రాయలసీమ న్యూస్, ఎంటర్టైన్మెంట్ డెస్క్: ప్రస్తుత కాలంలో నిత్యావసర సరకుల నుంచి పిల్లలు తాగే పాల వరకూ ప్రతిదీ కల్తీతో నిండిపోయిందనే వాస్తవాన్ని నేపథ్యంగా తీసుకుని రూపొందుతున్న చిత్రం ‘ది ఇండియా స్టోరీ’ త్వరలో ప్రేక్షకుల ముందుకు రానుంది. ఈ చిత్రంలో కథానాయిక కాజల్ ప్రధాన పాత్రలో నటించగా, చెట్టన్ డీకే దర్శకత్వం వహించారు. శ్రేయాస్ తల్పడే కీలక పాత్ర పోషించారు.
సామాజిక సమస్యలను కేంద్రబిందువుగా తీసుకుని, కల్తీ, నాణ్యతలేమి, వాటి ప్రభావం వంటి అంశాలను ఈ సినిమా ద్వారా ఆవిష్కరించబోతున్నట్లు చిత్రబృందం సూచిస్తోంది. ఇప్పటికే విడుదలైన ఈ సినిమా టీజర్, పోస్టర్లకు ప్రేక్షకుల నుంచి మంచి స్పందన లభించింది. సామాజిక మాధ్యమాల్లో ఈ చిత్రానికి సంబంధించిన ప్రచార సామగ్రి విస్తృతంగా పంచుకుంటున్నారు.
ఈ నేపథ్యంలో తాజాగా మరో కొత్త పోస్టర్ను చిత్రబృందం సామాజిక మాధ్యమాల వేదికగా విడుదల చేసింది. కొత్త పోస్టర్తో పాటు చిత్రంలోని భావజాలాన్ని ప్రతిబింబించేలా ఒక వ్యాఖ్యను కూడా జోడించారు.
సత్యానికి అనుమతి అవసరం లేదు.. అది వినిపించడానికి కేవలం ఒక్క అవకాశం చాలు. ఈ నెలలో ఆ నిజాలు మీ అందరి దృష్టిని ఆకర్షించబోతున్నాయ్.
కోర్టు రూమ్ డ్రామా నేపథ్యంలో ఈ చిత్రాన్ని తీర్చిదిద్దారు. న్యాయస్థానాన్ని కేంద్రంగా చేసుకుని, సమాజంలో జరుగుతున్న కల్తీ, అవినీతి, వాటి వల్ల సాధారణ ప్రజలు ఎదుర్కొంటున్న సమస్యలను కథలో ప్రతిబింబించే ప్రయత్నం చేసినట్లు చిత్ర యూనిట్ తెలిపింది.
‘ది ఇండియా స్టోరీ’ ఈ నెల 24న ప్రేక్షకుల ముందుకు రానుంది. విడుదల తేదీ సమీపిస్తుండటంతో ప్రచార కార్యక్రమాలను మరింత వేగవంతం చేశారు. పోస్టర్లు, టీజర్ ద్వారా ఇప్పటికే సినిమాపై ఆసక్తి పెంచిన చిత్రబృందం, విడుదలకు ముందు మరిన్ని ప్రచార కార్యక్రమాలు చేపట్టేందుకు సిద్ధమవుతోంది.
ఈ చిత్రాన్ని సాగర్ బి. షిండే నిర్మించారు. సమకాలీన సమస్యలను ఆవిష్కరించే ప్రయత్నం చేస్తున్న ఈ సినిమా, విడుదల తర్వాత ఎంత మేరకు ప్రేక్షకుల మనసులను తాకుతుందో చూడాలి.
