రాయలసీమ న్యూస్, స్పోర్ట్స్ డెస్క్: హైదరాబాద్‌ ట్యాంక్‌ బండ్‌ వద్ద బుధవారం సాయంత్రం బుద్ధుడి విగ్రహం ఎదుట టీజీ20 క్రికెట్ లీగ్‌ ట్రోఫీని ఘనంగా ఆవిష్కరించారు. హైదరాబాద్‌ క్రికెట్ సంఘం ఆధ్వర్యంలో జరుగుతున్న ఈ టోర్నమెంట్‌ తొలి సీజన్‌కు సంబంధించిన ఏర్పాట్లు పూర్తికావడంతో, ట్రోఫీ ఆవిష్కరణను ప్రత్యేకంగా నిర్వహించారు.
ఈ కార్యక్రమానికి టీజీ20లో పాల్గొనే జట్ల కెప్టెన్లు హాజరయ్యారు. రంగారెడ్డి రైజర్స్‌ కెప్టెన్‌ తనయ్‌ త్యాగరాజన్‌, మెదక్‌ ఫాల్కన్స్‌ తరఫున రవితేజ, పాలమూరు స్ట్రైకర్స్‌ నాయకుడు ప్రజ్ఞయ్‌ రెడ్డి, అన్విత ఖమ్మం ఏసెస్‌ కెప్టెన్‌ సీవీ మిలింద్‌, అనురాగ్‌ నల్గొండ నైట్స్‌ తరఫున రాహుల్‌ బుద్ధి, హైదరాబాద్‌ ఈ ఛాంపియన్స్‌ కెప్టెన్‌ అభిరథ్‌ రెడ్డి, కరీంనగర్‌ డైమండ్స్‌ నాయకుడు తన్మయ్‌ అగర్వాల్‌, వరంగల్‌ వారియర్స్‌ కెప్టెన్‌ అమన్‌ రావు ఈ వేడుకలో పాల్గొన్నారు.
ట్యాంక్‌ బండ్‌ వంటి ప్రతిష్ఠాత్మక ప్రదేశంలో ట్రోఫీ ఆవిష్కరణ జరగడం టీజీ20 లీగ్‌కు ప్రత్యేక ఆకర్షణగా నిలిచింది. బుద్ధుడి విగ్రహం నేపథ్యంగా ట్రోఫీని ఆవిష్కరించడంతో పాటు, జట్ల కెప్టెన్లు కలిసి ఫోటోలకు పోజులిచ్చారు. ఈ సందర్భంగా అక్కడకు వచ్చిన క్రికెట్ అభిమానులు ట్రోఫీని దగ్గరగా వీక్షించే అవకాశం పొందారు.
తెలంగాణవ్యాప్తంగా ప్రతిభావంతులైన యువ క్రికెటర్లను వెలుగులోకి తీసుకురావాలన్న లక్ష్యంతో హైదరాబాద్‌ క్రికెట్ సంఘం టీజీ20 క్రికెట్ లీగ్‌ను ప్రారంభించిన విషయం తెలిసిందే. రాష్ట్రంలోని వివిధ జిల్లాలను ప్రతినిధ్యం వహించే ఎనిమిది జట్లు ఈ టోర్నమెంట్‌లో పోటీపడుతున్నాయి. లీగ్‌ ద్వారా జిల్లాల స్థాయిలో ఉన్న ప్రతిభను గుర్తించి, ఉన్నత స్థాయికి తీసుకెళ్లాలని నిర్వాహకులు లక్ష్యంగా పెట్టుకున్నారు.
సీజన్‌-1 కోసం ఇప్పటికే జట్ల ఎంపిక, ఆటగాళ్ల డ్రాఫ్ట్‌, మ్యాచ్‌ల షెడ్యూల్‌ వంటి కార్యక్రమాలు పూర్తయ్యాయి. ట్రోఫీ ఆవిష్కరణతో టోర్నమెంట్‌ వాతావరణం మరింత ఉత్కంఠభరితంగా మారింది. త్వరలో ప్రారంభమయ్యే ఈ లీగ్‌లో యువ క్రికెటర్ల ప్రదర్శనపై రాష్ట్రవ్యాప్తంగా క్రికెట్ అభిమానులు దృష్టి సారించారు.
