రాయలసీమ న్యూస్, ఆంధ్రప్రదేశ్ డెస్క్: విజయనగరం జిల్లా భోగాపురంలో నిర్మించిన అత్యాధునిక అంతర్జాతీయ విమానాశ్రయం కమర్షియల్ కార్యకలాపాలకు సిద్ధమైంది. ఉత్తరాంధ్ర ప్రజలు ఆసక్తిగా ఎదురుచూస్తున్న ఈ విమానాశ్రయాన్ని ప్రధానమంత్రి నరేంద్ర మోడీ ఆగస్టు 1వ తేదీ శనివారం జాతికి అంకితం చేయనున్నారు. ఇందుకు సంబంధించిన ఏర్పాట్లు కేంద్ర, రాష్ట్ర ప్రభుత్వాలు వేగంగా పూర్తి చేస్తున్నాయి.

కేంద్ర ప్రభుత్వం ఇప్పటికే ASR ఇంటర్నేషనల్ ఎయిర్‌పోర్ట్‌కు సంబంధించి గెజిట్ నోటిఫికేషన్ జారీ చేసింది. ఆగస్టు 16వ తేదీ అర్ధరాత్రి నుంచి ఈ విమానాశ్రయం పూర్తిస్థాయిలో కార్యకలాపాలు ప్రారంభించనుంది. ప్రస్తుతం విశాఖపట్నం విమానాశ్రయం ఉపయోగిస్తున్న VTZ కోడ్‌తోనే భోగాపురం కొత్త విమానాశ్రయం సేవలు కొనసాగనున్నట్లు అధికారికంగా స్పష్టం చేశారు.

ఆగస్టు 17వ తేదీ నుంచి భోగాపురం విమానాశ్రయం నుంచి విమానాల రాకపోకలు ప్రారంభం కానున్నాయి. ఈ నేపథ్యంలో అక్టోబర్ 24 వరకు అమల్లో ఉండే షెడ్యూల్‌ను ఎయిర్ ఇండియా విడుదల చేసింది. ఆ షెడ్యూల్ ప్రకారం హైదరాబాద్‌కు రోజూ ఐదు, బెంగళూరుకు రెండు, విజయవాడకు నాలుగు విమాన సర్వీసులు నడవనున్నాయి. దీంతో ఉత్తరాంధ్ర ప్రాంత ప్రజలకు దేశీయ వైమానిక అనుసంధానం గణనీయంగా మెరుగుపడనుంది.

అంతర్జాతీయ సేవల విషయంలో కూడా భోగాపురం విమానాశ్రయానికి మంచి ప్రాధాన్యం లభిస్తోంది. ప్రస్తుతం విశాఖ–సింగపూర్ మధ్య వారానికి మూడు రోజులుగా నడుస్తున్న Scoot Air సర్వీసులు ఆగస్టు 17 నుంచి వారానికి నాలుగు రోజులకు పెరగనున్నాయి. అలాగే అబుదాబీకి విమాన సర్వీసులను పునరుద్ధరించేందుకు వివిధ ఎయిర్‌లైన్స్ సంస్థలు ఏర్పాట్లు పూర్తి చేస్తున్నాయి. ఈ మార్గంలో కూడా వారానికి నాలుగు రోజుల పాటు విమానాలు నడిపేలా ప్రణాళికలు సిద్ధమయ్యాయి.

అత్యాధునిక సౌకర్యాలు, అంతర్జాతీయ ప్రమాణాలతో నిర్మించిన భోగాపురం ASR ఇంటర్నేషనల్ ఎయిర్‌పోర్ట్ ఉత్తరాంధ్ర అభివృద్ధికి కీలక కేంద్రంగా మారనుందని అధికారులు అంచనా వేస్తున్నారు. దేశీయ, అంతర్జాతీయ కనెక్టివిటీ పెరగడంతో పర్యాటకం, వాణిజ్యం, ఐటీ, పారిశ్రామిక రంగాలకు కొత్త ఊపు లభించే అవకాశాలు ఉన్నాయని భావిస్తున్నారు.

వచ్చే 30 సంవత్సరాల పాటు షెడ్యూల్ విమానాల కార్యకలాపాలు ఈ విమానాశ్రయం నుంచే కొనసాగనున్నట్లు కేంద్ర ప్రభుత్వం స్పష్టం చేసింది. భోగాపురం విమానాశ్రయం పూర్తిస్థాయిలో కార్యకలాపాలు ప్రారంభించడంతో విశాఖపట్నం, విజయనగరం, శ్రీకాకుళం జిల్లాలతో పాటు సమీప రాష్ట్రాల ప్రజలకు కూడా మెరుగైన వైమానిక సదుపాయాలు అందుబాటులోకి రానున్నాయి.