రాయలసీమ న్యూస్, వై.యస్.ఆర్: కడప:- రాష్ట్రంలో కూటమి ప్రభుత్వం అధికారంలోకి వచ్చిన తర్వాత శాంతిభద్రతలు పూర్తిగా లోపించాయని, మహిళలపై దాడులు, అఘాయిత్యాలు పెరిగిపోయాయని బద్వేల్ ఎమ్మెల్యే సుధా ఆరోపించారు. కడప జిల్లా బద్వేల్ ప్రాంతంలో భూతగాదా వివాదం నేపథ్యంలో టిడిపి నాయకులు ఒక మహిళపై దాడి చేసిన ఘటనను ఖండిస్తూ కడప అంబేద్కర్ సర్కిల్ వద్ద వైఎస్ఆర్ కాంగ్రెస్ పార్టీ నాయకులు, కార్యకర్తలు నిరసన తెలిపారు.
మహిళపై దాడి చేసిన టిడిపి నాయకులను వెంటనే అరెస్టు చేయాలని డిమాండ్ చేస్తూ నిరసనకారులు నినాదాలు చేశారు. ఈ సందర్భంగా బద్వేల్ ఎమ్మెల్యే సుధా మాట్లాడుతూ, ప్రశాంతంగా ఉండే బద్వేల్ ప్రాంతంలో టిడిపి నాయకులు అరాచకాలు సృష్టిస్తున్నారని, మహిళలపై దాడులకు కూడా దిగుతున్నారని ఆరోపించారు.
బయట ప్రాంతాల నుంచి వచ్చిన వ్యక్తులు వృద్ధ దంపతులపై దాడి చేసిన సంఘటనలో బాధితులకు అండగా నిలవాల్సిన పోలీసులు, రెండు వర్గాలపై కేసులు నమోదు చేయడం పట్ల ఆమె అభ్యంతరం వ్యక్తం చేశారు. ఈ వ్యవహారంలో పోలీసులు న్యాయబద్ధంగా వ్యవహరించలేదని ఆమె విమర్శించారు.
కూటమి ప్రభుత్వం సంక్షేమాన్ని పక్కన పెట్టి రెడ్ బుక్ రాజ్యాంగ అమలు చేసేందుకే ప్రాముఖ్యత ఇస్తోందని ఎమ్మెల్యే సుధా వ్యాఖ్యానించారు. మహిళలందరికీ ఆర్థిక సాయం అందిస్తామని అధికారంలోకి రాకముందు హామీ ఇచ్చిన కూటమి నాయకులు, అధికారంలోకి వచ్చిన తర్వాత ఆ సాయం చేయకపోగా మహిళలపై దాడులకు దిగుతున్నారని ఆమె ఆరోపించారు.
బద్వేల్ మహిళపై దాడి ఘటనపై హోంమినిస్టర్ వెంటనే స్పందించి బాధితులకు న్యాయం చేయాలని ఎమ్మెల్యే సుధా కోరారు. మహిళల భద్రతకు ప్రభుత్వం తక్షణ చర్యలు తీసుకోవాలని, దాడిలో పాల్గొన్న టిడిపి నాయకులపై కఠిన చర్యలు తీసుకోవాలని ఆమె డిమాండ్ చేశారు.
కడప అంబేద్కర్ సర్కిల్లో జరిగిన ఈ నిరసన కార్యక్రమంలో మాజీ ఉప ముఖ్యమంత్రి అంజాద్ భాష, జిల్లా అధ్యక్షులు రవీంద్రనాథ్ రెడ్డి, ఎమ్మెల్యే అమర్నాథ్ రెడ్డి, వైఎస్ఆర్ కాంగ్రెస్ పార్టీ నాయకులు, కార్యకర్తలు పాల్గొన్నారు. మహిళలపై దాడులను అరికట్టాలని, బాధితులకు న్యాయం చేయాలని వారు ప్రభుత్వాన్ని కోరారు.
