రాయలసీమ న్యూస్, వై.యస్.ఆర్: కడప జిల్లాలోని జగన్ కుటుంబానికి చెందిన భారతి సిమెంట్ ఫ్యాక్టరీకి ముడిసరుకు రాకుండా అడ్డంకులు సృష్టిస్తూ, ప్రస్తుత ప్రభుత్వం రాజకీయ కక్ష్యతో వ్యవహరిస్తోందని ప్రొద్దుటూరు మాజీ ఎమ్మెల్యే రాచమల్లు శివప్రసాద్ రెడ్డి ఆరోపించారు. గురువారం ఆయన మీడియాతో మాట్లాడారు.
రాచమల్లు శివప్రసాద్ రెడ్డి మాట్లాడుతూ, భారతి సిమెంట్ ఫ్యాక్టరీకి అవసరమైన ముడిసరకుల సరఫరా నిలిపివేయడం ద్వారా ప్రభుత్వం పరిశ్రమను లక్ష్యంగా చేసుకుందని విమర్శించారు. పరిశ్రమలపై ఇలాంటి ఒత్తిడి తంతులు అనుసరించడం రాష్ట్ర ఆర్థికాభివృద్ధికి, పెట్టుబడుల వాతావరణానికి ప్రతికూలమని ఆయన అభిప్రాయపడ్డారు.
పరిశ్రమలపై రాజకీయ కక్ష్య సాధించాలనే ధోరణి ఏ ప్రభుత్వానికైనా శ్రేయస్కరం కాదని రాచమల్లు పేర్కొన్నారు. పెట్టుబడిదారులు, పరిశ్రమల ప్రతినిధులు విశ్వాసంతో రాష్ట్రానికి రావాలంటే పాలకులు స్థిరమైన, పారదర్శక విధానాలు పాటించాలని ఆయన సూచించారు.
ఇదే విధానాన్ని గతంలో జగన్ కూడా అనుసరించి ఉంటే, టీ తాగే సమయంలోనే CBN కుటుంబానికి చెందిన హెరిటేజ్ సంస్థ మూతపడే పరిస్థితి వచ్చేదని రాచమల్లు వ్యాఖ్యానించారు. రాజకీయ భేదాభిప్రాయాలను పరిశ్రమలతో ముడిపెట్టడం తగదని ఆయన స్పష్టం చేశారు.
రాష్ట్రంలో పరిశ్రమల ప్రోత్సాహానికి అనుకూల వాతావరణం నెలకొల్పాల్సిన సమయంలో, వ్యక్తిగత, రాజకీయ విభేదాలను వ్యాపార రంగంపై ప్రతిఫలింపజేయడం వల్ల పెట్టుబడులు దూరమయ్యే ప్రమాదం ఉందని రాచమల్లు శివప్రసాద్ రెడ్డి హెచ్చరించారు. పరిశ్రమలపై ఒత్తిడి కాకుండా, ప్రోత్సాహక చర్యలు తీసుకోవాలని ఆయన ప్రభుత్వాన్ని కోరారు.
