రాయలసీమ న్యూస్, తెలంగాణ డెస్క్:
మ్యాట్రిమోని సైట్లలో మోసాలు.. వెంకట కామేష్పై కేసుల వెల్లువ
మ్యాట్రిమోని సైట్లను వేదికగా చేసుకుని యువతులను కోట్ల రూపాయలకు మోసం చేస్తున్న వెంకట కామేష్ కేసులో కొత్త వివరాలు వెలుగులోకి వస్తున్నాయి. అతని అరాచకాలకు గురైన బాధితుల సంఖ్య రోజురోజుకూ పెరుగుతోంది. తెలుగు రాష్ట్రాల రెండింట్లోనూ అతనిపై పలు పోలీస్ స్టేషన్లలో ఫిర్యాదులు నమోదవుతున్నాయి.
పశ్చిమ గోదావరి జిల్లా ఉండ్రాజవరానికి చెందిన వెంకట కామేష్పై ఇప్పటి వరకు ఆంధ్రప్రదేశ్, తెలంగాణ రాష్ట్రాల్లో కలిపి 18 కేసులు నమోదయ్యాయని పోలీసులు వెల్లడించారు. మోసపోయిన వారంతా సమాచార సాంకేతిక రంగంలో పనిచేస్తున్న ఉద్యోగులేనని దర్యాప్తులో బయటపడింది.
రూ.200 కోట్ల ఆస్తులు కలిగిన సంపన్నుడిగా తనను తాను పరిచయం చేసుకుంటూ, మ్యాట్రిమోని సైట్లలో పరిచయమైన యువతుల విశ్వాసాన్ని గెలుచుకున్నట్లు పోలీసులు తెలిపారు. అనంతరం వివాహం పేరుతో, పెట్టుబడులు, వ్యాపారాలు, అత్యవసర అవసరాలు వంటి వివిధ కారణాలు చూపుతూ వారినుంచి భారీ మొత్తంలో డబ్బులు వసూలు చేసినట్లు విచారణలో తేలిందని పేర్కొన్నారు.
సంపన్నుడిగా కనిపించేందుకు వెంకట కామేష్ బెట్టింగ్, గేమింగ్ పేరుతో డబ్బులు తిప్పుతూ, ఫామ్హౌస్లలో పని చేసే వారికి కొంత మొత్తం ఇచ్చి, ఆ ఆస్తుల యజమాని తానేనని యువతులకు నమ్మబలికినట్లు పోలీసులు వివరించారు. ఈ క్రమంలో కోట్ల రూపాయలు అతని ఖాతాల్లోకి వెళ్లినట్టు అనుమానిస్తున్నారు.
ఇటీవల ఓ యువతి ఫిర్యాదు మేరకు సైబరాబాద్ పోలీసులు వెంకట కామేష్ను అరెస్ట్ చేశారు. అనంతరం అతనిపై మచిలీపట్నం పోలీస్ స్టేషన్లో నమోదైన కేసులో పీటీ వారెంట్ తీసుకుని, అక్కడి పోలీసులు కూడా అతడిని అదుపులోకి తీసుకుని మచిలీపట్నానికి తరలించారు. వివిధ కేసుల్లో అతని పాత్ర, డబ్బుల లావాదేవీలపై సంబంధిత జిల్లాల పోలీసులు వేర్వేరుగా దర్యాప్తు కొనసాగిస్తున్నారు.
ఇప్పటికే బయటపడ్డ కేసులతో పాటు ఇంకా మరికొందరు బాధితులు ఉండొచ్చని పోలీసులు భావిస్తున్నారు. ఇప్పటివరకు ఫిర్యాదు చేయని వారు ముందుకు రావాలని, తమను సంప్రదించాలని సైబరాబాద్ సైబర్ క్రైం విభాగం విజ్ఞప్తి చేసింది. నిందితుడిని కస్టడీలోకి తీసుకుని సుదీర్ఘంగా విచారించి, అతని మోసపూరిత కార్యకలాపాల పూర్తి వివరాలు వెలికితీసే దిశగా చర్యలు కొనసాగిస్తున్నట్లు అధికారులు తెలిపారు.
