రాయలసీమ న్యూస్, స్పోర్ట్స్ డెస్క్: జూనియర్‌ ఆసియాకప్‌ హాకీ టోర్నమెంట్‌లో భారత మహిళల జట్టు అదిరిపోయే ప్రదర్శనతో సెమీఫైనల్లోకి దూసుకెళ్లింది. క్వార్టర్‌ఫైనల్లో పాకిస్థాన్‌ను 19-0 తేడాతో చిత్తుచేసి భారత్‌ ఘన విజయం సాధించింది. మ్యాచ్‌ ఆరంభం నుంచి ముగింపు వరకు భారత జట్టే పూర్తి ఆధిపత్యం ప్రదర్శించగా, ప్రత్యర్థి జట్టు రక్షణలోనే నలిగిపోయింది.
మొదటి క్వార్టర్‌ నుంచే భారత్‌ దూకుడు చూపించింది. తొలి ఐదు నిమిషాల్లోనే రెండు పెనాల్టీ కార్నర్లు సాధించింది. ఆరో నిమిషంలో భారత్‌ గోల్‌ చేసినా, ఫౌల్‌ కారణంగా రిఫరీ దాన్ని తిరస్కరించాడు. అయితే ఏడో నిమిషంలో పూజ సాహూ గోల్‌తో భారత్‌ ఖాతా తెరిచింది. ఆ తర్వాత భారత ఆటగాళ్లు వరుసగా గోల్స్‌ చేస్తూ పాక్‌ రక్షణను పూర్తిగా ధ్వంసం చేశారు.
తొలి రెండు క్వార్టర్లలో భారత్‌ అయిదేసి గోల్స్‌ చేసి 10-0 ఆధిక్యంలోకి వెళ్లింది. మూడో క్వార్టర్‌లో మూడు గోల్స్‌ సాధించగా, చివరి క్వార్టర్‌లో ఆరు గోల్స్‌ చేసి స్కోరును 19-0 వద్ద నిలిపింది. మొత్తం మ్యాచ్‌లో భారత్‌ 18 పెనాల్టీ కార్నర్లు, ఒక పెనాల్టీ స్ట్రోక్‌ సంపాదించడం దాడి ఎంత తీవ్రంగా సాగిందో చూపిస్తోంది.
భారత్‌ తరఫున పూజ మలిక్‌ (27వ, 49వ, 51వ నిమిషం) హ్యాట్రిక్‌ నమోదు చేసి అత్యధికంగా మూడు గోల్స్‌ చేసింది. రోషిణి (9వ, 60వ), సనిక (13వ, 23వ), మధు (16వ, 39వ), సుప్రియ (40వ, 54వ) రెండేసి గోల్స్‌ సాధించారు. తనుశ్రీ (11వ), సుఖ్‌వీర్‌ (13వ), గీత (18వ), టొప్పొ తనుజ (25వ), పూర్ణిమ (33వ), కృష్ణశర్మ (48వ), బినిమా ధన్‌ (55వ) ఒక్కో గోల్‌ చేశారు.
పాకిస్థాన్‌ జట్టు మ్యాచ్‌ మొత్తం భారత దాడిని తట్టుకోలేకపోయింది. మైదానంలో ఎక్కువ సమయం బంతి భారత్‌ ఆధీనంలోనే ఉండగా, ప్రత్యర్థి జట్టు అరుదుగా మాత్రమే భారత డిఫెన్స్‌ జోన్‌లోకి చొచ్చుకెళ్లగలిగింది. భారత గోల్కీపర్‌కు పెద్దగా పని లేకుండా పోయింది.
ఈ విజయం తో భారత్‌ సెమీఫైనల్లోకి చేరి టైటిల్‌ పోరులో మరో అడుగు ముందుకు వేసింది. సెమీఫైనల్లో కొరియా, మలేసియా మధ్య క్వార్టర్‌ఫైనల్‌ మ్యాచ్‌ విజేతతో భారత్‌ తలపడనుంది. ఈ భారీ విజయంతో జట్టులో ఉత్సాహం పెరిగింది. టోర్నమెంట్‌ లో ఇప్పటివరకు భారత్‌ చూపుతున్న ఫామ్‌ ను బట్టి, టైటిల్‌ కోసం బలమైన పోటీదారుగా నిలుస్తుందని క్రీడా వర్గాలు భావిస్తున్నాయి.
