రాయలసీమ న్యూస్, తమిళనాడు డెస్క్: తమిళనాడు ప్రభుత్వం మరో కొత్త సంక్షేమ కార్యక్రమానికి శ్రీకారం చుట్టింది. ప్రభుత్వ ఆస్పత్రుల్లో జన్మించిన శిశువులకు బంగారు ఉంగరాలు అందించే పథకాన్ని ముఖ్యమంత్రి విజయ్ సోమవారం ముదరైలో ప్రారంభించారు. ఈ పథకానికి ‘తాయ్మామన్ తంగ మోతిరం స్కీమ్’ అనే పేరు పెట్టారు.
ముదరైలో జరిగిన కార్యక్రమంలో ముఖ్యమంత్రి విజయ్ స్వయంగా అక్కడున్న చిన్నారులకు బంగారు ఉంగరాలు తొడిగారు. అనంతరం వారితో కొద్దిసేపు సరదాగా మాట్లాడారు. కార్యక్రమంలో పాల్గొన్న తల్లిదండ్రులతో కూడా సీఎం మాట్లాడి వారి అభిప్రాయాలు తెలుసుకున్నారు.
ఈ పథకం కింద ప్రభుత్వ ఆస్పత్రుల్లో పుట్టిన అర్హత కలిగిన శిశువులందరికీ ఒక్క గ్రాము బరువున్న బంగారు ఉంగరం అందించనున్నారు. ఇందుకోసం తొలి దశలో లక్ష 28 వేల బంగారు ఉంగరాలను ప్రభుత్వం సిద్ధం చేసినట్లు అధికార వర్గాలు వెల్లడించాయి. పథకం అమలుకు కావాల్సిన బంగారం కొనుగోలు, ఉంగరాల తయారీ, పంపిణీ బాధ్యతలను సంబంధిత శాఖలకు అప్పగించినట్లు సమాచారం.
తాయ్మామన్ తంగ మోతిరం స్కీమ్ అమలు 2026 జూన్ 22 నుంచి ప్రారంభం కానుంది. ఆ తేదీ నుంచి ప్రభుత్వ ఆస్పత్రుల్లో పుట్టే అర్హత కలిగిన ప్రతి శిశువుకు ఈ బంగారు ఉంగరం అందేలా చర్యలు తీసుకుంటున్నట్లు తెలుస్తోంది. పథకం ప్రయోజనాలు ప్రతి జిల్లాలోని ప్రభుత్వ ఆస్పత్రులకు చేరేలా ఆరోగ్య శాఖ ప్రత్యేక మార్గదర్శకాలు జారీ చేయనుంది.
ఈ పథకం ద్వారా ప్రభుత్వ ఆస్పత్రుల్లో ప్రసవాలను ప్రోత్సహించడం, తల్లి-శిశు ఆరోగ్య సేవలపై ప్రజల్లో నమ్మకాన్ని మరింత పెంచడం లక్ష్యంగా పెట్టుకున్నట్లు అధికార వర్గాలు పేర్కొంటున్నాయి. బంగారు ఉంగరం రూపంలో అందించే ఈ ప్రోత్సాహకం, తల్లిదండ్రులకు గుర్తుగా నిలిచేలా ఉండాలని ప్రభుత్వం భావిస్తోంది.
తమిళనాడులో ఇప్పటికే అమలులో ఉన్న తల్లి-శిశు సంక్షేమ పథకాలతో పాటు కొత్తగా ప్రారంభించిన తాయ్మామన్ తంగ మోతిరం స్కీమ్ ద్వారా మరింత మంది ప్రజలు ప్రభుత్వ ఆరోగ్య సేవలను వినియోగించుకుంటారని అధికార యంత్రాంగం ఆశాభావం వ్యక్తం చేస్తోంది.
