రాయలసీమ న్యూస్, బిజినెస్ డెస్క్: ప్రముఖ ఇ-కామర్స్‌ సంస్థ అమెజాన్‌ ఈ ఏడాది ప్రైమ్‌ డే సేల్‌ తేదీలను అధికారికంగా ప్రకటించింది. జూలై 4 నుంచి జూలై 6 వరకు మూడు రోజుల పాటు ఈ సేల్‌ను నిర్వహించనుంది. ప్రతి సంవత్సరం కేవలం ప్రైమ్‌ సభ్యుల కోసం ప్రత్యేకంగా నిర్వహించే ఈ సేల్‌లో విభిన్న విభాగాలకు చెందిన ఉత్పత్తులపై ప్రత్యేక రాయితీలు, ఆఫర్లు అందుబాటులో ఉండనున్నాయి.
జూలై 4న అర్ధరాత్రి 12 గంటలకు సేల్‌ ప్రారంభమై, జూలై 6న రాత్రి 11.59 గంటలకు ముగుస్తుందని అమెజాన్‌ వెల్లడించింది. మూడు రోజుల పాటు కొనసాగే ఈ సేల్‌లో OnePlus, Samsung వంటి బ్రాండ్లకు చెందిన సుమారు 500 కొత్త ఉత్పత్తులపై భారీ ఆఫర్లు ఉండనున్నాయని కంపెనీ తెలిపింది. అయితే, ఉత్పత్తుల వారీగా ఆఫర్ల పూర్తి వివరాలను సేల్‌కు కొన్ని రోజుల ముందే ప్రకటించనున్నట్లు పేర్కొంది.
ఎకో స్మార్ట్‌ స్పీకర్లు, Alexa పరికరాలు, Fire TVలపై గరిష్టంగా 45 శాతం వరకు రాయితీలు ఇవ్వాలని అమెజాన్‌ యోచిస్తోంది. అదనంగా, SBI, Axis Bank క్రెడిట్‌ కార్డు హోల్డర్లకు 10 శాతం ఇన్‌స్టంట్‌ డిస్కౌంట్‌ లభించనుంది. Amazon ICICI క్రెడిట్‌ కార్డు వినియోగదారులకు 5 శాతం క్యాష్‌బ్యాక్‌ అందించనున్నట్లు సమాచారం.
ప్రైమ్‌ డే సేల్‌ 10వ ఎడిషన్‌ సందర్భంగా ప్రైమ్‌ మెంబర్‌షిప్‌ ధరలను కూడా అమెజాన్‌ తగ్గించింది. ప్రస్తుతం స్టాండర్డ్‌ ప్రైమ్‌ మెంబర్‌షిప్‌ వార్షిక ప్లాన్‌ ధర 1,499 రూపాయలుగా ఉండగా, దాన్ని 999 రూపాయలకు తగ్గించింది. ప్రైమ్‌ లైట్‌ సబ్‌స్క్రిప్షన్‌ ధరను 799 రూపాయల నుంచి 599 రూపాయలకు తగ్గించారు.
కేవలం షాపింగ్‌ డిస్కౌంట్‌ల కోసం అందించే ఎడిషన్‌ ప్లాన్‌ ధరను కూడా అమెజాన్‌ తగ్గించింది. ఇప్పటి వరకు 399 రూపాయలుగా ఉన్న ఈ ప్లాన్‌ ఇప్పుడు 299 రూపాయలకు లభించనుంది. వినియోగదారులు తాము కోరుకున్న ఉత్పత్తులను త్వరగా గుర్తించేందుకు, ఎంపిక చేసుకునేందుకు కృత్రిమ మేధ ఆధారిత టూల్స్‌ను కూడా అమెజాన్‌ అందుబాటులోకి తెస్తోంది.
కొనుగోలుదారుల సౌలభ్యం కోసం Amazon Pay Later సదుపాయాన్ని కూడా కొనసాగిస్తోంది. ఈ సదుపాయం ద్వారా అర్హత కలిగిన వినియోగదారులు కొనుగోలు చేసిన ఉత్పత్తుల కోసం చెల్లింపులను వాయిదాల రూపంలో లేదా తరువాతి తేదీల్లో చెల్లించే అవకాశం పొందుతారు. ప్రైమ్‌ డే సేల్‌ సమీపిస్తున్న నేపథ్యంలో, ప్రైమ్‌ మెంబర్‌షిప్‌ తీసుకోవాలనుకునే కొత్త వినియోగదారులకు ఈ ధరల తగ్గింపులు ఆకర్షణీయంగా మారే అవకాశం ఉంది.
