రాయలసీమ న్యూస్, ఎంటర్‌టైన్‌మెంట్ డెస్క్: హైదరాబాద్‌: విజయ్‌ దేవరకొండ కథానాయకుడిగా రాహుల్‌ సాంకృత్యాన్‌ దర్శకత్వంలో రూపొందుతున్న పాన్‌ ఇండియా చిత్రం ‘రణబాలి’ షూటింగ్‌ దాదాపు పూర్తయింది. టీ సిరీస్‌ సమర్పణలో మైత్రీ మూవీ మేకర్స్‌ ఈ చిత్రాన్ని నిర్మిస్తోంది. రష్మిక కథానాయికగా నటిస్తుండగా, హాలీవుడ్‌ నటుడు ఆర్నాల్డ్‌ వోస్లూ ప్రతినాయకుడిగా కనిపించనున్నారు.
చిత్రబృందం దసరా కానుకగా ఈ సినిమాను అక్టోబర్‌ 16న ప్రేక్షకుల ముందుకు తీసుకురానుంది. విడుదల తేదీ ఖరారైన నేపథ్యంలో ప్రమోషన్‌ కార్యక్రమాలను వేగవంతం చేసింది. ఇందులో భాగంగా సెప్టెంబర్ 9న ‘రణబాలి’ టీజర్‌ను విడుదల చేయనున్నట్లు యూనిట్‌ ప్రకటించింది. సినిమా విడుదలకు దాదాపు నెలరోజుల సమయం ఉండటంతో, ప్రేక్షకుల్లో ఆసక్తిని మరింత పెంచేలా ప్రచార వ్యూహాన్ని సిద్ధం చేసినట్టు సమాచారం.
1854 నుంచి 1878 మధ్యకాలంలో బ్రిటిష్‌ పాలనలో జరిగిన కొన్ని నిజ సంఘటనల ఆధారంగా ఈ చిత్రాన్ని తెరకెక్కిస్తున్నారు. ఆ కాలం సామాజిక, రాజకీయ పరిస్థితులను నేపథ్యంగా తీసుకుని కథను అల్లినట్టు యూనిట్‌ వర్గాలు చెబుతున్నాయి. ఈ చిత్రంలో విజయ్‌ దేవరకొండ ఓ యోధుడి పాత్రలో కనిపించనుండటం సినిమాపై మరింత ఆసక్తిని రేకెత్తిస్తోంది.
పీరియడ్‌ వార్‌ డ్రామా శైలిలో రూపొందుతున్న ఈ సినిమాలో భారీ సెట్లు, విస్తృత స్థాయి యాక్షన్‌ సన్నివేశాలు ఉండనున్నాయని సినీ వర్గాల్లో చర్చ నడుస్తోంది. విభిన్న కథలు, పాత్రలతో ప్రయోగాలు చేసే దర్శకుడిగా పేరున్న రాహుల్‌ సాంకృత్యాన్‌ ఈసారి చారిత్రక నేపథ్యంలో యాక్షన్‌, భావోద్వేగాలకు ప్రాధాన్యం ఇచ్చినట్టు తెలుస్తోంది.
చిత్రానికి అజయ్‌–అతుల్‌ సంగీతం అందిస్తున్నారు. భారీ కాన్వాస్‌, పాన్‌ ఇండియా స్థాయి విడుదలను దృష్టిలో పెట్టుకుని సంగీతం, నేపథ్య సంగీతంపై ప్రత్యేక శ్రద్ధ తీసుకుంటున్నట్టు యూనిట్‌ వర్గాలు పేర్కొంటున్నాయి. ఇప్పటికే షూటింగ్‌లో భాగంగా చిత్రీకరించిన కొన్ని యాక్షన్‌ బ్లాకులు, లుక్‌ టెస్టులు అంతర్గతంగా మంచి స్పందన తెచ్చుకున్నాయని సమాచారం.
విజయ్‌ దేవరకొండ–రష్మిక జంటగా వస్తోన్న మరో పెద్ద చిత్రంగా ‘రణబాలి’పై అభిమానుల్లో భారీ అంచనాలు నెలకొన్నాయి. సెప్టెంబర్ 9న విడుదల కానున్న టీజర్‌ ద్వారా సినిమా టోన్‌, విజువల్‌ స్కేల్‌పై స్పష్టత రానుంది. దసరా సీజన్‌లో బాక్సాఫీస్‌ వద్ద ఈ చిత్రం ఎలా రాణిస్తుందో చూడాలి.
