రాయలసీమ న్యూస్, శ్రీ సత్యసాయి: ధర్మవరం: శ్రీసత్యసాయి జిల్లా కలెక్టర్ ఏ. శ్యామ్ ప్రసాద్ మంగళవారం ధర్మవరం పట్టణ పరిధిలోని 15వ వార్డు, గాంధీనగర్ సచివాలయాన్ని ఆకస్మికంగా తనిఖీ చేశారు. సచివాలయంలో నూతన పింఛన్ దరఖాస్తుల స్వీకరణ, క్షేత్రస్థాయి వేరిఫికేషన్, దరఖాస్తుల ప్రస్తుత స్థితి, ఇ-కేవైసీ ప్రక్రియల అమలు పరిస్థితిని ఆయన ప్రత్యక్షంగా పరిశీలించారు.
ఈ సందర్భంగా సచివాలయ సిబ్బంది పనితీరును, రికార్డుల నిర్వహణను, లబ్ధిదారులకు అందిస్తున్న సేవలను కలెక్టర్ సమీక్షించారు. పింఛన్ దరఖాస్తుల నమోదు నుంచి క్షేత్రస్థాయి ధృవీకరణ వరకు ప్రతి దశను వివరంగా తెలుసుకున్నారు. దరఖాస్తుల పరిశీలనలో పారదర్శకత, వేగం, ఖచ్చితత్వం ఉండాలని సంబంధిత అధికారులకు సూచించారు.
జిల్లా కలెక్టర్ ఏ. శ్యామ్ ప్రసాద్ మాట్లాడుతూ ప్రభుత్వ మార్గదర్శకాలకు అనుగుణంగా ప్రతీ దరఖాస్తును నిశితంగా పరిశీలించాలని, అర్హత కలిగిన ఏ ఒక్క లబ్ధిదారుడూ విడిపోకుండా పక్కాగా క్షేత్రస్థాయి పరిశీలన పూర్తి చేయాలని స్పష్టం చేశారు. దరఖాస్తుల వేరిఫికేషన్ మరియు eKYC నమోదులో ఎలాంటి జాప్యానికి తావులేకుండా నిర్దేశిత సమయానికే అన్ని ప్రక్రియలు పూర్తి చేయాలని ఆయన ఆదేశించారు.
సచివాలయ సిబ్బంది కార్యాలయానికి వచ్చే అర్జీదారులకు అందుబాటులో ఉంటూ, పింఛన్ దరఖాస్తు ప్రక్రియపై సరైన అవగాహన కల్పించాలని కలెక్టర్ సూచించారు. లబ్ధిదారులు ఎదుర్కొంటున్న సమస్యలను శ్రద్ధగా విని, తక్షణ పరిష్కారం కోసం చర్యలు తీసుకోవాలని సంబంధిత అధికారులకు సూచించారు. సచివాలయానికి వచ్చే వృద్ధులు, వికలాంగులు, ఇతర లబ్ధిదారులకు సౌకర్యవంతమైన వాతావరణం కల్పించాలని ఆయన పేర్కొన్నారు.
పింఛన్ దరఖాస్తుల పరిశీలనలో గ్రామ, వార్డు స్థాయి సచివాలయాల పాత్ర కీలకమని కలెక్టర్ గుర్తుచేశారు. క్షేత్రస్థాయి వేరిఫికేషన్ సమయంలో వాస్తవ పరిస్థితులను సరిగ్గా నమోదు చేయాలని, అర్హత లేని వారు పింఛన్ పొందకుండా, అర్హులైన వారు మాత్రం తప్పకుండా లబ్ధి పొందేలా వ్యవస్థను బలోపేతం చేయాలని సూచించారు.
ఈ కార్యక్రమంలో ధర్మవరం ఆర్డీఓ రాంభూపాల్ రెడ్డి, ధర్మవరం మున్సిపల్ కమిషనర్ వెంకట రమణయ్య, స్థానిక సచివాలయ అధికారులు, రెవెన్యూ సిబ్బంది, డిజిటల్ అసిస్టెంట్లు పాల్గొన్నారు. సచివాలయ పరిధిలో పింఛన్ దరఖాస్తుల ప్రస్తుత స్థితి, పెండింగ్ కేసుల వివరాలు, పూర్తి చేసిన eKYC నమోదు వివరాలను వారు కలెక్టర్కు నివేదించారు.
