రాయలసీమ న్యూస్, ఎంటర్‌టైన్‌మెంట్ డెస్క్:

బాలకృష్ణ ‘NBK111’ ఊచకోత గ్లింప్స్ విడుదల

నటసింహం, గాడ్ ఆఫ్ మాసెస్ నందమూరి బాలకృష్ణ పుట్టినరోజు జూన్ 10ను పురస్కరించుకుని తెలుగు రాష్ట్రాల్లో అభిమానులు ఘనంగా వేడుకలు నిర్వహిస్తున్నారు. ఈ ఏడాది బాలకృష్ణ తన 66వ పుట్టినరోజును జరుపుకుంటుండటంతో థియేటర్ల వద్ద, సామాజిక మాధ్యమాల్లో అభిమానుల సంబరాలు మరింత ఉత్సాహంగా కొనసాగుతున్నాయి. ఈ వేడుకల హంగామాను మరింత పెంచుతూ బాలయ్య తాజా చిత్రం ‘NBK111’ నుంచి గ్లింప్స్‌ను చిత్రబృందం విడుదల చేసింది.

‘ఎంట్రీ ఆఫ్ అన ఎరా’ అనే శీర్షికతో విడుదల చేసిన ఈ గ్లింప్స్‌కు “No More Vintage.. Only New Age” అనే ట్యాగ్‌లైన్‌ను జత చేశారు. గతంలో బాలకృష్ణతో ‘వీరసింహారెడ్డి’ వంటి భారీ బ్లాక్‌బస్టర్ అందించిన మాస్ దర్శకుడు గోపీచంద్ మలినేని ఈ కొత్త చిత్రానికి దర్శకత్వం వహిస్తున్నారు. యాక్షన్‌తో నిండిన ఈ గ్లింప్స్‌ను బట్టి చూస్తే థియేటర్లలో అభిమానులకు పూనకాలు రావడం ఖాయమనే అభిప్రాయం వ్యక్తమవుతోంది.

ట్యాగ్‌లైన్‌కు అనుగుణంగా గోపీచంద్ మలినేని, బాలకృష్ణను ఇంతకుముందు చూడని విధంగా అత్యంత స్టైలిష్, శక్తివంతమైన గ్యాంగ్‌స్టర్ పాత్రలో చూపించారు. గ్లింప్స్‌లో బాలయ్య పలికిన శక్తివంతమైన సంభాషణలు, హై వోల్టేజ్ యాక్షన్ సన్నివేశాలు అభిమానులను ఉత్సాహపరుస్తున్నాయి. మ్యూజిక్ సెన్సేషన్ ఎస్.ఎస్. థమన్ సమకూర్చిన బ్యాక్‌గ్రౌండ్ స్కోర్ థియేటర్లలో మరింత ఉత్సాహాన్ని రేకెత్తించేలా ఉందని సినీ వర్గాలు చెబుతున్నాయి.

వృద్ధి సినిమాస్ పతాకంపై వెంకట సతీశ్ కిలారు ఈ చిత్రాన్ని అత్యంత ప్రతిష్ఠాత్మకంగా, భారీ బడ్జెట్‌తో నిర్మిస్తున్నారు. భారీ తారాగణం ఈ చిత్రానికి మరో ప్రధాన ఆకర్షణగా నిలుస్తోంది. బాలకృష్ణ సరసన లేడీ సూపర్ స్టార్ నయనతార, కాజల్ అగర్వాల్ నటిస్తున్నారు. అలాగే బాలీవుడ్ నటి నర్గీస్ ఫక్రీ ప్రత్యేక గీతాల్లో మెరవనున్నారు.

ఈ క్రేజీ ప్రాజెక్టులో బాలకృష్ణకు ఎదురుగా పవర్‌ఫుల్ విలన్ పాత్రలో వెర్సటైల్ నటుడు మంచు మనోజ్ నటిస్తున్నారు. దీంతో చిత్రంపై అంచనాలు మరింత పెరిగాయి. సినిమాటోగ్రాఫర్ అరవింద్ కశ్యప్ ఈ చిత్రానికి విజువల్‌గా అద్భుతమైన ఫ్రేమ్‌లను అందిస్తున్నారని యూనిట్ వర్గాలు తెలిపాయి.

గ్లింప్స్ విడుదలకు ముందు చిత్రబృందం మొత్తం కలిసి బాలకృష్ణను స్వయంగా కలుసుకుని పుట్టినరోజు శుభాకాంక్షలు తెలిపింది. దర్శకుడు గోపీచంద్ మలినేని, నిర్మాత వెంకట సతీశ్ కిలారు, సంగీత దర్శకుడు థమన్, సినిమాటోగ్రాఫర్ అరవింద్ కశ్యప్‌లు బాలయ్య నివాసానికి వెళ్లి కేక్ కట్ చేయించి సంబరాల్లో పాల్గొన్నారు. ఈ సందర్భంగా సినిమా అవుట్‌పుట్‌పై బాలకృష్ణ సంతృప్తి వ్యక్తం చేసినట్లు యూనిట్ వర్గాలు తెలియజేశాయి.

మొత్తం మీద ఈ బర్త్‌డే గ్లింప్స్‌తో బాక్సాఫీస్ వద్ద కొత్త రికార్డుల వేట ప్రారంభించేందుకు ‘NBK111’ బృందం సన్నాహాలు పూర్తి చేసుకున్నట్లు తెలుస్తోంది. అభిమానుల్లో ఇప్పటికే ఈ చిత్రంపై భారీ హైప్ నెలకొంది.