రాయలసీమ న్యూస్, తెలంగాణ డెస్క్: ప్రపంచ ప్రఖ్యాత ఎలక్ట్రిక్ వాహనాల దిగ్గజం టెస్లా భాగ్యనగరంలో అధికారికంగా అడుగుపెట్టింది. హైదరాబాద్ ఐటీ హబ్ మాదాపూర్ హైటెక్ సిటీలోని నాలెడ్జ్ సిటీలో టెస్లా తన సరికొత్త ఎక్స్పీరియన్స్ సెంటర్‌ను ప్రారంభించింది. భారతదేశంలో టెస్లాకు ఇది ఐదో షోరూమ్ కావడం విశేషం. నగరంలోని ఎలక్ట్రిక్ వాహనాల అభిమానులకు ఇది కీలక మైలురాయిగా భావిస్తున్నారు.
ఈ ఎక్స్పీరియన్స్ సెంటర్‌లో టెస్లా తన తాజా మోడళ్లను ప్రదర్శనకు ఉంచింది. వాటిలో 2026 Model Y Premium RWD, ఆరు సీట్ల ఆల్-వీల్ డ్రైవ్ ఎస్‌యూవీ Model Y L ప్రధాన ఆకర్షణగా నిలుస్తున్నాయి. అత్యాధునిక సాంకేతికత, గ్లోబల్ సేఫ్టీ రేటింగ్స్‌తో వస్తున్న ఈ కార్లను కస్టమర్లు ప్రత్యక్షంగా పరిశీలించే అవకాశం కల్పించారు.
ఎక్స్పీరియన్స్ సెంటర్‌ను సందర్శించే వాహన ప్రియులు టెస్లా అడ్వైజర్ల సమక్షంలో కార్ల ఫీచర్లను సమగ్రంగా తెలుసుకోవచ్చు. అక్కడికక్కడే బుకింగ్ చేసుకునే సౌకర్యాన్ని కూడా కంపెనీ అందుబాటులోకి తెచ్చింది. హైదరాబాద్‌లో కేవలం షోరూమ్ స్థాయిలోనే కాకుండా, పూర్తి స్థాయి సేవలందించేందుకు టెస్లా ముందస్తు ప్రణాళికతో ముందుకొచ్చినట్లు తెలుస్తోంది.
ఈ క్రమంలోనే నగర శివార్లలోని బొల్లారం ఇండస్ట్రియల్ ఏరియాలో ప్రత్యేక డెలివరీ కేంద్రాన్ని ఏర్పాటు చేశారు. కార్ల డెలివరీలతో పాటు, After-sales services కోసం అధునాతన వర్క్‌షాప్‌ను కూడా టెస్లా స్థాపించింది. దీంతో వాహనాల నిర్వహణ, మరమ్మతులు, ఇతర సేవలను ఒకే చోట అందించేలా ఏర్పాట్లు చేశారు.
టెస్లా ఎలక్ట్రిక్ కార్ల ప్రారంభ ధర రూ.50.89 లక్షల ఎక్స్-షోరూమ్‌గా నిర్ణయించినట్లు సమాచారం. ఈ కార్ల డెలివరీలు జూలై 2026 నుంచి ప్రారంభం కానున్నాయి. దీంతో వచ్చే రెండేళ్లలో హైదరాబాద్ రోడ్లపై టెస్లా కార్లు పరుగులు తీయనున్నాయనే అంచనాలు వ్యక్తమవుతున్నాయి.
అంతేకాకుండా, జూన్ 30లోపు కార్లను బుక్ చేసుకునే కస్టమర్లకు ప్రత్యేక ఆఫర్‌ను టెస్లా ప్రకటించింది. ఆ తేదీ లోపు బుకింగ్ పూర్తి చేసే వినియోగదారులకు ఉచితంగా హోమ్ ఛార్జింగ్ వాల్ కనెక్టర్‌ను అందించనున్నట్లు కంపెనీ వెల్లడించింది. ఈ ఆఫర్‌తో పాటు, టెస్లా ప్రవేశం నేపథ్యంలో నగరంలోని ఎలక్ట్రిక్ కార్ల ప్రియుల్లో గణనీయమైన ఆసక్తి నెలకొంది.
హైదరాబాద్‌లో టెస్లా ఎక్స్పీరియన్స్ సెంటర్ ప్రారంభం, బొల్లారం సర్వీస్ సెంటర్ ఏర్పాటు, రాబోయే డెలివరీలతో కలిసి నగర ఎలక్ట్రిక్ వాహనాల మార్కెట్‌కు కొత్త ఊపునిచ్చే అవకాశాలు కనిపిస్తున్నాయి. ఐటీ హబ్‌గా పేరుగాంచిన హైదరాబాద్, ఇప్పుడు ప్రీమియం ఎలక్ట్రిక్ కార్ల హబ్‌గా కూడా నిలవబోతుందనే అభిప్రాయాలు వ్యక్తమవుతున్నాయి.
