రాయలసీమ న్యూస్, తెలంగాణ డెస్క్: హైదరాబాద్: దేశవ్యాప్తంగా విధులు నిర్వహిస్తున్న హోంగార్డులకు శాశ్వత ఉద్యోగ భద్రత కల్పించేందుకు చట్టాల్లో అవసరమైన సవరణలు చేయాలని కోరుతూ తెలంగాణ రాష్ట్ర హోంగార్డుల సంక్షేమ సంఘం కేంద్ర బొగ్గు, గనుల శాఖ మంత్రి జి. కిషన్ రెడ్డికి వినతిపత్రం సమర్పించింది. వాలంటీర్ వ్యవస్థకు ముగింపు పలికి, హోంగార్డులకు స్థిరమైన సేవా నియమాలు అమలు చేయాలని సంఘం డిమాండ్ చేసింది.
సంఘం అధ్యక్షుడు పుప్పాల అశోక్ ఆధ్వర్యంలో ప్రతినిధి బృందం మంత్రి జి. కిషన్ రెడ్డిని కలిసి వినతిపత్రం అందజేసింది. దేశవ్యాప్తంగా సుమారు ఐదు లక్షల మంది హోంగార్డులు శాంతిభద్రతల పరిరక్షణలో, ప్రకృతి వైపరీత్యాలు, కరోనా వంటి విపత్కర పరిస్థితుల్లో కూడా పోలీసు సిబ్బందితో సమానంగా విధులు నిర్వర్తిస్తున్నప్పటికీ, ఇప్పటికీ వాలంటీర్లుగానే కొనసాగుతున్నారని వారు వినతిలో పేర్కొన్నారు.
దాదాపు 70 సంవత్సరాలుగా కొనసాగుతున్న ఈ వాలంటీర్ వ్యవస్థ కారణంగా హోంగార్డులు శ్రమదోపిడీకి గురవుతున్నారని సంఘం ప్రతినిధులు వివరించారు. ఉద్యోగ భద్రత లేకపోవడం, ఆరోగ్య భద్రత, ఇతర సంక్షేమ సౌకర్యాలు అందకపోవడం వల్ల అనేక మంది హోంగార్డులు, వారి కుటుంబాలు తీవ్ర ఇబ్బందులు ఎదుర్కొంటున్న పరిస్థితిని వినతిపత్రంలో ప్రస్తావించారు.
హోంగార్డుల ఆర్థిక పరిస్థితులు, వారి కుటుంబాల భవిష్యత్తును దృష్టిలో ఉంచుకుని ప్రస్తుతం అమల్లో ఉన్న విధానాన్ని మార్చాల్సిన అవసరం ఉందని సంఘం అభిప్రాయపడింది. ఇందుకోసం చట్ట సవరణల ద్వారా హోంగార్డులకు శాశ్వత ఉద్యోగ భద్రత కల్పించాలని కేంద్ర ప్రభుత్వాన్ని కోరింది.
ముఖ్యంగా 1946–47, 1962–63 నాటి హోంగార్డ్ చట్టాల్లో అవసరమైన మార్పులు తీసుకురావాలని వినతిపత్రంలో స్పష్టంగా పేర్కొన్నారు. హోంగార్డుల సేవా నిబంధనలు, వేతనాలు, పదవీ భద్రత, సంక్షేమ పథకాల విషయంలో సమగ్ర మార్పులు చేయాల్సిందిగా సంఘం డిమాండ్ చేసింది.
తెలంగాణ రాష్ట్ర హోంగార్డుల సంక్షేమ సంఘం తరఫున చేసిన ఈ వినతిపై కేంద్ర ప్రభుత్వం సానుకూల నిర్ణయం తీసుకుంటుందనే ఆశాభావం సంఘం నాయకులు వ్యక్తం చేశారు. ఈ కార్యక్రమంలో హోంగార్డ్ ఆఫీసర్స్ నారాయణ రెడ్డి, నర్సింగ్, జంగయ్య తదితరులు పాల్గొన్నారు.
