రాయలసీమ న్యూస్, ఆంధ్రప్రదేశ్ డెస్క్: పాముకాటు చికిత్సకు సంబంధించి సోషల్ మీడియాలో ఒక వార్త విపరీతంగా వైరల్ అవుతోంది. “పాము కాటు వేయగానే 108 వాహనానికి కాల్ చేస్తే, వారు నేరుగా ఇంటికే వచ్చి ఇంజెక్షన్ ఇస్తారు” అంటూ ఒక పోస్ట్ విస్తృతంగా షేర్ అవుతోంది. ఈ వైరల్ పోస్ట్పై ఆంధ్రప్రదేశ్ వైద్య ఆరోగ్య శాఖ అధికారులు స్పందించారు. అందులోని వాస్తవాలను వివరించడంతో పాటు, ప్రజలు ఎలాంటి అపోహలకు లోనుకావద్దని విజ్ఞప్తి చేశారు.
వైద్య ఆరోగ్య శాఖ సమాచారం ప్రకారం, ఇటీవల పాముకాటు బాధితులకు ‘గోల్డెన్ అవర్’లోపు అత్యవసర ప్రాథమిక చికిత్స అందించేందుకు కీలక నిర్ణయం తీసుకున్నారు. రాష్ట్రంలోని 108 అంబులెన్స్లలో యాంటీ స్నేక్ వెనం (ASV) ఇంజక్షన్లను అందుబాటులో ఉంచారు. దీని ద్వారా పాముకాటు బాధితులకు ప్రయాణంలోనే అత్యవసర పరిస్థితుల్లో ప్రాథమిక చికిత్స అందించే వీలుంటుంది.
అయితే, సోషల్ మీడియాలో వైరల్ అవుతున్న పోస్ట్లో పేర్కొన్నట్లుగా అంబులెన్స్ సిబ్బంది నేరుగా బాధితుల ఇంటికి వెళ్లి అక్కడే ఇంజెక్షన్ వేసి వెళ్లడం జరగదని అధికారులు స్పష్టం చేశారు. బాధితుడిని ఆసుపత్రికి తరలించే సమయంలో, ప్రయాణ మధ్యలో రోగి పరిస్థితి అత్యవసరంగా మారితేనే, నిర్ణీత విధానాల ప్రకారం ఈ చికిత్సను అందిస్తారు.
వైద్య ఆరోగ్య శాఖ వివరాల ప్రకారం, యాంటీ స్నేక్ వెనం (ASV) అత్యంత ప్రభావవంతమైన ఔషధం. అందువల్ల దీన్ని నిర్దిష్ట వైద్య పర్యవేక్షణ లేకుండా నేరుగా ఇవ్వడం సాధ్యం కాదు. అంబులెన్స్లో పనిచేసే ఎమర్జెన్సీ మెడికల్ టెక్నీషియన్ (EMT), మంగళగిరిలోని ప్రధాన రెస్పాన్స్ సెంటర్లో ఉన్న వైద్యులతో కమాండ్ కంట్రోల్ వ్యవస్థ ద్వారా సంప్రదింపులు జరుపుతారు.
అంబులెన్స్లో అమర్చిన డోమ్ కెమెరాల ద్వారా రోగి పరిస్థితి, లక్షణాలను వైద్యులు ప్రత్యక్షంగా పరిశీలిస్తారు. ఆ పరిశీలన అనంతరం, వైద్యులు ఇచ్చే సూచనల మేరకు మాత్రమే EMT యాంటీ స్నేక్ వెనం (ASV) ఇంజెక్షన్ను రోగికి ఇస్తారు. ఈ మొత్తం ప్రక్రియ వైద్యుల పర్యవేక్షణలోనే జరుగుతుందని అధికారులు స్పష్టం చేస్తున్నారు.
పాముకాటుకు గురైనప్పుడు ఎటువంటి నాటు వైద్యాలు, అప్రమాణిక పద్ధతులు నమ్మి సమయాన్ని వృథా చేయకూడదని వైద్య ఆరోగ్య శాఖ హెచ్చరిస్తోంది. వెంటనే 108 అత్యవసర సేవలను ఆశ్రయించాలని సూచిస్తోంది. అంబులెన్స్ ద్వారా బాధితుడికి ప్రయాణంలోనే ప్రాథమిక రక్షణ కల్పించి, తదుపరి పూర్తి స్థాయి చికిత్స కోసం సమీపంలోని ప్రభుత్వ ఆసుపత్రికి తరలిస్తారు.
కాబట్టి, సోషల్ మీడియాలో వచ్చే అరకొర సమాచారాన్ని నమ్మి మోసపోవద్దని అధికారులు ప్రజలకు విజ్ఞప్తి చేస్తున్నారు. అత్యవసర సమయాల్లో వైద్య సహాయం కోసం మాత్రమే 108 నంబర్ను సంప్రదించాలని, ఇంటికే వచ్చి ఇంజెక్షన్ వేస్తారనే ప్రచారం అసత్యమని ఆరోగ్య శాఖ స్పష్టం చేసింది.
