రాయలసీమ న్యూస్, చిత్తూరు: కాణిపాకం: శ్రావణ పౌర్ణమి సందర్భంగా కాణిపాకం శ్రీ వరసిద్ధి వినాయక స్వామివారి ఆలయంలో ఉత్సవాలు వైభవంగా నిర్వహించారు. స్వామివారి ఉత్సవ మూర్తులకు ప్రత్యేక అభిషేకం, కల్యాణోత్సవం నిర్వహించడంతో ఆలయ పరిసరాలు భక్తులతో కిటకిటలాడాయి.
ఉదయం స్వామివారి ఉత్సవ మూర్తులకు సంప్రదాయ విధానంలో అభిషేక కార్యక్రమం జరిగింది. అనంతరం వేద మంత్రోచ్ఛారణల మధ్య కల్యాణోత్సవం నిర్వహించారు. ఆలయ అర్చకులు, సిబ్బంది పాల్గొని కార్యక్రమాన్ని శాస్త్రోక్తంగా జరిపారు.
శ్రీ సిద్ధి బుద్ధి సమేత వరసిద్ధి వినాయక స్వామివారికి చిలుక వాహనంపై గ్రామోత్సవం నిర్వహించడం ఈ శ్రావణ పౌర్ణమి ఉత్సవాలకు ప్రధాన ఆకర్షణగా నిలిచింది. చిలుక వాహనంపై స్వామివారిని ఊరేగించగా, భక్తులు రోడ్డు రెండు వైపులా నిలబడి దర్శనమందుకున్నారు. భజన బృందాలు, వేదపండితుల మంత్రోచ్ఛారణలతో ఊరేగింపు మరింత ఆధ్యాత్మిక వాతావరణాన్ని సృష్టించింది.
ఈ గ్రామోత్సవానికి ఉభయదారులుగా కాణిపాకం చెందిన రేపాకుల కుటుంబ సభ్యులు, మోహన్ శెట్టి వారి సోదరులు బాధ్యతలు చేపట్టారు. ప్రతి సంవత్సరం శ్రావణ పౌర్ణమి సందర్భంగా నిర్వహించే ఈ కార్యక్రమానికి వారు ఉభయదారులుగా వ్యవహరిస్తున్నట్లు ఆలయ వర్గాలు తెలియజేశాయి.
కార్యక్రమంలో దేవస్థాన ఈ.వో శ్రీ పెంచల కిషోర్ పాల్గొన్నారు. ఆలయ అధికారులు, సిబ్బంది, స్థానిక భక్తులు, గ్రామ పెద్దలు ఈ ఉత్సవాలకు హాజరయ్యారు. స్వామివారి దర్శనానికి వచ్చిన భక్తులకు దేవస్థానం తరఫున అవసరమైన సౌకర్యాలు కల్పించారు.
శ్రావణ మాసంలో వరసిద్ధి వినాయక స్వామివారి ఆలయంలో ప్రత్యేక పూజలు, ఉత్సవాలు నిర్వహించడం ఆనవాయితీ. ఈసారి పౌర్ణమి సందర్భంగా నిర్వహించిన అభిషేకం, కల్యాణోత్సవం, గ్రామోత్సవం కార్యక్రమాలతో ఆలయ ప్రాంతం పండుగ వాతావరణాన్ని సంతరించుకుంది.
