రాయలసీమ న్యూస్, తెలంగాణ డెస్క్: హైదరాబాద్‌లోని సల్కం చెరువు ఆక్రమణల కేసులో ఫాతిమా ఒవైసీ విద్యాసంస్థ భవనంపై తెలంగాణ ప్రభుత్వం హైకోర్టుకు నివేదిక సమర్పించింది. ఆ విద్యాసంస్థ భవనం సల్కం చెరువు ఎఫ్‌టీఎల్ (Full Tank Level) పరిధిలో లేదని ప్రభుత్వం న్యాయస్థానానికి తెలియజేసింది. అయితే, ప్రభుత్వ నివేదికపై హైకోర్టు తీవ్ర అసంతృప్తి వ్యక్తం చేస్తూ కీలక ప్రశ్నలు సంధించింది.

రెవెన్యూ, నీటిపారుదల శాఖలు సంయుక్తంగా నిర్వహించిన పరిశీలన ఆధారంగా రూపొందించిన నివేదికను Additional Advocate General హైకోర్టు ధర్మాసనానికి సమర్పించారు. ఈ నివేదికతో పాటు మ్యాపులను పరిశీలించిన జస్టిస్ ఎన్వీ శ్రవణ్ కుమార్ ధర్మాసనం, చెరువు విస్తీర్ణం, ఎఫ్‌టీఎల్ పరిమితుల మార్పులపై ప్రభుత్వాన్ని నిలదీసింది.

గత కాస్ర పహాణీల్లో సల్కం చెరువు విస్తీర్ణం 39 ఎకరాలుగా రికార్డయిందని, 2016లో చెరువుకు సంబంధించి ప్రాథమిక నోటిఫికేషన్ జారీ చేసినట్లు రికార్డుల్లో ఉందని కోర్టు గుర్తు చేసింది. ఆ సమయంలో ఉన్న ఎఫ్‌టీఎల్ పరిమితి ఇప్పుడు ఎలా తగ్గిందని, పదేళ్లుగా ఈ చెరువు ఎఫ్‌టీఎల్‌పై తుది నోటిఫికేషన్ ఎందుకు ఇవ్వలేదని న్యాయస్థానం ప్రశ్నించింది.

మ్యాపుల్లో చెరువు ఆక్రమణలు స్పష్టంగా కనిపిస్తున్నప్పటికీ, ప్రభుత్వ నివేదికలో వాటి గురించి తగిన వివరాలు లేకపోవడంపై కోర్టు ఆక్షేపించింది. తమకు నచ్చిన నిర్మాణాలను కూల్చకుండా వదిలేస్తున్నారా, ఎఫ్‌టీఎల్ పరిమితులను మీ ఇష్టమొచ్చినట్లు మార్చేస్తున్నారా అనే అంశాలపై కూడా న్యాయస్థానం ప్రభుత్వ తీరును ప్రశ్నించింది.

చెరువుల పరిరక్షణకు సంబంధించి HYDRAA చేపడుతున్న చర్యలపై కూడా హైకోర్టు వివరణ కోరింది. ఈ కేసుకు సంబంధించి మున్సిపల్ శాఖ, HMDA ఇప్పటివరకు నివేదికలు సమర్పించకపోవడంపై ధర్మాసనం అసంతృప్తి వ్యక్తం చేసింది. వెంటనే పూర్తి వివరాలతో నివేదికలు సమర్పించాలని సంబంధిత అధికారులను ఆదేశించింది.

ఈ నేపథ్యంలో ఫాతిమా ఒవైసీ విద్యాసంస్థల భవనాలపై గతంలో హైకోర్టు జారీ చేసిన స్టేటస్ కో ఉత్తర్వులను ధర్మాసనం ఉపసంహరించుకుంది. సల్కం చెరువు ఆక్రమణల వ్యవహారంపై తదుపరి విచారణను వాయిదా వేస్తూ, ఎఫ్‌టీఎల్ పరిమితులు ఎలా మారాయనే అంశంపై ప్రభుత్వం పూర్తి స్థాయి వివరణ ఇవ్వాలని కోర్టు ఆదేశించింది.

సల్కం చెరువు ఎఫ్‌టీఎల్‌ను ఆక్రమించి ఫాతిమా ఒవైసీ విద్యాసంస్థ భవనాలు నిర్మించారని ఆరోపిస్తూ న్యాయవాది విజయ్ గోపాల్ హైకోర్టులో పిటిషన్ దాఖలు చేశారు. ఆ పిటిషన్‌పై జస్టిస్ ఎన్వీ శ్రవణ్ కుమార్ ధర్మాసనం గురువారం విచారణ కొనసాగించింది. తదుపరి విచారణకు ముందు అన్ని సంబంధిత శాఖలు సమగ్ర నివేదికలు సమర్పించాలని కోర్టు స్పష్టం చేసింది.