రాయలసీమ న్యూస్, ఎంటర్‌టైన్‌మెంట్ డెస్క్:
ముంబయిలో బుల్లితెర నటి సంచిత ఉగాలే ఆత్మహత్య
ముంబయి: టెలివిజన్ నటి సంచిత ఉగాలే ఆత్మహత్యకు పాల్పడిన ఘటన ముంబయిలో చోటుచేసుకుంది. అచోలే పోలీస్ స్టేషన్‌ పరిధిలోని నలసోపరాలో ఈ విషాద సంఘటన వెలుగులోకి వచ్చింది. కుటుంబ సభ్యులు ఇంటికి తిరిగి వచ్చేసరికి సంచిత ఉరివేసుకున్న స్థితిలో కనిపించడంతో ఒక్కసారిగా షాక్‌కు గురయ్యారు.
పోలీసుల సమాచారం ప్రకారం.. 22 ఏళ్ల సంచిత ఉగాలే ఆదివారం సాయంత్రం 6.30 గంటల నుంచి 7.30 గంటల మధ్య ఆత్మహత్య చేసుకున్నట్లు ప్రాథమిక దర్యాప్తులో తేలింది. ఘటన జరిగిన సమయంలో ఇంట్లో సంచిత ఒక్కరే ఉన్నట్లు పోలీసులు వెల్లడించారు.
సంచిత ఉగాలే హిందీ టెలివిజన్ సీరియల్‌ ‘కుంకుమ భాగ్య’లో దియా టాండన్‌ పాత్రతో బుల్లితెర ప్రేక్షకులకు సుపరిచితురాలయ్యారు. తన నటనతో ప్రేక్షకులను ఆకట్టుకున్న ఆమె, ‘వాగ్లేకి దునియా’, టీవీ డ్రామా ‘దిల్‌వాలీ దుల్హా లే జాయేగి’ తదితర కార్యక్రమాల్లోనూ నటించి మంచి గుర్తింపు తెచ్చుకున్నారు.
సంచిత ప్రస్తుతం తన తల్లిదండ్రులు, సోదరితో కలిసి నలసోపరాలో నివసిస్తున్నట్లు పోలీసులు తెలిపారు. కుటుంబ సభ్యులు బయటకు వెళ్లి తిరిగి ఇంటికి చేరుకున్నప్పుడు ఆమె ఉరివేసుకున్న స్థితిలో కనిపించడంతో వెంటనే పోలీసులకు సమాచారం అందించారు.
సమాచారం అందుకున్న అచోలే పోలీసులు ఘటనా స్థలానికి చేరుకుని పరిశీలనలు ప్రారంభించారు. సంచిత ఆత్మహత్యకు గల కారణాలు ఇప్పటివరకు స్పష్టంగా తెలియరాలేదని, ఘటన స్థలంలో ఎలాంటి ఆత్మహత్యా నోట్ లేదా ఇతర ఆధారాలు లభించలేదని దర్యాప్తు అధికారులు పేర్కొన్నారు.
ఈ కేసును అన్ని కోణాల్లో పరిశీలిస్తున్నట్లు పోలీసులు తెలిపారు. ఇప్పటికే కుటుంబ సభ్యుల వాంగ్మూలాలు నమోదు చేసినట్టు, అదే సమయంలో సంచితతో కలిసి పనిచేసిన ఇతర సహ నటులను కూడా విచారిస్తున్నట్టు వెల్లడించారు.
సంచిత మృతదేహాన్ని పోస్టుమార్టం కోసం ఆసుపత్రికి తరలించారు. పోస్టుమార్టం నివేదిక అందిన తర్వాత మరిన్ని వివరాలు వెలుగులోకి వచ్చే అవకాశం ఉందని, తదనుగుణంగా విచారణను ముందుకు తీసుకెళ్తామని పోలీసులు పేర్కొన్నారు. సంచిత మృతి వార్త తెలిసిన టెలివిజన్ రంగానికి చెందిన పలువురు కళాకారులు తీవ్ర దిగ్భ్రాంతి వ్యక్తం చేస్తున్నారు.
