రాయలసీమ న్యూస్, అన్నమయ్య: మదనపల్లె భర్త గల్లంతైన ఘటనపై దాదాపు రెండు దశాబ్దాలుగా పోలీసు స్టేషన్ల చుట్టూ తిరుగుతున్నానని ఒక మహిళ వేదన వ్యక్తం చేశారు. సోమవారం జిల్లా పోలీసు కార్యాలయంలో జరిగిన పీజీఆర్ఎస్ సమావేశంలో అన్నమయ్య జిల్లా ఎస్పీ ధీరజ్ కునుబిల్లికి ఆమె తన బాధను తెలియజేశారు.
చంద్రకళ అనే మహిళ 2004లో దేవరాజ్ అనే వ్యక్తితో వివాహం జరిగింది. వివాహం అనంతరం రెండు సంవత్సరాలకే ఆమె జీవితంలో విషాదం మొదలైంది. 2006లో మగ్గం వార్పు తెచ్చేందుకు వెళ్లిన దేవరాజ్ తిరిగి ఇంటికి రాలేదు. అప్పటి నుంచి ఆయన ఆచూకీ కోసం చంద్రకళ పోలీసు స్టేషన్లను ఆశ్రయిస్తూ వస్తున్నట్లు తెలిపింది.
చంద్రకళ ఎస్పీ ధీరజ్ ముందు కన్నీటి పర్యంతమయ్యారు. ఆమె ఫిర్యాదును ఎస్పీ శ్రద్ధగా విని, సంబంధిత వివరాలు సేకరించి న్యాయం చేయడానికి చర్యలు తీసుకుంటామని హామీ ఇచ్చారు.
తరువాత ఎస్పీ ధీరజ్ మాట్లాడుతూ పీజీఆర్ఎస్ సమావేశాలకు బాధితులు తీవ్ర బాధతో వస్తారని, వారి సమస్యలను ఓర్పుతో విని, సాధ్యమైనంత వరకు సామరస్యపూర్వక పరిష్కారాలు చూపాలని సిబ్బందికి సూచించారు. అదనపు ఎస్పీ వెంకటాద్రితో కలిసి పలువురి నుంచి వచ్చిన ఫిర్యాదులను ఆయన స్వీకరించారు.
ఇదిలా ఉండగా, సంబేపల్లె మండలం వట్టంవాండ్లపల్లె గ్రామస్థులు కూడా పీజీఆర్ఎస్లో ఎస్పీకి ఫిర్యాదు చేశారు. తమ గ్రామంలోని ఆలయంలో అమ్మవారి విగ్రహం చోరీకి గురై నెలలు గడిచినా, ఇప్పటి వరకు నిందితులను పోలీసులు పట్టుకోలేదని వారు ఆవేదన వ్యక్తం చేశారు.
ఏప్రిల్ 8న చౌడేశ్వరి అమ్మవారి పంచలోహ విగ్రహాన్ని దొంగలు ఎత్తుకుపోయారని, ఈ కేసులో దర్యాప్తు వేగవంతం చేసి నిందితులను పట్టుకుని, విగ్రహాన్ని తిరిగి ఆలయానికి తీసుకురావాలని గ్రామస్థులు కోరారు.
పీజీఆర్ఎస్ ద్వారా ప్రజలు తమ సమస్యలను నేరుగా ఎస్పీ దృష్టికి తీసుకువస్తుండగా, భర్త ఆచూకీ తెలియక ఇరువై దశాబ్దాలుగా తలుపుతడుతున్న చంద్రకళ వంటి బాధితులకు న్యాయం జరిగేలా చర్యలు తీసుకోవాలని స్థానికులు అభిప్రాయపడుతున్నారు.
