రాయలసీమ న్యూస్, నేషనల్ డెస్క్:
విడాకుల కోసం ఐదేళ్లు పోరాడి… చివరికి మళ్లీ ఒక్కటైన దిల్లీ దంపతులు
దిల్లీ: విడాకుల కోసం ఐదేళ్ల పాటు కోర్టు చుట్టూ తిరిగిన దంపతులు చివరికి మళ్లీ ఒక్కటైన సంఘటన దిల్లీలో చోటుచేసుకుంది. సినిమా కథను తలపించే ఈ ఘటన స్థానికంగా చర్చనీయాంశమైంది. ఫ్యామిలీ కోర్టులో విచారణ జరుగుతున్న సమయంలోనే దంపతులు ఒక్కసారిగా కౌగిలించుకొని కన్నీరు పెట్టుకోవడంతో కోర్టు గదిలో ఉన్నవారంతా ఆశ్చర్యానికి గురయ్యారు.
వివరాల్లోకి వెళ్తే… దిల్లీకి చెందిన సౌరభ్‌కు 2020లో శిఖ అనే యువతితో వివాహం జరిగింది. పెళ్లి తర్వాత కొద్ది కాలంలోనే వారి మధ్య విభేదాలు తలెత్తాయి. అనేక ప్రయత్నాలు విఫలమవడంతో ఇద్దరూ విడాకులు తీసుకోవాలని నిర్ణయించుకున్నారు. ఈ నిర్ణయంతో ఫ్యామిలీ కోర్టులో కేసు వేసి, దాదాపు ఐదేళ్లుగా విచారణకు హాజరవుతూ వచ్చారు.
ఈ వ్యవహారంలో న్యాయవాదుల ఫీజులు, కోర్టు ఖర్చులు, ఇతర వ్యయాలు కారణంగా ఇరువురి కుటుంబాలు ఆర్థికంగా తీవ్ర ఇబ్బందులు ఎదుర్కొన్నట్లు సమాచారం. కేసు భారం, ఖర్చుల ఒత్తిడి వల్ల శిఖ తండ్రి తీవ్ర మనస్తాపానికి గురయ్యారని, ఇటీవల ఆయనకు గుండెపోటు వచ్చినట్లు కుటుంబ వర్గాలు తెలిపాయి. కోర్టు కేసు కోసం ఎక్కువ భాగం డబ్బు ఖర్చు కావడంతో ప్రైవేటు ఆస్పత్రిలో చికిత్స అందించలేక, తొలుత ప్రభుత్వ ఆస్పత్రిలో చేర్పించినట్లు తెలిసింది.
ఈ విషయాన్ని తెలుసుకున్న సౌరభ్, శిఖ తండ్రిని గురుగ్రామ్‌లోని ఒక ప్రైవేటు ఆస్పత్రికి తరలించి మెరుగైన వైద్యం అందేలా సహాయం చేసినట్లు సమాచారం. సమయానికి చికిత్స లభించడంతో ఆయన ఆరోగ్యం క్రమంగా మెరుగుపడింది. ఈ పరిణామం తర్వాత ఇరువురి కుటుంబాల మధ్య వాతావరణం కొంత మారినట్లు కోర్టు వర్గాలు చెబుతున్నాయి.
ఇదిలా ఉండగా, ఇటీవల విడాకుల కేసులో మరోసారి విచారణకు తేదీ పడింది. ఈ నేపథ్యంలో సౌరభ్, శిఖ ఫ్యామిలీ కోర్టులో హాజరయ్యారు. ఇరువురి తరఫు న్యాయవాదులు తమ వాదనలు వినిపిస్తున్న సమయంలో న్యాయమూర్తి, ఇప్పటికీ విడాకుల నిర్ణయంపైనే ఉన్నారా అని సౌరభ్‌ను ప్రశ్నించినట్లు కోర్టు వర్గాలు తెలిపాయి.
ఈ ప్రశ్న అనంతరం కోర్టు గదిలో అనూహ్య పరిణామం చోటుచేసుకుంది. అక్కడే ఉన్న శిఖ తన వద్ద ఉన్న విడాకుల పత్రాలను చింపేసి, సౌరభ్‌ను హత్తుకొని కన్నీరు పెట్టుకున్నట్లు ప్రత్యక్ష సాక్షులు తెలిపారు. ఈ దృశ్యాన్ని చూసిన న్యాయవాదులు, కోర్టు సిబ్బంది, ఇతరులు కాసేపు సంభ్రమాశ్చర్యాలకు గురయ్యారు.
తరువాత సౌరభ్, శిఖ కోర్టుకు తమ నిర్ణయాన్ని తెలియజేశారు. విడాకులు తీసుకోకుండా కలిసి జీవించాలని నిర్ణయించుకున్నామని, కేసును ముగించాలని న్యాయమూర్తికి వారు స్పష్టం చేసినట్లు సమాచారం. దీంతో ఐదేళ్లుగా కొనసాగుతున్న వివాదం కొద్ది నిమిషాల్లోనే సుఖాంతం పొందింది. ఈ సంఘటన కోర్టు పరిసరాల్లో చర్చనీయాంశమైంది.
