రాయలసీమ న్యూస్, ఆంధ్రప్రదేశ్ డెస్క్: బల్లికురవ నుంచి అద్దంకి వస్తుండగా పోలీసుల కారు ప్రమాదానికి గురైన ఘటన స్థానికంగా ఉద్రిక్తతకు దారితీసింది. స్విఫ్ట్ డిజైర్ కారు ఓ ఆటోను ఢీకొట్టడంతో ఆటోలో ప్రయాణిస్తున్న నలుగురికి గాయాలు అయ్యాయి. ప్రమాదం అనంతరం కారులో గంజాయి ఉందన్న అనుమానం వ్యక్తం చేస్తూ స్థానికులు ఆందోళన వ్యక్తం చేశారు.
స్థానికుల సమాచారం ప్రకారం, ప్రమాదానికి గురైన కారులో బల్లికురవ ఎస్సై నాగరాజు, సంతమాగుళూరు ఎస్సై నాగమల్లేశ్వరరావు సివిల్ డ్రెస్లో ప్రయాణిస్తున్నట్లు తెలిసింది. కారు అద్దంకి సమీపానికి చేరుకున్న సమయంలో ఆటోను ఢీకొట్టినట్లు ప్రత్యక్ష సాక్షులు చెబుతున్నారు. ఢీకొట్టిన ప్రభావంతో ఆటోలో ఉన్న నలుగురు గాయపడగా, వారిని చికిత్స కోసం సమీప ఆసుపత్రికి తరలించినట్లు సమాచారం.
ప్రమాదం జరిగినట్టు సమాచారం అందుకున్న అద్దంకి సీఐ సుబ్బరాజు వెంటనే ఘటనా స్థలానికి చేరుకున్నారు. ఈ సమయంలో కారు డిక్కీలో గంజాయి ఉన్నట్లు అనుమానం వ్యక్తం చేస్తూ స్థానికులు కారును పూర్తిగా తనిఖీ చేయాలని డిమాండ్ చేశారు. కారులో ఏమున్నదో ప్రజల సమక్షంలోనే పరిశీలించాలని వారు పట్టుబట్టినట్లు ప్రత్యక్ష సాక్షులు పేర్కొన్నారు.
కారు తనిఖీ విషయంలో స్థానికులు, పోలీసుల మధ్య వాగ్వాదం చోటు చేసుకుంది. తనిఖీ ఎలా చేయాలి, ఎక్కడ చేయాలి అనే అంశంపై రెండు వర్గాల మధ్య మాటామాటా పెరగడంతో అక్కడ పరిస్థితి కొంతసేపు ఉద్రిక్తంగా మారింది. పరిస్థితి అదుపు తప్పకుండా ఉండేందుకు అదనపు పోలీసులు కూడా అక్కడికి చేరుకున్నట్లు తెలుస్తోంది.
ఉద్రిక్తత నేపథ్యంలో కారులో ప్రయాణిస్తున్న ఇద్దరు ఎస్సైలను అక్కడి నుంచి ఇతర పోలీసు సిబ్బంది తరలించినట్లు సమాచారం. కారులో గంజాయి ఉందన్న స్థానికుల ఆరోపణలపై ఇప్పటివరకు అధికారికంగా ఎలాంటి ప్రకటన వెలువడలేదు. ఘటనపై పూర్తి వివరాలు, కారులో ఏమున్నదన్న అంశంపై సంబంధిత అధికారులు స్పష్టత ఇవ్వాల్సి ఉంది.
ప్రమాదం, అనంతరం చోటుచేసుకున్న ఉద్రిక్తతతో అద్దంకి పరిసర ప్రాంతాల్లో చర్చనీయాంశంగా మారింది. పోలీసుల కారు, గంజాయి అనుమానం, స్థానికుల ప్రతిస్పందనపై ఉన్న సందేహాలన్నింటిని నివృత్తి చేసేలా అధికారిక విచారణ జరిపి నిజానిజాలు బయటపెట్టాలని స్థానికులు కోరుకుంటున్నారు.
