రాయలసీమ న్యూస్, తెలంగాణ డెస్క్: ఢిల్లీ: తెలంగాణలో ప్రధాన రహదారి ప్రాజెక్టుల పురోగతిపై ముఖ్యమంత్రి ఎ. రేవంత్ రెడ్డి, కేంద్ర రోడ్డు రవాణా, జాతీయ రహదారుల శాఖ మంత్రి నితిన్ గడ్కరీతో ఢిల్లీలో సమావేశమయ్యారు. రీజినల్ రింగ్ రోడ్డు (RRR) ఉత్తర భాగానికి సంబంధించి భూసేకరణ దాదాపు పూర్తయిన నేపథ్యంలో, పనుల ప్రారంభానికి అవసరమైన కేంద్ర మంత్రిమండలి అనుమతులు త్వరితగతిన మంజూరు చేయాలని ముఖ్యమంత్రి విజ్ఞప్తి చేశారు.
ఆర్ఆర్ఆర్ ఉత్తర, దక్షిణ భాగాలపై ఒకేసారి పనులు ప్రారంభమైతే నిర్మాణం వేగంగా పూర్తికావడంతో పాటు మొత్తం వ్యయం గణనీయంగా తగ్గే అవకాశం ఉందని రేవంత్ రెడ్డి వివరించారు. ఢిల్లీలోని నితిన్ గడ్కరీ నివాసంలో జరిగిన ఈ భేటీలో, ఆర్ఆర్ఆర్ దక్షిణ భాగానికి అవసరమైన అనుమతులను కూడా వెంటనే మంజూరు చేయాలని ఆయన కోరారు.
హైదరాబాద్ నుంచి ఆంధ్రప్రదేశ్ రాజధానికి గ్రీన్ఫీల్డ్ హైవే నిర్మాణం గురించి ఏపీ పునర్విభజన చట్టంలో స్పష్టంగా ప్రస్తావించబడిందని గుర్తుచేసిన ముఖ్యమంత్రి, ఈ హైవేకు సంబంధించి కేంద్ర అనుమతులు ఆలస్యం చేయకుండా ఇవ్వాలని కేంద్ర మంత్రిని అభ్యర్థించారు.
భారత్ ఫ్యూచర్ సిటి నుంచి అమరావతి మీదుగా బందరు పోర్ట్ వరకు 12 వరుసల రహదారి మంజూరు చేస్తే, హైదరాబాద్ – విజయవాడల మధ్య దూరం సుమారు 100 కిలోమీటర్లు తగ్గుతుందని రేవంత్ రెడ్డి వివరించారు. ఈ మార్గం ద్వారా హైదరాబాద్ నుంచి బందరు పోర్ట్కు సరకు రవాణా మరింత వేగవంతం అవుతుందని ఆయన తెలిపారు.
మన్ననూరు – శ్రీశైలం ఎలివేటెడ్ కారిడార్ ప్రాజెక్టుకు సంబంధించి అటవీ శాఖ అనుమతులు పొందేందుకు కేంద్రం సహకరించాలని ముఖ్యమంత్రి కోరారు. నల్లమల అభయారణ్యం, శ్రీశైలం ఆలయం, శ్రీశైలం జలాశయాలు ఈ కారిడార్ పరిధిలోకి వస్తాయని, ఈ ప్రాంతాల ప్రాముఖ్యతను దృష్టిలో ఉంచుకుని అనుమతుల ప్రక్రియను ముందుకు తీసుకెళ్లాల్సిన అవసరం ఉందని ఆయన గుర్తుచేశారు.
హైదరాబాద్ నుంచి మంచిర్యాల వరకు ఉన్న రాజీవ్ రహదారికి ప్రత్యామ్నాయంగా, మంచిర్యాల నుంచి హైదరాబాద్కు ఆరు వరుసల కొత్త రహదారి నిర్మాణానికి అనుమతులు మంజూరు చేయాలని నితిన్ గడ్కరీని రేవంత్ రెడ్డి కోరారు. ఈ ప్రత్యామ్నాయ రహదారికి అవసరమైన భూసేకరణను రాష్ట్ర ప్రభుత్వం స్వయంగా చేపడుతుందని ఆయన కేంద్ర మంత్రికి తెలిపారు.
ఈ కొత్త రహదారి ద్వారా వ్యవసాయ, వ్యాపార రంగాల్లో నూతన అవకాశాలు సృష్టించబడతాయని, ప్రాంతీయ ఆర్థికాభివృద్ధికి ఇది దోహదం చేస్తుందని ముఖ్యమంత్రి ప్రతిపాదించారు. రహదారి నెట్వర్క్ బలోపేతం ద్వారా రాష్ట్రంలో పెట్టుబడులు, పరిశ్రమలు, లాజిస్టిక్స్ రంగాలు మరింత అభివృద్ధి చెందే అవకాశాలపై కూడా ఆయన దృష్టి సారించారు.
ఈ సమావేశంలో నల్గొండ ఎంపీ రఘువీర్తో పాటు పలు ఉన్నతాధికారులు పాల్గొన్నారు. రాష్ట్రానికి కీలకమైన రహదారి ప్రాజెక్టులపై జరిగిన ఈ చర్చలో, అనుమతుల మంజూరు, భూసేకరణ, పర్యావరణ అనుమతులు వంటి అంశాలు ప్రధానంగా చర్చకు వచ్చాయి.
