
2002 నుంచి 2018 వరకు ఈ టోర్నీలో భారత్ మొత్తం నాలుగు పతకాలే సాధించగా, ఈసారి ఒక్క ఎడిషన్లోనే మూడు పతకాలు రావడం భారత యువ అథ్లెట్ల ప్రతిభ, స్థిరమైన పురోగతికి నిదర్శనంగా క్రీడా విశ్లేషకులు అభిప్రాయపడుతున్నారు.
