రాయలసీమ న్యూస్, ఆంధ్రప్రదేశ్ డెస్క్: ఎల్‌నినో ప్రభావం కారణంగా ఏర్పడుతున్న వాతావరణ మార్పులపై రాష్ట్రంలోని రైతులకు విస్తృతంగా అవగాహన కల్పించాలని ముఖ్యమంత్రి చంద్రబాబు నాయుడు సంబంధిత అధికారులకు సూచించారు. రాష్ట్ర సచివాలయంలోని ఆర్టీజీఎస్ కేంద్రం నుంచి నేడు ఆయన వివిధ శాఖల ఉన్నతాధికారులతో సమావేశం నిర్వహించి, ప్రస్తుత పరిస్థితులను సమీక్షించారు.
ఈ ఏడాది మొత్తం ఎల్‌నినో ప్రభావం తీవ్రంగా ఉండే అవకాశాలపై వస్తున్న అంచనాల నేపథ్యంలో ఇప్పటికే ప్రభుత్వం చేపట్టిన చర్యలను సీఎం సమీక్షించారు. వాతావరణ మార్పులు వ్యవసాయ రంగంపై చూపే ప్రభావాన్ని దృష్టిలో పెట్టుకుని, రైతులకు ముందస్తు సమాచారం అందించేలా వ్యవస్థలను మరింత బలోపేతం చేయాలని సూచించారు.
ఎల్‌నినో కారణంగా వర్షపాతం, ఉష్ణోగ్రతల్లో వచ్చే మార్పులు పంటల దిగుబడిపై ప్రతికూల ప్రభావం చూపే అవకాశం ఉన్నందున, రైతులు తగిన జాగ్రత్తలు తీసుకునేలా వ్యవసాయ శాఖ, వాతావరణ శాఖ, ఆర్టీజీఎస్ వంటి సంస్థలు సమన్వయంతో పనిచేయాలని సీఎం అధికారులను ఆదేశించారు. ఇప్పటికే అమలులో ఉన్న పంటల సలహా సేవలను గ్రామస్థాయికి మరింత విస్తరించాలని సూచించారు.
ప్రస్తుత పరిస్థితుల్లో సంప్రదాయ పంటలతో పాటు ప్రత్యామ్నాయ పంటల వైపు రైతులను ప్రోత్సహించాల్సిన అవసరాన్ని సీఎం సమావేశంలో ప్రస్తావించారు. ఎల్‌నినో ప్రభావం ఎక్కువగా ఉండే ప్రాంతాలను గుర్తించి, అక్కడి రైతులకు ప్రత్యేక సలహాలు, మార్గదర్శకాలు అందించేలా చర్యలు తీసుకోవాలని సంబంధిత శాఖలను కోరారు.
రైతులకు అవగాహన కల్పించే కార్యక్రమాల్లో రైతు సంఘాలు, వ్యవసాయ విశ్వవిద్యాలయాలు, పరిశోధనా సంస్థలను కూడా భాగస్వామ్యం చేయాలని సమావేశంలో చర్చ జరిగింది. పంటల మార్పిడి, నీటి వినియోగం, ఎండనిరోధక పంటల ఎంపిక వంటి అంశాలపై గ్రామస్థాయిలో శిక్షణా కార్యక్రమాలు నిర్వహించే అవకాశాలను అధికారులు పరిశీలించారు.
ఈ సమావేశంలో మంత్రి శ్రీ కొలుసు పార్ధసారధి, రాష్ట్ర ప్రభుత్వ ప్రధాన కార్యదర్శి శ్రీ జీ. సాయి ప్రసాద్, డీజీపీ శ్రీ హరీష్ కుమార్ గుప్తా సహా వివిధ శాఖల ఉన్నతాధికారులు పాల్గొన్నారు. ఎల్‌నినో ప్రభావం నేపథ్యంలో వ్యవసాయ, నీటి వనరులు, విపత్తు నిర్వహణ, పోలీసు శాఖల మధ్య సమన్వయాన్ని మరింత పటిష్ఠం చేయాలనే అంశంపై కూడా సమావేశంలో చర్చ సాగింది.
