మళ్లీ పెరిగిన బంగారు ధరలు

రాయలసీమ న్యూస్, బిజినెస్ డెస్క్:

మార్కెట్ ప్రారంభం నుంచే దూకుడు

భారత్‌లో బంగారం ధరలు మళ్లీ ఎగబాకాయి. వారం రోజులుగా వరుసగా తగ్గుతూ వచ్చిన పసిడి రేట్లు మంగళవారం ఒక్కసారిగా పెరిగి వినియోగదారులకు షాక్‌ ఇచ్చాయి. అంతర్జాతీయ మార్కెట్‌లో బంగారం ధరలు పైకి కదలడంతో దేశీయ మార్కెట్‌లోనూ అదే ధోరణి కనిపించింది. అయితే వెండి ధరలు మాత్రం పెద్దగా మార్పు లేకుండా స్థిరంగా కొనసాగుతున్నాయి.

గుడ్ రిటర్న్స్ వెబ్‌సైట్‌ సమాచారం ప్రకారం, జూన్ 9 ఉదయం 10 గంటల సమయానికి హైదరాబాద్ బులియన్ మార్కెట్‌లో 24 క్యారెట్ల 10 గ్రాముల పసిడి ధర రూ.1,53,160కు చేరుకుంది. ఇది క్రితం ముగింపుతో పోలిస్తే రూ.1,470ల మేర పెరిగినట్లుగా నమోదైంది. 22 క్యారెట్ల 10 గ్రాముల బంగారం ధర కూడా రూ.1,350ల మేర పెరిగి రూ.1,40,400 వద్దకు ఎగబాకింది.

హైదరాబాద్‌లో కిలో వెండి ధర మాత్రం మార్పు లేకుండా రూ.2.7 లక్షల వద్ద స్థిరంగా కొనసాగుతోంది. దేశవ్యాప్తంగా కూడా బంగారం ధరలు సగటున రూ.1,450ల మేర పెరిగినట్లు మార్కెట్‌ వర్గాలు సూచిస్తున్నాయి.

ఇతర ప్రధాన నగరాల్లోనూ ఇదే ధోరణి కనిపించింది. చెన్నైలో ప్రస్తుతం 24 క్యారెట్ల 10 గ్రాముల పసిడి ధర రూ.1,54,910గా ఉండగా, 22 క్యారెట్ల 10 గ్రాముల బంగారం ధర రూ.1,42,000కు పెరిగింది. ముంబైలో 24 క్యారెట్ల 10 గ్రాముల బంగారం ధర రూ.1,53,160గా, 22 క్యారెట్ల పసిడి ధర రూ.1,40,400గా నమోదైంది.

దేశ రాజధాని ఢిల్లీలో 10 గ్రాముల మేలిమి బంగారం (24 క్యారెట్లు) ధర రూ.1,53,310కు ఎగబాకగా, ఆర్నమెంటల్ పసిడి (22 క్యారెట్లు) ధర రూ.1,40,550కు పెరిగింది. దేశవ్యాప్తంగా వెండి ధరలు మాత్రం పెద్దగా మార్పు లేకుండా కొనసాగుతున్నాయి. వివిధ నగరాల్లో కిలో వెండి ధర రూ.2.6 లక్షల నుంచి రూ.2.7 లక్షల మధ్య ట్రేడవుతోంది.

అంతర్జాతీయ మార్కెట్‌లో కూడా బంగారం ధరలు బలంగా కదిలాయి. ఔన్స్‌ (31.10 గ్రాములు) 24 క్యారెట్ల పసిడి ధర నిన్నటితో పోలిస్తే 0.6 శాతం మేర పెరిగి 4,330 డాలర్లను దాటింది. అయితే ఔన్స్ వెండి ధర మాత్రం దాదాపు 1 శాతం తగ్గి 67 డాలర్ల వద్ద ట్రేడవుతోంది.

మార్కెట్‌ నిపుణుల సూచన ప్రకారం, బంగారం, వెండి ధరలు రోజువారీగా, గంట గంటకూ మారుతూ ఉండటం వల్ల నగలు కొనుగోలు చేసే ముందు తాజా రేట్లు తప్పనిసరిగా తెలుసుకోవాలని వినియోగదారులకు సూచిస్తున్నారు.